SUPLEMEN PJJ GBKP TGL. 30 MARET - 5 APRIL 2025

Pdt. Larena Sinuhadji (Nd. ReyRapha Tarigan)

NURIKEN KERNA YESUS MAN KERINA MANUSIA - Perb. Rasul 26:19-23

(Sehna Berita Si Meriah)

Penaruh

Dibata banci make kerina cara guna tersehi sura-suraNa termasuk i bas penginjilan, bage me si terjadi i tengah-tengah suku Karo. Kalak Karo paksa si e la senang man kalak Belanda si enggo merampas taneh, hak-hak, kampung halaman, termasuk kalak Karo sendiri si iperlakuken alu kejam sebage pekerja rodi. Kinirawan kalak Karo nandangi kolonial Belanda icidahken alu perang gerilya, si nilakoken berngi wari. Aksi enda ikenal alu istilah musuh berngi, i bas istilah kalak Belanda: Batak Oorlog. Musuh berngi ncedaken tanaman perkebunen Deli Mij, ras aksi enda erbahanca kerugian la sitik termasuk kalak Belanda sendiri enggo merasa terancam, mbiar kerna keselamatanna termasuk keluargana. Kenca enggo 18 tahun musuh berngi bergerilya, maka lit sekalak kepala administrator perkebunen si gelarna J.T. Creamer ngatakenca situasi enda hanya banci iakhiri alu metode si lebih soft, alu pendekaten keagamaan alu biaya itanggung perkebunen. J.T. Creamer erbahan perjanjian ras Lembaga Pekabaran Injil Belanda: Nederlandsch Zendelings Genootschap (NZG) i negeri Belanda nari. Badan Missi enda me si kedungenna ngelakoken penginjilan, mpetandaken Yesus Kristus si erbahanca enteremen kalak Karo bertobat seh makana biak si la mehuli (nangko, ngeingei, erbahan kejahaten) la nari ikuitna. Kepeken kerina rancangen enda ipake Tuhan guna banci menghadirken Berita Si Meriah man kalak Karo.

Versi Audio silahkan klik : https://youtu.be/3xdxlBVGCwQ

Mpebagesi Ogen

Perikopta (Perb. 26:19-23) e me bagin i bas pembelaan diri Paulus i lebe-lebe raja Agripa. Umumna kalak asum ibere kesempaten mbela diri maka ipakena kesempaten e guna nuriken kebenaren tentang dirina gelah banci ia selamat, bebas i bas ukumen nari. Tapi la bage si idalanken Paulus i bas turi-turinta sekali enda, kesempaten e ipakena guna nuriken Berita Si Meriah, berita keselamaten i bas Yesus Kristus.

Latar belakang perikop enda e me asum Paulus i Yerusalem ras sangana ia i Rumah Pertoton itangkap piga-piga kalak Yahudi ras namakenca ku bas penjara. Sebab enterem paksa si e kalak Yahudi si atena membunuh Paulus (bdk. Perb. 21:37-). Tapi erkiteken Paulus memiliki dua kewarganegaraan, sebage kalak Israel ras sebage kalak Roma, la banci sepihak ia iligasi (ipekpeki) tanpa melewati pengadilen. Emaka mulai bindu 23 Paulus i lebe-lebe Pengadilen Agama, Paulus ikirim ku Gubernur Felix ras kedungenna ipindoken Paulus gelah pemerentahen Roma si mutusken perkarana. E me dalan-dalanna Paulus i lebe-lebe Raja Agripa, i ja iturikenna uga awalna ia bertobat.

