Pdt. Larena Sinuhadji (Nd. ReyRapha Tarigan)
SINERGI
Si Man Ogen : Keluaren 17:8-16
Tema : ERBAGE KENGASUPEN NEHI SADA TUJUN
Tujun : Gelah Moria :
- Nuriken pembagin dahin Musa, Josua, Harun ras Hur i bas merangi bangsa Amalek
- Nggit kerjasama ras kalak si deban i bas pelayanen Gereja
Metode PA : Sharing
Penaruh
Rikutken informasi i bas AI nari, sinergi ertina proses kerjasama atau interaksi gabungan antara dua pihak atau lebih yang menghasilkan efek atau hasil yang lebih besar daripada jumlah masing-masing bagiannya. Istilah ini berasal dari kata Yunani “synergia” yang berarti “bekerja bersama”. Akap kami kerina kita enggo pernah ngenanami manfaat bekerja bersama. I bas budayanta pe enggo rusur siajarken sisampat-sampaten, nggit saling bekerja bersama sada ras si debanna i bas ndahiken dahin-dahin tertentu. Si e kerina erkiteken enggo radu ras sinanami manfaat bekerja bersama maka terus siajarken man kesusurenta.
I bas kesempaten enda radu ras kita erlajar kerna bekerja bersama, bersinergi, i bas nehi sada tujun erpalasken si man ogenta sendah.
Mpebagesi Si Man Ogen
Si man ogenta sendah lit i teruh judul perikop “Perang ras bangsa Amalek” i bas Alkitab TB-LAI nina, “Kemenangan orang Israel melawan orang Amalek.” I bas terj. TB-LAI enggo ipebetehken kemenangen bangsa Israel naluken bangsa Amalek. Turi-turin enda akap kami enggo rusur sibegiken entah pe sioge. Ituriken maka isuruh Musa Josua minpin piga-piga kalak dilaki guna erperang ngelawan bangsa Amalek. Ilakoken Josua bagi si iperentahken Musa man bana.
Tapi labo terjeng Josua ras tenterana ngenca si berjuang naluken bangsa Amalek. Musa, Harun, ras Hur pe ikut erperang tapi alu cara si deban. Datas uruk nari, adi iangkat Musa tanna ku datas, menang bangsa Israel. Tapi adi ipesusurna Musa tanna erkiteken latih, talu me bangsa Israel. Emaka isampati Harun ras Hur, uga carana gelah iangkat Musa tanna terus seh ngadi-ngadi ben. Ibahan Harun ras Hur ingan kundul Musa, janah tedis ia duana sebelah kawes ras kemuhen guna ngangkat tan Musa. Alu bage keri kel italuken Josua bangsa Amalek.
Kai saja antusen si man ogenta sendah? Lit dua hal penting akap kami. Si pemena lebe, kai si ilakoken Musa e me simbol kinitekenta man Dibata. Tan si ipesusur e me tandana la kita erpengendes man Dibata i bas kai pe si ialami kita. Sebalikna, tan si iangkat e me simbol pengendesenta si tuhu-tuhu man Dibata. I bas kita erpengendes man Dibata, e pe kepeken lit peran teman-temanta si deban. Adi sitatang-tatangen kita ertoto erpengendes man Dibata, megegeh kita ngalaken perbeben si mberat sekali pe.
Si peduaken, lit kiniersadan ras kerjasama si mehuli antara Josua, Musa, Harun, Hur, ras bangsa Israel. Adi la lit kiniersadan enggo pasti ise pe la ngasup naluken bangsa Amalek. Bicara ngasup pe tentu peluangna kitik. Ertina, kiniersadan bage pe kerjasama si mehuli erbahanca kita ngasup ngalaken erbage-bage tantangen i bas kegeluhenta. Dibata pe tentu senang adi iidahNa kalak si tek ersada, nggit bahkan ergiah-giah guna saling bekerja sama, sisampat-sampaten, sitatang-tatangen sada ras si debanna. I bas si e kemenangen pe banci ibereken Dibata ku tengah-tengah kiniersadan kalak si tek man baNa.
 |
| Versi Audio Silahkan Klik : https://youtu.be/vVpevyQr5RA |
Pengkenaina
Tema, sub tema, bage pe tujun i bas PA-ta sendah, ngajuk kita kerina senina Moria gelah nggit kita bersinergi sada ras si debanna guna nehi kerina dahin-dahin Tuhan. Adi sedekah enda enggo terjalin sinergitas si mehuli i tengah-tengah Moria, baik sebage pribadi bage pe sebage lembaga, puji Tuhan! Ertina i bas PA-ta sekali enda, iajuk kita guna terus mempertahanken, bahkan meningkatken, sinergitas si enggo terjalin sedekah enda, gelah reh muliana gelar Dibata i bas Yesus Kristus.
Erpalasken si man ogenta sendah, lit telu hal penting si akap kami harus lit i bas kita membangun sinergitas sada ras si debanna. Si pemena, erlajar kita arah Musa i bas relasinta ras Dibata. Adi enggo kita nggeluh erpengendes man Dibata, tentu lit kepekaan ras kepedulian i bas dirinta si erbahanca kita nggit saling bersinergi i bas ndahiken kai pe sue ras peraten Dibata. Si peduaken, erlajar kita arah Harun ras Hur si berinisiatif nampati Musa. Sinergitas si mehuli banci terwujud erkiteken kerinana saling berinisiatif, labo sitimai pengajuk i bas kalai si deban nari maka nggit kita bergerak. Si peteluken, erlajar kita arah Josua si patuh nandangi perentah Musa man bana. Enda lit kaitenna ras nehi sada tujun. Kai tujunta nggeluh? Tujunta nggeluh e me guna mewujudnyataken kerina si jadi peraten Dibata, baik i bas kegeluhenta si tep-tep wari bage pe i bas pelayanenta i Gereja. Emaka mari radu ras kita ertekad guna nggit kita bersinergi sada ras si debanna i bas kita nehi sura-sura Dibata i bas kegeluhenta. Pindolah gegeh i bas Dibata nari gelah ipengasupNa kita kerina nehi kerina sura-sura Dibata i japa pe kita ringan.
Tidak ada komentar:
Posting Komentar