SUPLEMEN PA MORIA GBKP TGL. 7 - 13 JULI 2024

Pdt. Larena br. Sinuhadji (Nd. ReyRapha Tarigan)

Moria Jadi Pasu-pasu Man Anak (Psikologi - Parenting)

Si Man Ogen : Ulangen 6:4-9

Tema : MEREKEN PENGAJAREN I BAS KERINA PAKSA

Tujun : Gelah Moria :

- Nuriken isi pengajaren kalak Israel man anak-anakna

- Mbiasaken diri nehken kata ajar man anak-anak

Metode : Ceramah Parenting - Nonton Bareng

Penaruh

Lit kuan-kuanen si rusur sibegi kita, “Kasih ibu sepanjang masa, kasih anak sepanjang galah.” Ertina, keleng ate sekalak nande la lit batasna, sedangken keleng ate sekalak anak terbatas. I bas kuan-kuanen enda asumsinta tentu nande si ikataken i bas kuan-kuan e sekalak pernanden si luar biasa pengorbanenna guna kiniulin anak-anakna. Termasuk je enggo maksimal ia i bas mendidik ras pebelin-belin anak-anakna. Tapi i bas kinatana, melala denga nande si mengabaikan pengajaren-pengajaren si mehuli man anak-anakna, sebab dekahen er-medsos, selfie-selfie ras healing-healing.

I bas kesempaten enda mulihi kita erlajar kerna pola asuh si mehuli man anak-anakta. Janah rikutken bahan PA Moria enda, iarapken Moria-moria GBKP masuk ku bas kelompok ibu si kasihna sepanjang masa.

Mpebagesi Si Man Ogen

Si man ogenta sendah biasa isebut syema i bas bahasa Heber nari e me pengakun kiniteken kalak Israel kerna TUHAN Dibata si sada (esa). Kata “syema” i bas Alkitab TB-LAI iterjemahken “dengarlah”, i bas Alkitab BIMK iterjemahken “ingatlah,” i bas Pustaka Si Badia iterjemahken “ingetlah,” maknana pengakun kiniteken e labo terjeng iteh, sibegiken ras siinget, tapi tuhu-tuhu sitamaken ku bas pusuh perukuren janah arus lit buktina alu perbahanen (kerja entah pe karya) si nyata i bas kegeluhen si tep-tep wari. E maka i bas ay. 5-6 ikataken Musa nina, “Kelengilah (kata kerja aktif) TUHAN Dibatandu asa ukurndu, asa tendindu, asa gegehndu lit. Ola ndigan pe lupaken (seri ertina ras “ingetlah” e pe kata kerja aktif) kerina perentah-perentah si kubereken sendah man bandu.”

Pengakun kiniteken kerna TUHAN Dibata si sada enda arus siwarisken orang tua man anak-anakna alu ngajarkenca ras ngingetkenca rusur (berulang-ulang) setiap wari (ay. 7). Secara praktis pengakun kiniteken enda arus isuratken (dituliskan) i bas kertas kitik si itamaken ku bas kotak kitik (bhs. Ibr. tefilim) si iiketken bas tan si kawes ras perdempaken (phylactery : tali sembahyang), janah arus ka isuratken i bas binangun pintun rumah ras i babo pintu gerbang gelah tuhu-tuhu jadi persinget (ay. 8-9). I bas perkembangen selanjutna terjadi degradasi makna i bas pesan awal si isehken Dibata nari arah Musa man bangsa Israel, piah dungna pengakun kiniteken enda terjeng kebiasaan menghapal ngenca si la lit pengaruhna ku bas pusuh ras perbahanen bangsa Israel. Yesus Kristus i bas Mat. 22:34-40; Mrk. 12:29-30; Luk. 10:25-37 mpelimbarui makna pengakun kiniteken enda alu penekanen si utamana e me i bas ngkelengi (kata kerja aktif) Dibata (Ul. 6:5) ras ngkelengi manusia (Im. 19:18), “kerina Undang-undang agama si ibereken Musa ras nabi-nabi erpalasken duana perentah enda ndai kap,” nina Yesus.

Versi Audio Silahkan Klik : https://youtu.be/_gyfARPAyHc

Pengkenaina

Tema ras tujun i bas PA-ta sendah mulihi ngingetken kita kerna tugas tanggung jawabta i bas mendidik anak-anak. Sekolah si pemena ras si utama anak-anakta e me i rumah. Guru si pemena ras si utama anak-anakta e me kita orang tuana. Ertina sekolah ras gereja hanya pelengkap pendidiken man anak-anakta. Janah pendidiken e labo terjeng pendidikan kognitif, tapi pendidiken e sifatna komprehensif mencakup erbage-bage kecerdasan: kognitif, psikomotoris, spiritual, mental, sosial, psikologis, rsd. Ertina adi siandalken sekolah formal ras gereja saja, e ndauh dari kata cukup. Ogenta sendah mereken teladan man banta i ja orang tua tuhu-tuhu bertanggung jawab i bas pendidiken anak-anakna, khususna pengajaren-pengajaren kerna erkiniteken man Dibata. 

Tentuna hal konkrit si banci terus-menerus ilakoken orang tua e me sada lebe bapa  ras nande arus sehati sepikir, ersada arih, i bas mereken pengajaren si mehuli man anak. La banci hal si ilarang bapa tapi iperbolehken nande man anak. Sabab e, erbahanca anak-anak mengalami kebingungen. Peduaken, ilakoken ibadah keluarga, si penting lit waktu ras-ras guna banci erlajar kerna Kata Dibata. Anak-anak ilibatken guna ngoge Pustaka ras ertoto secara bergiliren. Adi lenga terban setiap wari, sada minggu dua kali ban. Si petuluken, selain mereken pengajaren si mehuli, orang tua harus jadi role model rikutken kai si enggo iajarkenna man anakna. Hal enda sue rikutken kata pepatah si ngatakenca, “satu perbuatan lebih berarti dari pada seribu kata-kata tanpa perbuatan.” Si peempatken, orang tua (nande) harus terus erlajar menjadi nande si peduli, perhatian man anakna gelah anak-anakta banci ndeher ras nggit terbuka man banta. Sebab melala genduari anak-anak ndeheren ku teman-temanna ras nggit terbuka man temanna asangken man orang tuana. Si pelimaken, tetap sibaba ku bas toto sebab anakta e, anak Tuhan, kita perpanjangen tan Tuhan ngenca si harus tetap mindo penampat bas Dibata nari. Sipindoken kepentaren, kesabaren ras kekelengen i bas Dibata-nta nari. Ras si peenamken, sebage orang tua harus pembelajar, sebab genduari ilmu parenting (pengasuhan anak) enggo melala kel banci sidatken kita, subuk arah google entah webinar-webinar gratis. Tuhan-lah tetap nampati kita i bas banci nehken kata ajar si mehuli man anak-anakta i bas kerina dampar, gelah benaken kitik-kitik nari enggo terbiasa ngeluh erkemalangen man Tuhan.