Secara khusus i bas perikopta si ibere judul “Ituriken Paulus pendahinna” (terj. Ind., mulai ay. 12 “Paulus menceritakan pertobatan dan panggilannya”). Ibenakenna nuriken kerna pertobatenna asum ibereken Dibata pengenehenen si ialokenna i bas Dibata nari (asum itangkap Tuhan i bas perdalanenna ku Damaskus guna ngeligasi kalak Kristen). Mulai je nari iberitakenna dalan pertobaten man kalak Yahudi ras non-Yahudi mulai i Damaskus, Yerusalem ras i belang-belang taneh Yudea gelah kerina jera janah icidahkenna arah perbahanen si mehuli tandana enggo jera. Erkiteken si e me maka dalanna Paulus itangkap kalak Yahudi ras ibunuhna atena asum ia i Rumah Pertoton. Ras isaksiken Paulus uga hebatna kuasa Tuhan si nampati, i ja seh i bas paksa enda (nuriken kesaksianna i lebe-lebe Raja Agripa) tetap ia selamat. Erkiteken kekelengen Tuhan si mbelin me, maka rutang pusuh Paulus guna nuriken kerna keselamaten i bas Yesus man kerina manusia, subuk man kalak si mbelin bage pe man kalak si meteruk. Janah situhuna, kai si ituriken Paulus, bali nge ras kai si enggo leben ituriken nabi-nabi ras Musa. I ja, Mesias e harus ngenanami kiniseran seh mate, janah IA me si tangtangna ipegeluh Dibata i bas si mate nari gelah arah kekekenNa e banci icidahkenNa terang keterkelinen subuk man kalak Yahudi bage pe man kalak si deban si labo Yahudi. Paulus enggo banci makeken kerina paksa alu mehuli guna bersaksi kerna keselamaten i bas Yesus Kristus. Termasuk tantangen pe ipakena jadi sada kesempaten guna nuriken kerna Yesus Kristus man kerina kalak.

Pengkenaina

Tema-nta “Nuriken kerna Yesus man Kerina Manusia” dalam rangka 135 tahun sehna Berita Si Meriah man kalak Karo (18 April 1890 i Buluhawar). Tema enda mulihi mereken semangat man banta guna erberita (Eta Erberita). Semangat penginjilan si ndube ilakoken kekelengenta Belanda nari (NZG), jemba kita guna rutang nuriken Berita Si Meriah man enterem kalak. Tapi mekatep si rusur jadi alasenta, la sieteh metode si tepat i bas kita nuriken kerna berita keselamaten i bas Yerus Kristus nari. Mbiar kita salah, terlebih statement “Kristenisasi.” Faktor si deban maka seh ngayak genduari, tetap denga jalan di tempat kita i bas kegiaten Marturia, erkiteken kisat kin, bahkan sama sekali kurang (la peduli). Si penting enggo kita terkelin. Seharusna, rutang pusuhta guna tetap nuriken Berita Si Meriah, seh iiket kambal-kambal e (bersaksi terus sampai Tuhan datang).

Tapi paling tidak, hal si sederhana banci silakoken guna meritaken Berita Si Meriah, ibenaken i bas jabunta. Mulai kitik-kitik nari sibabai, siajari anak-anakta guna nandai Yesus Kristus sebage Tuhan ras Juruselamatna. Bahkan kita sebage teladan si mehuli kerna nilai-nilai kekristenan si harus nggeluh i bas diri kalak si tek (gelah ula terjeng cakap saja). Ras terus ku keluarga besarta, adi lit denga si lenga nandai Tuhan i bas Yesus Kristus.

Si peduaken, gereja secara institusi harus memperkuat kiniteken perpulungen guna ietehna maka geluhna erkiteken Sola Gratia. Keselamaten ialoken secara gratis tapi labo gratisan. Keselamaten si enggo ialokenna harus teridah i bas geluhna tep-tep wari, ras kehadirenna maba syalom man sekelewetna. Gereja memperkuat umat guna semangat nuri-nuri kerna keselamaten i bas Yesus melalui pembinaan-pembinaan (Metode PI EE, jalur budaya, rsd.).

Secara pribadi, banci silakoken alu sharing man kalak si deban (IRT, PRT, teman kantor, jiran tetangga, rsd.) kerna pengalamen kinitekenta ras uga Tuhan erdahin i bas geluhta. Bahkan ertoto man kalak si deban si membutuhkan topangen doa i bas kita nari, termasuk si la sada kiniteken. Bahkan genduari, Tekhnologi Informasi si canggih enggo banci ipake dalam rangka kita meritaken Kabar Baik. Subuk media sosial (IG, Fb, X-Twitter, YouTube, TikTok, rsd.) guna berbagi firman Tuhan entah pe kata-kata motivasi si banci menginspirasi (memotivasi) kalak si deban. Entah pe erbahan Podcast bage pe video, tentang topik-topik geluh erkiniteken, sharing firman Tuhan ras ibagiken i channel YouTube entah pe platform si deban. Memang labo gampang i bas kita nurikeken kerna keselamaten i bas Yesus, tapi labo la banci. Pake kesempaten si lit, asum ibereken Tuhan denga kesempaten banta. Tuhanlah nampati kita i bas banci nuriken kerna keselamaten i bas Yesus Kristus subuk melalui kata ras perbahanen.