SUPLEMEN PA MORIA GBKP TGL. 16 - 22 MARET 2025

Pdt. Larena Sinuhadji (Nd. ReyRapha Tarigan)

Ekonomi, Pendidikan, Jabatan

Si Man Ogen : Kuan-kuanen 22:1-2

Tema : SERI PENGIDAH RAS PERBAHANEN

Tujun : Gelah Moria :

- Ngasup nuriken maka kiniliten e me pemere Dibata

- Ngataken bujur arah kai si lit i bas ia, janah makeken kinierbagen e guna ngerakut kiniersadan

Metode PA : Aksi

Penaruh

Lit sada lagu si akap kami sue ras tujun PA-ta sendah, judulna “Semua karena anugerahNya.” Lagu enda iciptaken sekalak pendeta si tergelar Pdt. Dr. Rahmiati Tanudjaja. Arah pergumulen geluhna tuhu-tuhu igejapkenna maka kerinana e me anugerah i bas Dibata nari. Bagenda syair laguna: “Bukan karena kebaikanmu. Bukan karena fasih lidahmu. Bukan karena kekayaanmu. Kau dipilih, kau dipanggilNya. Bukan karena kecakapanmu. Bukan karena baik rupamu. Bukan karena kelebihanmu. Kau dipanggil, kau dipakaiNya. Bila engkau dapat, itu karenaNya. Bila engkau punya, semua daripadaNya. Semua karena anug’rahNya. Dib’rikanNya pada kita. Semua anug’rahNya bagi kita. Bila engkau dipakaiNya.”

I bas PA-ta sendah radu ras mulihi kita erlajar kerna erkiniteken maka kerina si lit i bas kita e me anugerah i bas Dibata nari si harus sipakeken guna kemulian gelarNa.

Versi Audio silahkan klik : https://youtu.be/mBiJoF3RE5I

Mpebagesi Si Man Ogen

Bindu 22 dari Kitab Kuan-kuanen isina e me pedah-pedah ras persinget kerna erbage-bage persoalen si terjadi i bas kegeluhen si tep-tep wari, umpamana kerna kinibayaken, pendidiken ras moralitas. I bas konteks historis, bindu 22 enda itulis i bas paksa pemerentahen Raja Salomo kira-kira abad 10 SM. Secara teologis, bindu 22 fokus ku bas pentingna nggeluh alu kepentaren ras tanggung jawab i lebe-lebe Dibata. Pedah-pedah i bas bindu 22 enda ngajuk si ngogesa gelah nggeluh alu dem pertimbangen ras kepentaren i bas ngadapi erbage-bage godaan ras dalan-dalan si papak. Bindu 22 enda ngajuk si ngogesa gelah makeken kepentaren i bas Dibata nari sebage wujud nyata pentingna mehamat ras mbiar man Dibata.

Ay. 1 ikataken bagenda nina, “Gelar mehuli ergan kap asangken erta-erta, kekelengen kalak ergan asangken pirak ras emas.” I bas terj. TB-LAI Ed. 2 nina, “Nama baik lebih berharga daripada kekayaan besar; dikasihi orang lebih baik daripada perak dan emas.” Gelar si mehuli, entah pe nama baik, idatken arah karakter si mehuli, cara rukur si mehuli, pengerana si mehuli, bage pe perbahanen si mehuli. Kerina si mehuli si enggo ilakoken kalak banci jadi inget-ingeten si iterusken ku kesusurenta. Sedangken erta kebayaken banci lesap dalam sekejap. Bahkan erta-erta simelala banci sidatken arah kerja keras, integritas tapi banci ka arah hal si la mehuli umpamana nangko, korupsi. Ertina, kebayaken sidatken kita banci encedaken gelar ta ndai. Emaka ula ernalem man erta kebayaken doni enda. Ernalemlah man Dibata ulu kerina kiniulin. Kekelengen kalak ergan asangken pirak ras emas. Lit pe emas pirak tapi adi la lit kekelengen la lit ertina. Maka si pentingna i bas kegeluhen enda e me kekelengen; subuk kekelengenta man Tuhan ras kekelengenta man manusia.

Ay. 2 ikataken bagenda nina, “Kalak bayak ras kalak mesera lit perserina, TUHAN kap si nepasa.” I bas terj. TB-LAI Ed. 2 nina, “Orang kaya dan orang miskin memiliki kesamaan: TUHANlah yang menjadikan mereka semua.” Bayak ras musil e me kinata kegeluhen si terjadi nai nari seh asa gundari. I bas Pustaka Si Badia melala ayat si nuriken kerna kemusilen ras kebayaken. Adi sipelajari terbagesen tentu melala hal si menyebabken kemusilen bage pe kebayaken. Salah sadana i bas ogenta sendah, ikataken maka nina, Dibata si nepa kebayaken ras kemusilen. Kai tujun Dibata maka itepana kebayaken ras kemusilen? Tentu hanya Dibata si metehsa. Tapi Pustaka Si Badia rusur ngajuk kita kerina gelah mediate nandangi kalak si musil, janah berhati-hati nandangi erta kinibayaken doni. Si mehulina akap kami pemindon bagi si lit i bas Kuan-kuanen 30:7-9, “Ula pelepasNdu aku musil entah bayak. Berekenlah man bangku kai si kuperluken. Sebab kune bayak aku banci jadi maka la aku perlu Kam. Janah adi musil aku banci jadi nangko aku seh maka juru Dibatangku.” Kebayaken ras kemusilen banci mabai kita ndauh ras Dibata. Emaka akap kami ay. 2 enda ngajuk kita kerina gelah menerima kinata kegeluhenta uga litna, alu tetap ngataken bujur janah tetap erpengarapen man Dibata.

Pengkenaina

Tujun PA-ta sendah ngajuk kita kerina Moria gelah ngataken bujur i bas kerina si enggo idatken kita i bas kegeluhenta: prestasi, karir, jabatan, erta kinibayaken, rsd.-na. Erkiteken si e kerina semata-mata perkuah ate Dibata man banta, labo erkiteken gegeh beluhta. Alu bage mabai kita tetap mampu makeken karir, jabaten, erta ras si debanna si lit bas kita guna mpermuliaken Tuhan, erkiteken sigejapken bas Tuhan nari kap rehna. Tetap kita ngasup ngataken bujur ras mpermuliaken Tuhan secara khusus i bas kegiaten-kegiaten persekutuan si ilakoken i bas gerejanta. Terkadang si terjadi enggo lebih fokus kita man erta, jabaten, karir pemere Tuhan ndai asangken Tuhan si enggo masu-masu geluhta. Mari erlajar kita mengelola waktu-waktu si enggo ibereken Tuhan banta guna tetap lit waktu khusus guna ersembah ras ngataken bujur man Tuhan.

Kalak bayak ras kalak mesera aminna pe melala perbedaanna tapi seri Tuhan si nepasa. Alu bage la lit si banci nirangken kalak bayak ras mesera. Kalak bayak pe la banci meganjang ukur, ndigen sepele (meremehken) kalak si mesera. Sebalikna, kalak mesera pe la ka banci rendah diri, la lit terlibat i bas erbage-bage kegiaten si lit erkiteken merasa la lit si banci ibanggaken bas dirina, padahal adi sigargari melala ka talenta, gegeh, si banci ipakeken guna membangun dirina ras komunitas persekutuana. Si paling penting, uga makana banci kita saling mengasihi, saling mendukung i bas senang ras susah, saling melengkapi i bas kinierbagenta. Tuhan tetap ipermuliaken arah kegeluhenta.