SUPLEMEN PA MAMRE GBKP TGL. 16 - 22 MARET 2025

Pdt. Larena Sinuhadji (Nd. ReyRapha Tarigan)

Teks : Keluaran 15:22-27

Tema : KEPATUHEN MABA KINIRATUREN RAS KEJUAH-JUAHEN

Tujun : Gelah Mamre :

1) Meteh maka kepatuhen penting kal i lebe-lebe Dibata

2) Ncidahken sikap patuh dingen nggejapken ulih si mehuli arah kai si ilakokenna

Penaruh

Lit kuan-kuan si ngatakenca, “Peraturan dibuat untuk dilanggar.” Kuan-kuan enda mungkin maksudna satire. Satire ertina gaya bahasa yang dipakai dalam kesusastraan untuk menyatakan sindiran terhadap suatu keadaan. Memang i bas kinatana melala aturen i bas kegeluhenta si ilanggar bage-bage saja tanpa alasen si banci ipertanggungjawabken. Adi enggo enterem jelma si melanggar aturen enggo pasti si terjadi kekacauan, si banci saja menyebabkan jatuhnya korban jiwa. I bas kesempasen enda radu ras kita erlajar mulihi kerna kepatuhen erpalasken Kata Dibata si jadi teks ogenta sendah.

Mpebagesi Teks 

Teks Kata Dibata si jadi ogenta sendah lit i teruh judul perikop “Lau pagit.” I bas Alkitab TB-LAI nina “Di Mara dan di Elim.” Ituriken maka kenca enggo bangsa Israel ndarat i taneh perbudaken Mesir nari, tuhu-tuhu bangsa e ijagai Dibata seh makana bangsa e banci mentasi Lawit Merah, janah tentera-tentera Firaun si ngayaki bangsa e gedap ibahan Dibata. Kenca bage iterusken bangsa e erdalan mentasi guru pasir Sur. Tapi enggo telu wari dekahna erdalan, lalap la ijumpai bangsa e lau guna banci iinem. Lit sada ingan gelarna Mara, lit je launa, tapi pagit nanamna janah la terinem. I je bangsa e jungut-jungut man Musa. Kenca bage ertoto Musa man TUHAN, je nari ituduken TUHAN sepenggel batang kayu. Ibenterken Musa kayu e ku bas lau si pagit ndai, kenca bage lau ndai enggo lanai pagit janah banci iinem.

Versi Audio silahkan klik : https://youtu.be/27tdVRmu_eA

I bas ingan e ibereken TUHAN Undang-undang si man ikutenken bangsa e. Nina TUHAN man bangsa e, “Adi tuhu-tuhu kam patuh man bangKu alu erbahan kai si payo Kuakap, janah iikutkenndu kerina si Kusuruh, la kam Kuukum alu penakit-penakit si Kubahan man bangsa Mesir. Aku kap TUHAN si erbahanca kam mejuah-juah.” Enda akap kami si jadi fokus i bas PA-ta sendah. I bas perentah enda jelas maka kepatuhen man Dibata erbahanca bangsa e mejuah-juah. Sedangken kinilapatuhen erbahanca bangsa e kena penakit. Adi sikaitken ras lau pagit ndai, teridah maka Dibata alu kuasaNa si la ersibar ngasup erbahan lau si mungkin saja dem alu penakit, jadi bersih ras banci iinem jadi gegeh si mbaru. Ertina i bas peristiwa tanda sengget si terjadi i Mara bage pe perentah si isehken Dibata man bangsa e, seharusna erbahanca reh paguhna kiniteken bangsa e man Dibata. Tuhu-tuhu patuh bangsa e man Dibata, erbahan kai si payo sue ras peraten Dibata, janah iikutkenna kerina si isuruh Dibata. Kenca bage ibaba Dibata bangsa e ku Elim, i ja lit 12 ulu lau ras 70 batang kurma. Tuhu-tuhu luar biasa keleng ate Dibata man bangsaNa. Enda pe seharusna erbahanca bangsa e tutus erkemalangen man Dibata. Tapi la ndekah kenca si e, mulihi ka bangsa e jungut-jungut, janah i bas turi-turin selanjutna, rusur bangsa e la patuh man Dibata.

Pengkenaina

Dibata si isembah kita e me Dibata kiniraturen. Itepa Dibata alam semesta ras kerina isina alu ratur, sistematis ras tuhu-tuhu terprogram, seh makana kerinana banci erdalan alu mehuli. Raja Daud ngakukenca maka Dibata e me Dibata si ratur, nina, “Sebab IA menegakkan bagiku suatu perjanjian kekal, teratur dalam segala-galanya dan terjamin” (2 Sam. 23:5b). Rasul Paulus pe ngajarkenca kerna kiniraturen i tengah-tengah perpulungen, nina, “Tetapi segala sesuatu harus berlangsung dengan sopan dan teratur” (1 Kor. 14:40). Kepatuhen e me syarat si penting i bas kiniraturen. Adi la patuh nandangi Undang-undang entah pe perentah Dibata enggo pasti la lit kiniraturen bage pe la lit kejuah-juahen. Ogenta sendah encidahkenca maka ulih kepatuhen e me kejuah-juahen i bas Dibata nari.

Tema bage pe tujun i bas PA-ta sendah ngajuk kita kerina, khususna kam kerina Mamre, gelah patuh nandangi perentah Dibata. Tapi tujun utama i bas kita patuh man Dibata labo gelah datken kejuah-juahen. Palas i bas kita patuh e me keleng ate Dibata si la ersibar i bas kegeluhenta. I bas si e tentu harus leben sigejapken keleng ate Dibata e, labo erkiteken nina kalak, tapi memang tuhu-tuhu enggo sigejapken keleng ate Dibata si luar biasa i bas kegeluhenta. Adi enggo tuhu-tuhu sigejapken keleng ate Dibata e, alu ukur ersuruh, lit kerelaan i bas dirinta guna patuh man Dibata. Kepatuhen i bas dirinta e me tanda pengataken bujurta man Dibata. Wujud nyata keselamaten si enggo sialoken arah kinitekenta, enda si membedaken kepatuhen doni enda ras kepatuhen kalak si erkiniteken.

E maka i bas kesempaten enda mari radu ras sipelimbarui tekadta guna tuhu-tuhu patuh man Dibata i bas kerina situasi kegeluhenta. Tek kita maka kerina perentah Dibata tujunna guna kiniulin bage pe kejuah-juahen geluhta, labo guna encedai kita (Jer. 29:11). Memang labo murah guna patuh man Dibata i bas kerina situasi kegeluhenta, emaka pindolah gegeh i bas Dibata nari gelah ipengasupNa kita nggeluh alu kepatuhen man Dibata. Dibata si mpengasup kita kerina, khususna kam kerina Mamre GBKP.