SUPLEMEN PA MAMRE GBKP TGL. 23 - 29 MARET 2025

Pdt. Larena Sinuhadji (Nd. ReyRapha Tarigan)

Teks : 1 Korinti 16:10-14

Tema : RADU NAMPATI I BAS NEHKEN KELENG ATE

Tujun : Gelah Mamre :

1) Meteh maka nggeluh erkiniteken man Dibata harus tetap saling nampati

2) Ngasup tetap nggeluh sisampat-sampaten i bas ncidahken keleng ate bage pe naluken perbeben geluh

Penaruh

Keleng ate akap kami ukuren si meganjangna i bas karakter Kristus. Tuhan Yesus i bas Mat. 22:37-40 mereken perentah man banta gelah engkelengi Tuhan ras temanta manusia. Rasul Paulus i bas 1 Kor. 13:13 ngatakenca, “Si pentingna e me engkelengi kalak si deban.” Janah i bas Gal. 5:22 ikataken maka ulih Kesah Si Badia si pemenana e me kekelengen. I bas kesempaten enda radu ras kita erlajar kerna sisampat-sampaten alu palas keleng ate Kristus.

Mpebagesi Teks

Bahan ogen sendah lit i teruh judul perikop “Rencana perdalanen Paulus” ras “Kata pendungi.” I bas Alkitab TB-LAI teks ogenta sendah lit i teruh judul “Beberapa pemberitahuan.” Arah judul-judul perikop ndai banci siidah maka teks ogenta sendah e me bagin pendungi surat Rasul Paulus si pemena man perpulungen kalak si tek i kota Korinti. I bas bagin pendungi enda lit piga-piga pedah Paulus e me:

1. Ay. 10-11, mindo Rasul Paulus gelah perpulungen ngalo-alo kerehen Timotius ras nampati ia i bas pelayanenna, gelah pedas ka ia mulihken ku Paulus guna nampati Paulus ndahiken pelayanen si deban. Kata-kata “metumbur” ras “mekarus” i bas Alkitab bhs. Ind., nina “tanpa takut” ras “menganggap rendah” erkiteken mungkin nguda denga Timotius (bdk. 1 Tim. 4:12). I bas si e teridah maka Paulus tuhu-tuhu mendukung pelayanen Timotius amin pe nguda denga ia.
2. Ay. 12, Paulus mereken informasi man perpulungen maka enggo ipindona man Apolos gelah reh i Epesus nari, tapi erkiteken lenga lit kesempaten si mehuli makana lenga sempat Apolos reh guna ndahi perpulungen i Korinti. Rikutken informasi i bas 1 Kor. 1:11-12; 3:4-6; ras 4:6-7, Apolos pernah melayani i Korinti sope melayani i Epesus. I bas si e teridah maka nggit Paulus bekerja sama ras kalak si deban guna kiniulin perpulungen kalak si tek i Korinti.
3. Ay. 13, Rasul Paulus memotivasi perpulungen Korinti gelah: erjaga-jaga, tetap erkiniteken, bersikap bagi dilaki ras megenggeng. Erjaga-jaga ertina waspada, siap sedia katawari paksa pe erkiteken kerehen Dibata si peduakaliken la lit ise pe si metehsa ndigan waktuna. Tetap erkiniteken (terj. TB-LAI nina, “Berdirilah teguh dalam iman”) ertina cikep alu paguh Kata Dibata (bdk. Gal. 5:1; Flp. 4:1; 2 Tes. 2:15) rikutken situasi si terjadi i tengah-tengah perpulungen Korinti (1 Kor. 1:10-17), gelah ula murah terombang-ambing pengajaren-pengajaren si la benar. Bersikap bagi dilaki ras megenggeng, e me ibuat Paulus i bas Masmur 31:25 nari, si maksudna gelah perpulungen pang (berani dan bertahan di dalam iman) i bas ngalaken kerina perbeben si reh (i bas terj. BIMK nina, “Bertindaklah dengan berani dan jadilah kuat”).
4. Ay. 14, Rasul Paulus mereken pergegeh, amin pe i bas situasi si la bagi ukur, tetaplah ngelakoken kai si banci ilakoken erpalasken keleng ate Kristus (penekanen 1 Kor. 13:13).

