SUPLEMEN PJJ GBKP TGL. 23 - 29 MARET 2025

Pdt. Larena Sinuhadji (Nd. ReyRapha Tarigan)

I BAS KITA LIT KAP KEPENTAREN DIBATA - 1 Korinti 2:6-16

(Sidang Majelis Sinode)

Penaruh

Adi ngerana kerna kepentaren Dibata situhuna la lit kedungenna erkiteken kepentaren Dibata la lit batasna janah la lit ise pe si ngasup nerangkenca (bdk. Rom. 11:33, rsd.). Tapi secara ringkas i bas Pustakanta Si Badia kepentaren (hikmat) biasana erkaiten ras:

1. Keterampilen khusus si ibereken Dibata man sesekalak guna ndahiken dahin si khusus (bdk. Kel. 31:1-5, rsd.).
2. Kengasupen si rehna i bas Dibata nari guna ngangkai ras ndungi persoalen-persoalen si terjadi si tep-tep wari (bdk. 1 Raj. 3:16-28, rsd.).
3. Cara rukur ras cara nggeluh si secara moral benar sue ras sura-sura Dibata (bdk. kitab Kuan-kuanen, rsd.).
4. Yesus Kristus sebage kepentaren Dibata si nggeluh si reh ku doni enda. Banci ikataken kepentaren Dibata enda merupaken kualitas si meganjangna i bas relasinta ras Dibata, em si jadi perayaken kalak si tuhu-tuhu tek man Dibata i bas Yesus Kristus.

I bas kesempaten enda radu ras kita mulihi erlajar kerna kepentaren Dibata, khususna i bas rangka mendukung Sidang Majelis Sinode GBKP si kentisik nari bakal silakoken. 

Mpebagesi Ogen

Kira-kira tahun 50 M, Rasul Paulus pernah tading i kota Korinti 18 bulan dekahna guna pembarken Berita Si Meriah (Perb. Rasul 18:1-8). Kurang lebih 5 tahun kenca si e, Rasul Paulus nulisken suratna si pemena man perpulungen kalak si tek i kota Korinti. Surat Rasul Paulus man Perp. Korinti enda tujunna guna nehken pedah-pedah (penggembalaan) rikutken situasi si berkembang paksa si e, si ijelasken Paulus i bas bindu 1:10-17, e me terjadi perubaten i tengah-tengah Perp. Korinti. Persoalen si deban ituriken Rasul Paulus i bas bindu 1:18-31, lit denga anggota perpulungen si mengandalken kepentaren manusia asangken kepentaren Dibata.

Versi Audio silahkan klik : https://youtu.be/rgc1FMta-AI

Lit 2 judul perikop i bas bindu 2 si jadi ogenta sendah. Ay. 1-5 lit i teruh judul “Berita kerna kematen Yesus i kayu persilang.” Ay. 6-16 lit i teruh judul “Kepentaren Dibata.” Bindu 2:1-5 merupaken penegasen Rasul Paulus maka la ipakena kebeluhen ras kepentarenna sebage manusia guna meritaken Berita Si Meriah, tapi ipakena Kuasa Dibata (ay. 5). Adi sinen latar belakang Rasul Paulus i bas Perb. Rasul 22:6-16; 26:12-18, situhuna lit kebeluhenna guna nerangken isi Kitab Taurat ras Kitab Nabi-nabi, tapi kenca itandaina Kristus maka kerina pemetehna e ianggapna sebage hal si sia-sia (Pil. 3:8). E maka iandalkenna kuasa Dibata, gelah e pe jadi usihen man Perp. Korinti.

Ogenta sendah ngerana kerna “Kepentaren Dibata”, i bas Alkitab TB-LAI nina “Hikmat yang benar”. Rasul Paulus meritaken kerna kepentaren Dibata si erbahanca kalak Yahudi megelut, bage pe jadi sada kebodohen iakap kalak Yunani (1 Kor. 1:23). Kepentaren Dibata e me Yesus Kristus. Kepentaren Dibata si serta i bas Yesus Kristus enda enggo ialoken kalak si tek man baNa alu Kesah Dibata. Kesah Dibata si ngajarken man kalak si tek:

