SUPLEMEN PA MORIA GBKP TGL. 28 JULI - 3 AGT. 2024

Pdt. Larena br. Sinuhadji (Nd. ReyRapha Tarigan)

Jadi Pasu-pasu Man Unit GBKP

Si Man Ogen : Jakup 2:1-5

Tema : BAYAK I BAS KINITEKEN

Tujun : Gelah Moria :

- Nuriken orat nggeluh kalak si bayak i bas kiniteken

- Erbahan terpuk perbahanen si rayo-ayo ras si la rayo-ayo

Metode PA : Aksi (nampati Unit Pelayanen GBKP)

Penaruh

Lit istilah “Kalak bayak maka niayak.” Istilah enda muncul erkiteken lit perbedaan perlakuan si biasa ilakoken man kalak bayak ras kalak mesera. Sebage contoh, bas kerja-kerjanta nereh empo, ‘di kenca reh kalak bayak minter enterem kel kalak si ngalo-ngalo ia, subuk sukut bage pe anak beru. Ndauh-ndauh nari pe enggo enterem si ngayakisa. Tegunna sebage anak beru pe, labo siakap dalih siban ia kundul bas amak mbentar. Kebalikenna, ‘di kenca kalak si biasa-biasa (mesera) si reh, kurang mengayak sukut e ngalo-ngalosa, walaupe kalimbubu si reh. Sikap si bage, labo pas ras perlu ipelimbarui. Aturenna, kalak kai pe, subuk bayak ras mesara, seri pengidah ras perlakuanta bana. Bahkan aturenna, lebih mediate kita man kalak si mesera baban geluhna.

I bas PA Moria-nta sekali enda, mpersingeti kita gelah banci seri pengidahta man kerina kalak, terlebih-plebih peduli kita man kalak si mesera baban geluhna.

Mpebagesi Pengangkan Kerna Ogen

Surat Jakup tergolong surat umum, i ja la ialamatken man sada-sada perpulungen si khusus. Rikut bindu 1:1; 2:9,21; maka surat enda bena-benana itujuken man kalak Kristen Yahudi si tading i darat Palestina. Banci jadi si ngaloken surat enda e me kalak Kristen mula-mula si bertobat ras kenca Stevanus mate secara martir, merap marpar erkiteken penganiayaan (bdk. Perb. Rasul 8:1). Janah inti i bas surat enda e me kiniteken harus teridah i bas perbahanen (Jak. 2:17). Ras tujunna, gelah kerina perpulungen nggeluh i bas kegeluhen si payo rikutken si ngena ate Tuhan.

Judul perikop si jadi renungenta “Ula rayo-ayo” (bhs. Ind.: “Jangan memandang muka”). Tegas Jakup mpersingetisa perpulungen, selaku kalak si tek man Tuhan Yesus, gelah ula rayo-ayo. Perlakuan si berbeda erkiteken status sosial si berbeda. Adi reh ku perpulungen sekalak bayak, make cincin emas, ruisken uis mejile; bage pe reh ka sekalak musil, uisna merigat-rigat. Janah hamaten kita man kalak si mejile uisna alu kita ngatakenca, “Mari, ku tengah kam kundul,” tapi si musil sipelepas tedis entah pe ninta, “Arah duru enda me kundulken.” Firman Tuhan Tuhan jelas ngatakenca, “Salah kam. Rayo-ayo kam, dingen perbahanendu e erpalasken sura-sura si la mehuli.” Perbahanen si rayo-ayo enda enggo jelas ncedai pusuh temanta si mesera geluhna. Janah enggo pasti erpalasken sura-sura si la mehuli (lit motivasi si la mehuli). Gelah banci sada paksa waktu, ersemulih kalak bayak e man banta, cari muka, banci jadi perban mbiarna.

Kai si ilakokenna e ndai bertentangen ras Firman Tuhan. Seharusna kita lebih peduli man kalak si mesara. I bas ay. 5 ipilih Dibata kalak musil i bas doni enda gelah bayak i bas kinitekenna. Ia me pagi dat bagin ngenanami kemalemen ate i bas Kinirajan si ipadanken Dibata man kalak si erkeleng ate man baNa. Kai dasarna? Sabab kalak musil tuhu-tuhu pengendesenna man Tuhan saja,  ipindokenna kel penampat bas Dibata. Ku Dibata ngenca ia erpengendes (bdk. Lasarus si musil ras kalak bayak - Luk. 16:19-31). Labo erkiteken musilna ia masuk surga, tapi kerembakenna man Tuhan. Kalak bayak enda pe, labo erkiteken kinibayakenna masuk neraka, tapi perban la ia bayak i lebe-lebe Dibata, kurang peduli man kalak si mesera. Kalak si rayo-ayo labo hanya melanggar hukum si utama ras pertama e me ngkelengi kerina manusia, tapi pe erdosa man Tuhan.

Versi Audio silahkan klik : https://youtu.be/-N73NbSI6ek

Pengkenaina

Tema i bas PA Moria-nta sendah “Bayak i bas kiniteken.” Melala kel istilah bayak i bas kita kalak Karo. Bayak kade-kade, bayak kiniliten, bage pe bayak kiniteken.  Bayak kade-kade enggo jelas, enterem kade-kadenta dingen mengkade-kade kita. Bayak kiniliten, melala erta benda sipepulung kita, e me: sen, emas, tapak, rumah, kendaraan, rsd. Sedangken bayak kiniteken, kalak si tuhu-tuhu nggeluh erkemalangen man Tuhan ras teridah buah kinitekenna arah tetap ndalanken kebenaren Firman Tuhan, nggeluh i bas kebujuren, melumbar mere rikutken pasu-pasu si ibereken Tuhan bana. Kalak si bayak kiniliten lenga bo tentu bayak i bas kiniteken. Sedangken kalak si bayak i bas kiniteken, kurang pe kinilitenna, tetap ngasup ia ngataken bujur i bas kerina dampar geluhna ras iusahkenna geluhna jadi pasu-pasu man kalak si deban, rikutken kai si banci iberekenna (gegeh, perukuren, motivasi, rsd).

Gerejanta GBKP tetap ngelumbaken untuk peduli nandangi unit-unit pelayanen si lit: PPOS, PAK Gelora Kasih, YKPD Alpha Omega. Selain si e, lit khusus ibahan Liturgi Minggu rikutken unit pelayanen dalam rangka penjemaaten, guna tetap terus ilumbaken mereken penampat man unit-unit pelayanen si lit. Bage pe secara khusus, i bas Kategorial Moria, ibahan anggaren khusus guna nampati pelayanen man teluna unit pelayanen enda. I bas si e marilah sitingkatken kualitas ras kuantias anggarenta guna nampati pelayanen i bas unit-unit pelayanen enda.

Secara pribadi pe perlu sievaluasi dirinta, seh i ja nge perlakuan (sikapta) man kalak. Apakah kita termasuk kalak si rayo-ayo, entah seri pengindahta kalak bayak ras mesera? Bahkan aturna man kalak si mesera lebih mbue siban perhatianta erkiteken kondisi kegeluhenna. Kata Dibata si jadi oratenta sendah mengubahken kita gelah keleng ateta man kerina kalak la rayo-ayo, dingen bayak kita i bas kiniteken. Kesah Dibata si nampati kita.