Versi Audio silahkan klik : https://youtu.be/IKAzGcK-6zc

Pengkenaina

Kai antusen teks si man ogenta sendah ikaitken ras tema bage pe tujun PA-ta sendah? Si pemena lebe, surat Rasul Paulus man Perp. Korinti encidahkenca keleng ate Paulus nandangi perpulungen kalak si tek i Korinti. Adi la lit keleng ate i bas diri Paulus, enggo pasti la lit mediate nandangi kai si terjadi i tengah-tengah Perp. Korinti. Tapi erkiteken lit keleng ate i bas diri Paulus erpalasken keleng ate Kristus, isempatkenna nulisken suratna man perpulungen i Korinti gelah megegeh i bas ngalaken kerina tantangen si reh bas nari bage pe ndarat nari. I bas ay. 13-14 teridah uga Paulus mereken kata-kata pergegeh ras motivasi man perpulungen gelah megenggeng ngalaken kerina tantangen. Enda tentu jadi bahan evaluasi man banta, khususna kam Mamre, apakah lit keleng ate i bas diri Mamre si icidahken arah kata-kata pergegeh bage pe motivasi-motivasi si membangun kiniteken Mamre si deban? Adi enggo silakoken, puji Tuhan! Adi lenga, bahanlah bagi Paulus ras Perp. Korinti, saling nampati erpalasken keleng ate Kristus.

Si peduaken, icidahken Paulus keleng atena nandangi Timotius ras Apolos. Amin pe nguda denga Timotius tapi ipercayaken Paulus dahin pelayanen man bana guna idahiken i Korinti. Emaka i bas si e iajuk Paulus Perp. Korinti gelah ngaloken ras mendukung pelayanen Timotius. Icidahken Paulus maka la lit persaingen antara ia ras Apolos. Tutus kalak enda melayani guna Kristus, labo guna kepentingenna sendiri, emaka duana kalak enda pe saling mendukung i bas pelayanen. Enda pe banci jadi bahan evaluasi man banta, khususna man kam Mamre kami. Enggo nge icidahken pengurus Mamre, i bas tingkat Sektor bage pe tingkat Runggun, saling mendukung i bas ndahiken dahin-dahin pelayanen? Sebage pemimpin tentu harus ngasup mereken teladan si mehuli man anggota-anggotana. Adi enggo cidahkenndu kerja sama si mehuli, sisampaten, sikelengen, antar pengurus sada ras si debanna, puji Tuhan! Adi lit denga konflik antar pengurus tentu harus leben sidungi alu mehuli, gelah pelayanen pe banci silakoken alu maksimal.

Si peteluken, tema bage pe tujun i bas PA-ta sendah, ngajuk kita kerina, khsusuna kam Mamre kami, gelah leben igejapkenndu keleng ate Kristus. Alu bage keleng ate Kristus si lit i bas kita banci si-transfer ku si deban i bas bentuk sisampat-sampaten. Adi lenga sigejapken keleng ate Kristus, tentu interaksi ras kalak si deban pe terganggu, sebab palasta engkelengi labo keleng ate Kristus tapi keleng ate manusia si cenderung menuntut balasan si setimpal i bas kita engkelengi kalak si deban. Adi la setimpal balasen kalak man banta, turah kekecewaan i bas dirinta. Emaka gejapkenlah tuhu-tuhu keleng ate Kristus si tulus, gelah penampat si isehken kita tuhu-tuhu guna kemulian gelar Dibata, labo guna kepentingenta. Dibata si mpengasup kita kerina, khususna mpengasup kam kerina Mamre kami.