SUPLEMEN PA MAMRE GBKP TGL. 2 - 8 PEBRUARI 2025

Pdt. Larena Sinuhadji (Nd. ReyRapha Tarigan)

Teks : Roma 15:1-6

Tema : KERINA ERSADA MUJI DIBATA

Tujun : Gelah Mamre :

- Ngasup ngidah nilai si mehuli (kebayaken) i bas perbedan-perbedan si lit i bas kegeluhen

- Ncidahken kiniersadan ukur arah perbahanen si nyata sebage puji-pujin man Dibata

Penaruh

Erbahan kiniersadan e labo hal si murah sebab melala tantangenna. Rasul Paulus i bas pelayanenna rusur berhadapen ras persoalen kiniersadan i tengah perpulungen kalak si tek. Persoalen si rusur terjadi biasana erkaiten ras perbedaan suku entah pe budaya, perbedaan tingkat pendidiken, perbedaan kelas sosial, bage pe perbedaan tingkat ekonomi. I bas surat-suratna topik kerna kiniersadan rusur isingetken Paulus man perpulungen. I bas kesempaten enda radu ras kita erlajar kerna pergumulen i bas erbahan kiniersadan rikutken teks-ta sendah.

Versi Audio silahkan klik : https://youtu.be/4B5CUfn3ZyI

Mpebagesi Teks

Teks si jadi ogenta sendah termasuk ku bas bagin pendungi surat Roma, i ja Rasul Paulus mereken pedah-pedah si sifatna praksis. Praksis ertina, nilai-nilai yang diwujudkan dalam tindakan atau perilaku. Lit nilai penting si jadi palas tindakenta, umpamana, kita engkelengi kalak si deban labo terjeng engkelengi bage-bage saja, tapi lit palasna, e me erkiteken enggo leben sigejapken keleng ate Kristus i bas kegeluhenta.

I bas bindu 15 si jadi teks ogenta sendah, ilumbaken Paulus man perpulungen gelah mediate, sisampat-sampaten sada ras si debanna. Bage pe gelah perpulungen e nggeluh ersada guna muji Dibata. Man perpulungen si enggo megegeh kinitekenna harus nggit nampati perpulungen si merampek kinitekenna. I bas kita nampati tentu harus lit i bas dirinta kepedulian nandangi kalak si deban. I bas si e tentu biak-biak egois harus sibeneken. Harus lit kerelaan guna berkorban demi kalak si deban. I bas ay. 2 ikataken maka “Sekalak-sekalak kita harus mperdiateken temanta janah ngukuri kai si mereken kiniulin man bana gelah alu bage erteguhna kinitekenna.” Ngukurken kai si mereken kiniulin enda akap kami penting kel, sebab i jenda nilaina labo terjeng erpemere saja, tapi enggo siukurken mbages-mbages, apakah si ibereken kita e maba kiniulin entah sebalikna.

Ay. 3 ras 4 akap kami si jadi palas i bas kita mediate, nggit erkorban guna sisampat-sampaten sada ras si debanna. E me erkiteken Kristus enggo leben mediate janah nggit erkorban guna kiniulin kerina kalak si tek man Dibata. Tapi i bas kita mediate, nggit erkorban guna sisampat-sampaten e labo murah, melala tantangenna. Emaka ogelah Pustaka, sebab Kata Dibata i bas Pustaka Si Badia ngajari kita gelah megegeh ras sabar i bas erpengarapen man Dibata.

I bas ay. 5 ras 6 Rasul Paulus ngajuk perpulungen gelah nggeluh ersada. Ay. 5 i bas terj. TB-LAI Ed. 2 nina, “hidup yang sehati dan sepikir, sesuai dengan kehendak Kristus Yesus.” Ertina nggeluh ersada i jenda palasna e me ngusih Yesus Kristus. Tentu melala manfaat si idatken perpulungen adi nggeluh ersada. Si jadi fokus i bas ay. 6 e me guna muji memuliakan Dibata Bapa, Tuhanta Yesus Kristus. I bas terj. TB-LAI Ed. 2 nina, “dengan satu hati dan satu suara kamu memuliakan Allah dan Bapa Tuhan kita Yesus Kristus.” Ertina memuliakan Dibata i jenda konteksna e me i bas kerina pengkebet geluhta, labo terjeng i bas kita rende muji Tuhan i bas kebaktin-kebaktin.

Pengkenaina

PA-ta sendah i bas rangka semakin mpebagesi pengangkanta kerna sasaren pelayanen GBKP tahun 2025, “Dewasa menerima perbedaan.” Piga-piga poin penting i bas teks ogenta sendah si encidahken kedewasaan i bas menerima perbedaan, si pemena e me: mediate, nggit erkorban guna sisampat-sampaten sada ras si debanna. I bas kita sisampat-sampaten e labo terjeng nampati bage-bage saja, tapi enggo mbages siukurken kai si maba kiniulin man senina turangta si sada kiniteken. Adi si maba kiniulin e erbahanca senina turangta nembeh man banta, e harus tetap ilakoken. Umpamana, contoh senderhana, tersinggung senina turangta erkiteken la sibereken si ntabeh-ntabeh sangana reh senina turangta ndai ku rumahta. Padahal enggo siteh maka senina turangta ndai lit pinakit obesitas entah pe diabetes. E tetap harus silakoken guna kiniulin senina turangta. Enda baru ngerana kita kerna pangan inemen, lenga ka soal si terbelinen, ngelakoken kebenaren sue ras Kata Dibata. Umpamana, pengajuk gelah berperilaku berintegritas, persinget gelah ula korupsi, persinget gelah ula main judi, rsd.-na. Enggo pasti melala tantangenna.

Si peduaken, iajuk kita gelah nggeluh ersada guna memuliaken Dibata i bas kegeluhenta si tep-tep wari. Sibenaken lebe i bas dirinta, enggo nge kiniersadanta ras Kristus tuhu-tuhu terjalin alu mehuli? Sebab adi la kita ersada ras Kristus, la kita ngasup menerima perbedaan, janah la kita ngasup memuliaken Dibata arah pengkebet geluhta. Kiniersadan ras Dibata i bas Yesus Kristus banci terjalin alu mehuli arah pertotonta, bage pe erlajar Kata Dibata. Adi enggo kita ersada ras Kristus, kiniersadan harus siwujudken i bas jabuta sekalak-sekalak. Selaku bapa i tengah jabu, iajuk kita gelah maba keleng ate Kristus ku tengah-tengah jabu, mediate, kedamen bage pe keriahen, gelah seisi jabu si berbeda-beda pe banci nggejapken kiniersadan si maba kemulian Dibata. Adi enggo siwujudken i bas jabu, sibabalah semangat e ku tengah-tengah perpulungenta, gelah alu bage radu ras kita banci mewujudken tujun si pemena bage pe si peduaken i bas PA-ta sendah. Dibata si mpengasup kam kerina Mamre GBKP.