SUPLEMEN PA MORIA GBKP TGL. 23 - 29 MARET 2025

Pdt. Larena Sinuhadji (Nd. ReyRapha Tarigan)

Status Sosial: Single Parent

Si Man Ogen : 2 Raja-raja 4:1-7

Tema : KEPATE I BAS KECIBAL TEMAN

Tujun : Gelah Moria :

- Nuriken uga Elisa kepate nandangi diberu balu-balu

- Terbuka ras kepate i bas perbeben geluhna

Metode PA : BGA & Aksi

Penaruh

Lit istilah “SMS”, ertina, Senang Melihat orang Susah, Susah Melihat orang Senang. Istilah e labo perlu ikembangken selaku kita kalak si erkiniteken. Sebalikna kita harus bersenang ketika orang senang ras kepate ukurna ngenehen kalak susah, ras asa gegeh ukurta sipenahangi beban geluhna. E me tandana kita keluarga (sada kula ni Kristus).

Arah bahanta sekali enda, mulihi kita ipersingeti gelah banci kehadirenta jadi berkat (pasu-pasu) man kalak si deban, secara khusus man diberu balu-balu. Ras Metode PA-ta sekali enda silakoken memakai metode BGA (Baca Gali Alkitab) alu genre narasi.

Mpebagesi Si Man Ogen

Pelayanen Elisa berlangsung lebih 50 tahun (853-798 SM). Sebage nabi Tuhan, Elisa ngelai i bas Kerajaan Israel Utara, i ja paksa si e hampir kerina raja-rajana mabai bangsa Israel nembah ku dibata-dibata si deban (“Baal” - 2 Raja-raja 2:1-8:15). Elisa ngasup ngelakoken tanda-tanda sengget bagi si ilakoken mentorna Elia ras enda nuduhkenca maka ia memang penerus Elia, sah sebage nabi Dibata.

Versi Audio silahkan klik : https://youtu.be/MnnjPgUu82I

Arah perikop enda, lit piga-piga hal penting si banci jadi pesan man banta (P3JT, subuk berupa pelajaran, perintah, peringatan, janji ras teladan):

1. Sebage anak-anak Tuhan, kita pe la terlepas i bas erbage perbeben. Bas perikop enda, e me sekalak diberu balu-balu, ija ndube perbulangenna bagin i bas terpuk nabi-nabi. Janah teks pe ngatakenca, maka ia sekalak si erkemalangen dingen mbiar man Dibata. Tapi i bas perbeben si ialamina, tehna ku ja ia harus lawes, ijumpaina Elisa (mindo penampat man Tuhan, alamat si tepat). Tuhan peduli ras mengerti i bas kerina persoalen si ialami kita, ras iberekenNa serpang pulah i bas waktuNa.
2. Taat ngelakoken perentah Tuhan, tanpa lit keraguna (protes). Taat, bagi ketaatan diberu balu-balu ndai, bage pe bagi si enggo idalanken diberu balu-balu asum isuruh Elisa pinjam guci lume man teman-temanna sada kuta. Alu patuh idalankenna bagi si ikataken nabi Elisa, i bas teks, ketaatan man perentah Tuhan e me kunci gelah banci ndatken pertolongenNa. Banci jadi Tuhan mereken kita kepentaren arah KataNa, nasehat arah teman (kemahen) Tuhan entah pe arah teman-teman sada persekutuanta.
3. Tuhan sanggup memakai sekecil apapun yang ada pada kita menjadi alatNya yang besar untuk menolong kita. Elisa nungkun man diberu balu-balu ndai, kai si lit i bas ia. Terkadang kita merasa, la lit kai pe si lit i bas kita. Tapi asum sigargari, Dibata ngasup ngelakoken tanda sengget si mbelin i bas geluhta. Emaka arus kita peka ngenehen kai si lit i bas kita.
4. Solusi pemena asum lit perbeben i tengah keluarga e me kiniersadan keluarga (keluarga tetap solid - utuh). I bas perikop, diberu balu-balu ndai tetap ersada arih memecahken persoalen ras anak-anakna.
5. Labo cukup hanya ertoto, tapi pe harus berusaha keras (berjuang keras) i bas ngalaken perbeben. Nina Elisa i bas ay. 3, “Pergilah, mintalah bejana-bejana dari luar, daripada segala tetanggumu, bejana-bejana kosong tapi jangan terlalu sedikit.” Ertina, harus berusaha (berjuang keras).
6. Termasuk pe, membangun komunikasi entah pe relasi si mehuli ras ise pe, subuk kade-kade, teman perpulungen, jiran tetangga, rsd. Diberu balu-balu i bas perikop memiliki hubungen si mehuli ras teman-temanna sada kuta, maka kerina mereken guci lume man Diberu ndai.
7. Ngasup mengelola keuangen alu mehuli (nina Elisa, “Dayaken kerina minak saitun e, jenari galari kerina utangndu. Lebihna e kari cukup denga man bekalndu nggeluh ras anak-anakndu”). Jelas Elisa mereken nasehat, galari utang maka sisana guna kebutuhen diberu e ras anak-anakna. Mekatep si terjadi, asum enggo lit sen, lupa kita guna mpelebeken si prioritas (kebutuhen pokok, bayar cicilan, rsd.), malah enggo leben itukurken ku hal-hal si la penting (keinginan).
8. Kepatuhen ras ketaaten diberu balu-balu man Tuhan ipalasi kinitekenna man Tuhan ras ia mengalami mujizat Tuhan.

Pengkenaina

Erbage-bage kondisi si ialami kita, secara khusus sebage nande i tengah-tengah jabu. Deba keluarga e kuh denga, deba enggo balu. Menjadi orang Kristen, termasuk kalak si erkemalangen man Tuhan, labo jaminen lepas i bas pergumulen. Tapi rikutken fiman Tuhan si jadi pengogeta, kalak si tetap mengandalkan Tuhan, ernalem man Tuhan, ras mau bekerja keras pasti ibereken Tuhan solusi (serpang pulah).

Setiap kita enggo ibereken Dibata kengasupen (talenta) si pelain-lain. Mari peka kita nandangi potensi si lit i bas kita, ras pakeken, berdayaken, guna membangun dirinta, keluarga, komunitasta.

Jadilah kita sebage Moria si banci kepate (berempati) nandangi kesusahen teman. Ula tambahi bebanna, alu kita ncakapkenca man jelma si enterem entah  pe menyepeleken masalah si sangana ialamina. Adi la banci kita mereken solusi, paling tidak, sitotoken temanta ndai gelah ngasup ras megegeh ia ngalaken perbebenna. Jadilah kita Moria si jadi pasu-pasu (berkat) man kalak si deban.