1. Biak Dibata, ay. 10 (rencana-rencana Allah).
2. Pemeteh kerna Dibata, ay. 11-12 (isi hati Allah) ras pemere-pemereNa (semua yang telah dianugerahkanNya).
3. Kebenaren pertendin, ay. 13-14 (hal-hal rohani).
4. Kengasupen ertimbang kerna kai pe, ay. 15.
5. Perukuren Kristus, ay. 16. Nina Paulus i bas ay. 6, “Iberitaken kami nge berita kerna kepentaren man kalak si enggo dewasa kinitekenna.” I bas ay. 13 nina, “dewasa kegeluhen pertendinna.” Antusenna, i bas sada sisi Paulus ngatakenca, secara tersirat, maka kepentaren Dibata mabai kalak si tek ku kedewasaan erkiniteken. I bas sisi si deban, melala denga kalak si tek si lenga dewasa geluh kinitekenna bagi piga-piga kalak i bas Perp. Korinti. Kalak si dewasa kinitekenna tentuna lit perobahen si nyata i bas geluhna erkiteken terbuka pusuh perukurenna guna iajari Kesah Dibata.

Bagi si enggo isingetken i datas, i bas Perp. Korinti lit dua kelompok si mbelin, e me kelompok Yahudi ras kelompok Yunani. Kalak Yahudi mindo tanda-tanda sengget jadi bukti. Sedangken kalak Yunani ndarami kepentaren. Kalak Yunani sangat memegahken hikmat, kalak si terdidik, mbue filsuf rsd. Ras duana kelompok enda menganggap berita kerna salib (kayu persilang) sada kebodohen. Subuk kalak Yahudi si ngarapken terjadi mujizat asum Yesus isalibken. Bage pe kalak Yunani, menganggap arah pengorbanen Yesus i kayu persilang, sada kebodohen. Tapi jelas Paulus ngatakenca, kalak si enggo ipilih Dibata, subuk kalak Yahudi bage pe kalak Yunani, Kristus e kap gegeh Dibata ras kepentaren Dibata.

Pengkenaina

Adi sikaitken ras tema PJJ-ta sendah, asumsina maka i bas kerina kalak si tek, enggo lit i bas ia kepentaren Dibata. Adi enggo lit kepentaren Dibata maka banci ikataken kalak si bage enggo dewasa kinitekenna. Kalak si dewasa kinitekenna ngasup ia ertimbang kerna kai pe. Ertina, kai pe si iukurkenna, si ibelaskenna, ras si ilakokenna, tuhu-tuhu erpalasken kepentaren Dibata. Kengasupen enda lit bas ia erkiteken piga-piga hal. Si pemena lebe kepentaren Dibata lit bas ia. Kepentaren (hikmat) bas konteks Yahudi e me kap pemere Dibata. Manusia labo banci berhikmat tanpa pertolongan Dibata. Maka gelah banci kita ngenen alu payo ras memutusken alu benar pindolah hikmat bas Dibata nari.

Si peduaken, e me kap tunduk i bas kendali Kesah Si Badia. Roh Kudus sebage pengendali kegeluhenta. Konteks jaman genduari macam-macam si mengendaliken manusia. Erta kebayaken, keduduken, jabaten, popularitas, lit deba kerangapen, keegoisen, rsd. Adi bage kerina enggo banci sibayangken uga ngalahna nggeluh i bas doni si bage rupa. Maka kalak si dewasa geluh pertendinna, Kesah Si Badia si mbabai geluhna seh maka tujun dingen arah geluhna pe ibabai ku bas kemalemen ate.

Si peteluken cara berpikir Kristus. Kristus, la diriNa ngenca iukuriNa, tapi nggit IA mate berkorban nelamatken manusia. Maka kalak si dewasa, carana rukur bali ras cara Kristus rukur e me dem kekelengen dingen lit pengorbanen i bas dirina. Si nggit ngukuri si enterem la terjeng ngukuri dirina sendiri. Enda akap kami si harus jadi palas i bas Sidang Majelis Sinode GBKP si kentisik nari bakal ilakoken. Man banta peserta sidang, genduari nari mari radu ras sipindo gegeh kepentaren i bas Dibata nari i bas pertoton-pertotonta. Erlajar kita tunduk i bas kendali Kesah Si Badia. Janah erlajar kita cara berpikir Kristus si rela berkorban guna kepentingen jelma si enterem. Dibata si mpengasup kita.