SUPLEMEN PJJ GBKP TGL. 7 - 13 JULI 2024

Pdt. Larena br. Sinuhadji (Nd. ReyRapha Tarigan)

TETAP UKUR GUNA NAMPATI - 1 Raja-raja 17:8-24

[GBP GBKP - Tata Nilai : Kasih]

Penaruh

Adi lit umpamana kalak si nampati kita, banci sigejapken uga penampat kalak e man banta, apakah ilakoken alu meriah ukur entah terpaksa. Penampatna e ilakoken alu maksimal entah pe setengah-setengah. Tentu melala sebab engkai kalak entah pe kita nampati alu terpaksa, entah pe setengah-setengah. Mungkin lit kebiaren i bas kita erkiteken si lit i bas kita pe labo bias. Lit ka kalak si memang karakterna pelit, lit pe i bas ia tapi la ia nggit rugi sitik pe. I bas kesempaten enda erlajar kita arah diberu balu-balu i kuta Sarpat kerna tetap ukur guna nampati.

Mpebagesi Ogen 

Turi-turin kerna Elia ras diberu balu-balu i kuta Sarpat akap kami enggo semal man banta kerina. I bas perikop ay. 1-7 ituriken kerna Kata Dibata si isehken man Raja Ahap erkelangken nabiNa Elia nina, “I bas gelar TUHAN, Dibata si nggeluh, Dibata Israel si kusembah, kukataken man bandu maka i bas dua entah telu tahun si reh la lit embun entah udan ndabuh, pala kusuruh.” Adi rikutken bindu 16:30 ikataken maka Raja Ahap e me si erdosa man TUHAN lebih asa kerina raja-raja si leben asa ia. Janah i bas bindu 18:18 ikataken maka Ahap enggo ngguluti Israel erkiteken ilanggarna perentah TUHAN janah isembahna dibata-dibata Baal. I bas si e iteh kita maka bencana perlego si nialami bangsa Israel e erkiteken dosa si ilakoken Raja Ahap. Judul i bas perikop bindu 17:1-7 nina “Elia isampati TUHAN sanga perlego” ras judul i bas perikop bindu 17:8-24 si jadi ogenta sendah nina “Elia nampati diberu balu-balu”. Perikop e duana nuriken kerna kegeluhen i bas kiniseran si idalani Elia ras diberu balu-balu erkiteken bencana perlego.

I bas bindu 17:1-7 ituriken maka Dibata nampati Elia i tepi lau Kerit alu kak si maba roti ras daging guna ipan Elia. Tapi erkiteken seh kel hebatna bencana perlego ndai, kerah me lau mbelin si lit i bas sungai Kerit. Erkiteken si e isuruh Dibata Elia njumpai diberu balu-balu i Sarpat (bindu 17:8-24), sebab enggo iperentahken Dibata diberu balu-balu ndai mere Elia man. Kenca jumpa Elia ras diberu balu-balu ndai janah ipindona inemen ras sitik roti, ngaloi diberu balu-balu ndai nina, “I bas gelar TUHAN Dibatandu si nggeluh tuhu kukataken man bandu maka la lit roti i bas aku, seakatan sengkerauk tepung tare mangkuk ras sitik minak tare botol. Enda kupepulung sitik ranting man babanku mulih ku rumah gelah banci kutasakken pangan si sitik e man bangku ras man anakku. E me pengkeri-kerinna kami man, janah kenca e mate la man me kami”. Lit kearun ate i bas diberu balu-balu kenca enggo isuruh Dibata nampati Elia, la ia tek maka Dibata si njayam kegeluhenna.

Respon si berbeda icidahken Elia, tek ia nandangi kuasa Dibata. Kenca ipetetap ukur Elia maka tek diberu balu-balu enda ndai, janah ilakokenna kerina si isuruh nabi Elia. Seh i bas ay. 16 siakap la lit nari persoalen, sebab si jadi kearun ate diberu balu-balu ndai la terbukti janah ia ras anakna bage pe nabi Elia banci denga nggeluh erkiteken icukupken TUHAN kebutuhenna i bas bencana perlego. Kepeken lit denga ka “bencana” si deban, sakit mekelek anak diberu balu-balu ndai janah mate. Bagenda nina diberu balu-balu man Elia, “O suruh-suruhen Dibata, engkai maka bage perbahanndu man bangku? Kerehenndu ku jenda erbahanca inget Dibata ka mulihken dosa-dosangku, erkiteken si e mate anakku”. Enda respon si peduakaliken diberu balu-balu i bas ngadapi bencana, isalahkenna nabi Elia. Respon si berbeda icidahken nabi Elia, ertoto ia man Dibata gelah ipegeluh mulihi anak si mate ndai. Kenca enggo ipegeluh Dibata mulihi anakna erkelangken nabi Elia, nina diberu balu-balu i bas ay. 24, “Genduari kueteh kam suruh-suruhen Dibata, janah tuhu-tuhu TUHAN ngerana arah kam!” Respon si petelukaliken diberu balu-balu enda ndai kenca enggo nggeluh mulihi anakna, tuhu-tuhu tek ia nandangi TUHAN.

