Pdt. Larena Sinuhadji (Nd. ReyRapha Tarigan)
Teks : Roma 15:1-6
Tema : MUAT BAGIN I BAS DAHIN DIBATA
Tujun : Gelah Mamre :
1) Meteh maka kalak si tek muat bagin i bas dahin-dahin Dibata
2) Mendukung ras notoken Sidang Majelis Sinode gelah erdalan alu mehuli
Penaruh
Kinitekenta labo kiniteken si pasif, kinitekenta e me kiniteken si aktif, bahkan proaktif. Rasul Paulus i bas Fil. 2:12 ngatakenca, “Tetaplah kerjakan keselamatanmu,” ertina keselamaten si enggo ialoken kita harus iwujudnyataken i bas kegeluhenta si tep-tep wari. I bas kesempaten enda radu ras mulihi kita erlajar guna proaktif mewujudnyatakan keselamatan alu muat bagin i bas dahin Dibata, khususna i bas rangka mendukung ras notoken Sidang Majelis Sinode GBKP si bakal silaksanaken i bas bulan April 2025.
Mpebagesi Teks
Teks si jadi ogenta sendah termasuk ku bas bagin pendungi surat Roma, i ja Rasul Paulus mereken pedah-pedah si sifatna praksis (labo praktis). Praksis ertina, nilai-nilai yang diwujudkan dalam tindakan atau perilaku. Lit nilai penting si jadi palas tindakenta, umpamana, kita nampati kalak si deban labo terjeng nampati bage-bage saja, tapi lit palas kinitekenta, e me erkiteken enggo leben sigejapken penampat Dibata i bas kegeluhenta. Penampat si isehken kita ku kalak si deban e me bentuk nyata pengataken bujurta man Dibata. Adi la pe ibalasna penampatta, labo kita megelut, sebab tujunta nampati labo guna datken balasen, tapi erkiteken Dibata enggo leben nampati kita.
I bas bindu 15 si jadi teks ogenta sendah, ilumbaken Paulus man perpulungen gelah mediate, sisampat-sampaten sada ras si debanna. Bage pe gelah perpulungen e nggeluh ersada guna muji Dibata. Man perpulungen si enggo megegeh kinitekenna harus nggit nampati perpulungen si merampek denga kinitekenna. I bas kita nampati tentu harus lit i bas dirinta kepedulian nandangi kalak si deban. I bas si e tentu biak-biak egois harus sibeneken. Harus lit kerelaan guna berkorban demi kalak si deban. I bas ay. 2 ikataken maka “Sekalak-sekalak kita harus mperdiateken temanta janah ngukuri kai si mereken kiniulin man bana gelah alu bage erteguhna kinitekenna.” Ngukurken kai si mereken kiniulin enda akap kami penting kel, sebab i jenda nilaina labo terjeng erpemere saja, tapi enggo siukurken mbages-mbages, apakah si ibereken kita e membangun kiniteken, maba kiniulin, entah sebalikna.
 |
| Versi Audio silahkan klik : https://youtu.be/QRvdKONvEOY |
Ay. 3 ras 4 akap kami si jadi palas i bas kita mediate, nggit erkorban guna sisampat-sampaten sada ras si debanna. E me erkiteken Kristus enggo leben mediate janah nggit erkorban guna kiniulin kerina kalak si tek man Dibata. Tapi i bas kita mediate, nggit erkorban guna sisampat-sampaten e labo murah, melala tantangenna. Emaka ogelah Pustaka, sebab Kata Dibata i bas Pustaka Si Badia ngajari kita gelah megegeh ras sabar i bas erpengarapen man Dibata.
I bas ay. 5 ras 6 Rasul Paulus ngajuk perpulungen gelah nggeluh ersada. Ay. 5 i bas terj. TB-LAI Ed. 2 nina, “hidup yang sehati dan sepikir, sesuai dengan kehendak Kristus Yesus.” Ertina nggeluh ersada i jenda palasna e me ngusih Yesus Kristus. Tentu melala manfaat si idatken perpulungen adi nggeluh ersada. Si jadi fokus i bas ay. 6 e me guna muji memuliakan Dibata Bapa, Tuhanta Yesus Kristus. I bas terj. TB-LAI Ed. 2 nina, “dengan satu hati dan satu suara kamu memuliakan Allah dan Bapa Tuhan kita Yesus Kristus.” Ertina memuliakan Dibata i jenda konteksna e me i bas kerina pengkebet geluhta, labo terjeng sangana kita pulung rende muji Tuhan secara formal i bas kebaktin-kebaktin Gereja.
Pengkenaina
Tema bage pe tujun PA-ta sendah ngajuk kita, khususna kam kerina Mamre, gelah secara proaktif ikut muat bagin i bas ndahiken dahin-dahin Dibata. Dahin-dahin Dibata secara konkrit enggo sioge i bas teksta sendah, e me: sisampat-sampaten, saling mperdiateken, bage pe saling mereken kiniulin guna mpeteguhi kiniteken. Si jadi palas i bas kita ndahiken dahin-dahin Dibata e me teladan Yesus Kristus, ulu pengarapen, ulu kesabaren ate, dingen ulu pergegeh, sue ras si enggo isaksiken i bas Pustaka Si Badia. Adi Yesus Kristus si jadi usihenta tentu ndahiken dahin-dahin Dibata enggo lanai man singetenken, enggo lanai man iah-iahenken. Enggo lit kesadaren i bas diri Mamre guna secara proaktif muat bagin i bas dahin-dahin Dibata i japa pe ia ringan. I tengah-tengah jabu, i bas pendahinna, i tengah-tengah masyarakat, bage pe i Gereja.
Secara khusus i bas PA-ta sendah, iajuk kita kerina guna notoken ras mendukung Sidang Majelis Sinode GBKP si irencanaken ilaksanaken i bas bulan April 2025 enda, gelah banci erdalan alu mehuli. Melala bentuk dukungen si banci silakoken. Si paling sederhana akap kami, notokenca gundari nari. Sidukung kecukupen danana. Adi kita termasuk utusen i bas Runggun-runggun nari, sisikapken dirinta guna tuhu-tuhu ngikuti sidang wari pemena nari seh asa dung. Tertib ngikuti sidang. Sipelajari gundari nari materi-materi persidangan, rsd.-na. Dibata si mpengasup kita kerina guna secara proaktif muat bagin i bas ndahiken dahin-dahin Dibata.
Tidak ada komentar:
Posting Komentar