SUPLEMEN PA MAMRE GBKP TGL. 28 SEP. - 04 OKT. 2025

Pdt. Larena Sinuhadji (Nd. ReyRapha Tarigan)

Teks : Perb. Rasul 20:18-21

Tema : ERDAHIN SEBAGE AKTUALISASI DIRI

Tujun : Gelah Mamre:

1) Ngasup megenggeng i bas ndahiken dahin si enggo ibereken Tuhan

2) Njadiken pengalamen erdahin jadi perdalinen kiniteken ras Tuhan

Penaruh

Sekalak seniman, penyair, penulis, Lebanon nari si tergelar Kahlil Gibran pernah ngatakenca “Work is love made possible,” ertina kurang lebih, bekerja adalah cinta yang diwujudnyatakan. Penjelasenna bagenda nina AI, “Bekerja dengan cinta menurut Kahlil Gibran adalah tindakan menyatukan diri dengan pekerjaan, dengan orang lain, dan bahkan dengan Tuhan, karena pekerjaan adalah “cinta yang mewujudkan diri” atau “cinta yang terwujud.” Ia menyarankan bahwa jika seseorang tidak dapat bekerja dengan cinta, melainkan hanya dengan kebencian atau enggan, lebih baik meninggalkan pekerjaan tersebut dan mencari pekerjaan lain yang memberikan makna dan kegembiraan, sebab bekerja tanpa cinta hanya akan menghasilkan hasil yang “pahit” atau “racun.”

Idealna memang kai pe si idahiken kita, dahikenlah alu sukacita erpalasken keleng ate. Tapi i bas kinatana, melala kita si terpaksa erdahin guna memenuhi kebutuhen geluh. Erdahin enggo la nari aktualisasi diri bagi tema PA-ta sendah. Emaka i bas kesempaten enda radu ras kita mulihi erlajar kerna erdahin alu sukacita erpalasken keleng ate Dibata.

Mpebagesi Ogen

Teks ogenta sendah lit i teruh judul perikop “Kata-kata perpisahan i bas Paulus nari man Pertua-pertua i Epesus.” Arah judul enda nari teridah maka banci ikataken secara garis Paulus nehken kata-kata motivasi, pergegeh, entah pe pedah-pedah man Pertua-pertua i Epesus nari. Ituriken maka kenca enggo pembarken Berita Si Meriah i bas piga-piga ingan i Propinsi Asia (Epesus, Makedoni, Akaya, Troas, Miletus) iterusken Paulus perdalanenna ku Jerusalem. Sope berkat ku Jerusalem i Miletus nari, idilo Paulus Pertua-pertua Epesus guna nehken kata-kata perpisahan.

Lit piga-piga hal si penting si isehken Paulus man Pertua-pertua Epesus. Tapi i bas kesempaten enda fokus kita ku bas ay. 18-21. I bas ayat-ayat e nari teridah maka tutus Paulus i bas ndahiken dahin pelayanenna, bena-benana nari seh ku kedungenna, i daerah Asia. Labo terjeng je saja, Paulus pe enggo jadi usihen i bas kegeluhenna si tep-tep wari. Amin pe melala tantangen, kiniseran, si harus ihadapina, Paulus la pernah surut guna ndahiken dahin-dahin si mehuli i bas Tuhan nari alu meteruk ukur. Janah i bas ndahiken dahin-dahin pelayanenna, Paulus la erayo-ayo, kerinana dat pelayanen si seri, baik man kalak Yahudi bage pe man kalak i bas bangsa-bangsa si deban nari.

Pengkenaina

Rikutken informasi arah AI nari, “Aktualisasi diri adalah proses seseorang menyadari, mengembangkan, dan menggunakan seluruh potensi terbaik dirinya untuk menjadi versi diri yang paling utuh dan matang, di mana kebutuhan dasar dan psikologisnya telah terpenuhi. Hal ini berarti individu tersebut mampu hidup di masa kini, berani menerima diri sendiri, dan memiliki rasa tanggung jawab serta kepedulian terhadap orang lain.” Ikataken “proses,” ertina aktualisasi diri labo terjadi secara instan. Lit waktu si gedang si erbahanca sekalak jelma ngasup ngaloken pendahin kai pe si idahikenna. Pendahin i jenda tentuna pendahin si mehuli sue ras peraten Dibata. Memang mungkin awalna, la ngasup ia ngaloken kinata kegeluhen si erbahanca terpaksa ia ndahiken pendahin si la sue ras sura-surana. Tapi seiring berjalannya waktu, ternikmatina pendahinna, ngena ate ia nandangi dahin si idahikenna, akhirna pendahin e idahikenna alu dem sukacita ras pengataken bujur man Dibata.

Bujur ninta man Dibata, adi enterem kita Mamre si paksa gundari enda dat pendahin si sue ras arapenna. PA-ta sendah tentuna ngajuk kam kerina gelah ngataken bujur man Dibata, erdahin alu tutus, makeken ulih pendahin alu mehuli, bage pe jadi pasu-pasu man keluarga, kade-kade, Gereja, masyarakat sekelewet arah ulih pendahin si idahikenndu. Gelar Dibata termulia arah pendahin si idahiken kam kerina. Man bandu kerina Mamre si paksa gundari enda lenga dat pendahin si sue ras arapenndu, bahkan gundari sanga ndahiken pendahin alu terpaksa, erpalasken ogenta sendah, tetaplah dahiken dahinndu alu tutus, teklah maka i bas paksana pagi, ternikmatindu pendahinndu, entah pe lit dahin si deban si ibereken Dibata si sue ras sura-surandu. I bas si e, tetaplah ngataken bujur man Dibata, pindolah gegeh i bas Dibata nari gelah ipegegehina kam ndahiken dahin si sanga idahikenndu gundari.

PA-ta sendah pe ngajuk kita kerina, khususna kam kerina Mamre, gelah ndahiken dahin-dahin pelayanen alu tutus. Rasul Paulus jadi usihenta i bas kita ndahiken kerina dahin pelayanen alu tutus ras mehuli. Kai pe tugas tanggung jawab pelayanen si ipercayaken Dibata man banta, dahikenlah alu meteruk ukur, janah dem alu keleng ate Kristus. Pindolah gegeh i bas Dibata nari gelah ipengasupNa kita kerina ndahiken dahin-dahin pelayanen alu sukacita kai pe tantangenna. Gelar Dibata termulia arah pelayanenta.