Versi Audio Silahkan Klik : https://youtu.be/E-67KUtDdys

Pengkenaina

Gundari enggo kurang lebih setengah tahun sidalanken tema GBKP tahun 2024 “Berkarya dan berguna untuk orang lain.” Penungkunen evaluatif man banta kerina, enggo seh i ja pengangkanta kerna tema enda janah enggo seh i ja silakoken tema enda? Arapenta tentu enggo iangka kita tema enda alu mehuli janah enggo sidalanken tema enda leben i tengah jabu, i tengah-tengah gereja bage pe i tengah-tengah masyarakat inganta tading. Nampati kalak si deban e me salah sada bentuk konkrit berkarya dan berguna untuk orang lain. I bas kesempaten enda erlajar kita arah diberu balu-balu Sarpat nari, i ja nampati kalak si deban e labo hal si murah guna silakoken.

Arah diberu mbalu Sarpat nari erlajar kita maka si pemena, ise pe kita banci nampati kalak si deban. La perlu bayak lebe maka nampati. La perlu erpangkat lebe maka nampati. La perlu jadi serayan lebe maka nampati. Kerina kalak si tek enggo ibereken Dibata perentah gelah nampati ras sisampat-sampaten (bdk. Gal. 6:2). E maka situhuna i bas kita kalak si tek la nari lit alasen la nampati kalak si deban.

Si peduaken, lit kearun ate i bas diberu balu-balu kenca enggo isuruh Dibata nampati Elia, la ia tek maka Dibata si njayam kegeluhenna. Tapi kenca enggo ipetetap ukur Elia maka tek diberu balu-balu enda ndai, janah ilakokenna kerina si isuruh nabi Elia. Lit kearun ate i bas kita nampati kalak si deban e akap kami hal si wajar. Si la wajar, enggo pe ipetetap ukur alu Kata Dibata, tetap denga kita la tek nandangi kuasa Dibata si mbelin, siandalken gegeh beluhta. I bas si e marilah siusih Janda Sarpat enda, kenca enggo ipetetap ukur alu Kata Dibata mis tek ia, la nari iandalkenna logikana, tek ia nandangi kuasa Dibata janah isampatina Elia alu tetap ukur.

Si peteluken, erlajar kita arah Elia nari. Situhuna banci saja kenca enggo besur mis lawes Elia. Tapi mediate denga Elia nandangi diberu mbalu ndai si mate anakna. Isampati Elia diberu mbalu ndai alu ertoto gelah ipegeluh Dibata mulihi anakna. Rusur terjadi i bas geluhta, kenca enggo isampati kalak kita, enggo lanai siinget kiniulin kalak si enggo nampati kita. Arah Elia erlajar kita maka kita pe harus ngataken bujur ras siap nampati adi teman si enggo nampati kita datken kesusahen.

Si peempatken, kuasa Dibata la terbatas i bas nampati anak-anakNa si kesusahen. Arah kai pe Dibata ngasup nampati kita. I bas ogenta sendah, ipake Dibata rubia-rubia guna nampati Elia. E maka i bas si e tetaplah erpengendes man Dibata sebab Dibata ngasup nampati kita i bas kerina perbeben geluhta.

Si pelimaken, PJJ sendah ikaitken ras Tata Nilai Kasih. Palasta i bas nampati alu tetap ukur e me keleng ate Dibata i bas Yesus Kristus. E maka i bas kesempaten enda itulisken kami mulihi kerna Tata Nilai Kasih sue si ras si lit i bas Buku GBP GBKP. Mari sirenungken ras silakoken uraian kerna Tata Nilai Kasih enda.

Kasih adalah pelayanan yang bersumber dari sifat dan ajaran Tuhan Yesus yang intinya dalam praktek adalah mengasihi Tuhan dan mengasihi sesama (Matius 22:37-39; Yohanes 13:35; 1 Korintus 13:4-7).

Panduan perilaku:

• Senantiasa memuji, memuliakan dan bersyukur atas kebaikan Tuhan

• Selalu berusaha sedapat mungkin membawa damai, menyenangkan sesama dan menjadi berkat bagi orang lain.

Kata kunci:

• Puji Tuhan

• Bersyukur

• Rendah hati (murah hati)

• Mengampuni

• Sopan dan ramah

Kalimat afirmasi:

“Kami insan GBKP mengasihi Tuhan dan mengasihi sesama dengan segenap hati, jiwa dan akal budi”.

Perilaku yang dianjurkan:

• Rendah hati, murah hati, sabar

• Sopan dan ramah

• Mau mengampuni kesalahan orang lain

• Suka menolong orang lain tanpa mengharapkan balasan

Dibata si mpengasup kita nampati kalak si deban alu tetap ukur.