SUPLEMEN PA MAMRE GBKP TGL. 21-27 SEP. 2025

Pdt. Larena Sinuhadji (Nd. ReyRapha Tarigan)

Teks : 1 Timotius 5:17-23

Tema : NJAGA KESEHATAN TENDI RAS KULA

Tujuan : Gelah Mamre :

1) Ngasup njaga kesehatan tendi ras kula

2) Ngasup ngergaken kulana selaku Rumah Pertoton

Penaruh

Lit sada kuan-kuan si ndekah, bagenda nina, “Mens sana in corpore sano,” i bas bahasa Latin nari si ertina, di dalam tubuh yang sehat terdapat jiwa yang kuat. Kuan-kuan enda ngajuk kita kerina kerna pentingnya menjaga kesehatan fisik dan mental secara seimbang, karena kesehatan raga mendukung kesehatan jiwa, dan sebaliknya. I bas kesempaten enda radu ras kita erlajar kerna njaga kesehaten tendi ras kula erpalasken teks ogenta sendah.

Mpebagesi Teks 

Teks si jadi ogenta sendah lit i teruh judul perikop “Tanggung jawab nandangi kalak Kristen.” I bas Alkitab TB-LAI bindu 5 ibagi ku bas telu perikop, si pemena “Mengenai saudara-saudara seiman,” ay. 1-2. Si peduaken “Mengenai janda,” ay. 3-16. Si peteluken “Beberapa petunjuk dan nasihat lagi,” ay. 17 - 25. Janah memang i bas bindu 5 enda, lit telu kelompok perpulungen si harus ilayani alu cara si khusus. Si pemena lebe kelompok perpulungen si usiana enggo metua. Lit cara si khusus i bas melayani kalak si enggo metua. Si peduaken, kelompok perpulungen si enggo mbalu, lit ka cara si khusus i bas ngelai perpulungen si enggo mbalu rikutken konteks si terjadi paksa si e. Janah si peteluken kelompok Serayan, i bas ay. 17 nina “Pertua-pertua.” I bas terj. TB-LAI nina, “Penatua-penatua.” Man pertua-pertua pe lit pelayanen si khusus, si labo seri ras pelayanen man si deban. Si jadi fokus i bas PA-ta sendah termasuk ku bas bagin peteluken, pelayanen man Serayan.

Kai saja si ilakoken i bas pelayanen man Serayan? Si pemena, mereken penghargaan sewajarna man serayan-serayan si enggo ndahiken dahin pelayanenna alu mehuli. Si peduaken, mereken dukungen materi man serayan-serayan si erdahin i tengah-tengah perpulungen. Si peteluken, serayan-serayan labo malekat, ertina banci saja serayan-serayan ngelakoken kesalahen. I bas si e ipindoken man Timotius gelah objektif i bas menilai kesalahen-kesalahen serayan-serayan, rembang tengah, mereken pengajaren i lebe-lebe perpulungen man si ersalah. Enda tujunna guna menjaga kehormatan Serayan Tuhan i lebe-lebe perpulungen. Si peempatken, e me pedah pribadi Paulus man Timotius gelah mediate nandangi kesehatenna.

Si jadi fokus rikutken tema ras tujun PA-ta sendah e me ay. 23. Kai maksud Paulus ngatakenca bage man Timotius? Si pemena, iteh Paulus maka lit pinakit beltek si ialami Timotius, mungkin enda rusur mengganggu pelayanen, entah pe erbahanca Timotius memaksakan diri i bas pelayanen si kedungenna erbahanca pelayanen e la maksimal. Emaka ipedahken Paulus gelah mencampur lau alu sitik anggur gelah lau si iinem Timotius e jadi steril. Sebab paksa si e umumna lau tidak higienis. I jenda teridah kepedulian Paulus nandangi Timotius anak rohanina. Si peduaken, Paulus ngingetken Timotius secara tersirat maka kula ras tendi e merupaken sada kesatuan, adi kula la sehat maka tendi pe terganggu kesehatenna. Emaka harus lit keseimbangen antara mperdiateken kesehaten tendi ras kesehaten kula. Si peteluken, Pdt. Dr. Joas Adiprasetya i bas ChatGPT-na ngatakenca, “Dalam dunia modern, “sedikit anggur” bisa ditafsirkan lebih luas: terapi, rekreasi, seni, bahkan humor, hal-hal kecil yang menjaga kesehatan jiwa dan tubuh kita sebagai bagian dari ibadah sehari-hari.”

Versi Audio silahkan klik : https://youtu.be/xceVa7o5cnU

Pengkenaina

Tema ras tujun i bas PA-ta sendah, ngajuk kam kerina Mamre gelah mediate nandangi kesehaten kula ras tendindu, khususna man kam kerina Mamre si jadi serayan. Erkiteken ogen i bas PA-ta sendah ngerana kerna pelayanen man serayan. Mediate i jenda termasuk secara praktis menjaga kesehaten tendi ras kula. Harus lit keseimbangen antara njagai kesehaten tendi alu asupan Kata Dibata si cukup, ras njagai kesehaten kula alu pola hidup si sehat. Gelah alu bage, kai pe si idahiken kita tuhu-tuhu maba pasu-pasu man banta bage pe kalak si lit i sekelewetta.

Mediate nandangi kesehaten kula ras tendi harus ipalasi alu pemahamen maka kula ras tendita e pemere Dibata, anugerah Dibata man banta. Alu bage labo kita sembarangen nandangi kula ras tendinta erkiteken isedari kita maka si e kerina Dibata si merekenca man banta. Emaka kataken bujurlah man Dibata alu terus njagai kesehaten kula ras tendinta. Enda akap kami menjawab tujun si peduaken PA-ta sendah.

Mehuli akap kami adi Mamre saling mengingatkan sada ras si debanna guna menjaga kesehaten tendi ras kula, baik secara pribadi bage pe kelembagaan. Mehuli akap kami adi Mamre secara kelembagaan ngelitken program-program si berkaiten ras kesehaten, umpamana: olah raga bersama, erbahan pemeriksaan kesehaten si rutin, erbahan ceramah-ceramah kesehaten, rsd.-na. Alu bage Mamre secara kelembagaan pe tuhu-tuhu mediate nandangi kesehaten si seimbang jasmani ras rohani. Dibata si masu-masu kam kerina Mamre GBKP.