SUPLEMEN PA MAMRE GBKP TGL. 21 - 27 JULI 2024

Pdt. Larena br. Sinuhadji (Nd. ReyRapha Tarigan)

Ogen : Kejadin 24:3-8; 67

Tema : PENGAJAREN KERNA PERJABUN SI PAYO

Tujun : Gelah Mamre :

1) Meteh sura-sura Abraham kerna perjabun Ishak

2) Nuriken pengajaren si payo man anak, kerna perjabun selaku kalak Karo ras kalak Kristen

Penaruh 

Adi ngerana kita kerna perjabun, maka perjabun e prakarsa (inisiatif) i bas Dibata nari (Kej. 2:18, “La mehuli adi manusia e nggeluh sisada-sisada. Kubahanlah teman si cocok man bana, guna nampati ia.”). Janah adi tema ngatakenca “Pengajaren kerna perjabun si payo,” berarti lit perjabun si la payo. Ikataken perjabun si la payo, maka: si pemena perjabun si la ipasu-pasu  (di luar Tuhan). Si peduaken perjabun i bawah umur. Si peteluken perjabun si sumbang selaku kita kalak Karo. Alu bage arah PA Mamre sendah ibabai kam kerina Mamre sebage orang tua ngasup mereken pengajaren si payo man anak-anak rikutken kinitekenta sebagai kalak Kristen bage pe budayanta kalak Karo.

Mpebagesi Pengangkan Kerna Ogen

Sara ndehara Abraham, nande Ishak, mbaru saja mate (bindu 23:1) janah Abraham enggo seh kel tuana. Emaka isuruhna suruh-suruhenna si metuana, si ngurus kerina erta-ertana, e me Elieser, gelah banci idaramina diberu man Ishak anakna. Alu syarat, si pemena, la banci ibuat diberu Kanaan (sebab labo pasangen si seimbang rikutken Ul 7:3-4, sebage umat si enggo iserapken Tuhan maka salah sada perentah man bangsa Israel la banci erjabu ras kalak Kanaan si banci erbahanca kalak Israel nilah i bas Tuhan nari jenari nembah man dibata-dibata si deban). Ras si peduaken, idaramina i bas kade-kade Abaraham nari tapi Ishak sendiri la nari banci mulih ku Ur-Kasdim adi la pagi nggit si nguda-nguda e nadingken rumahna ngikut Elieser ku Kanaan. Erkiteken Tuhan sendiri enggo nuruh Abaraham lawes nandingken kutana ras kade-kadena ras ibereken Tuhan taneh Kanaan man Abaraham ras kesusurenna. Sope berkat Elieser ndalankenna misi arah tuanna nari, maka ibahan Abaraham sumpah i ja iamparkenna tanna i kelang-kelang paha Abraham. 

Elieser tuhu-tuhu ndalankenna tugas enda alu mehuli ras dem tanggung jawab, ras tetap ia ersukuten man Tuhan si isembah Abaraham alu pertoton. Banci siidah i bas  piga-piga ayat si ncidahken Elieser tuhu-tuhu ersukuten man Tuhan. Si pemena, ay. 12, “Ertoto suruh-suruhen ndai nina, “O, TUHAN, Dibata tuanku Abraham, bahanlah maka seh sura-surangku sendah, janah ingetlah padanNdu ras tuanku Abraham.” Si peduaken, ay. 26, “E maka erjimpuh suruh-suruhen e nembah ia man TUHAN. Si peteluken, ay. 27, “Nina, “Terpujilah TUHAN, Dibata tuanku Abraham, si tetap nteguh ncikep perpadanenNa ras tuanku Abraham. Enggo ibabai TUHAN aku pinter ku kade-kade tuanku.” Si peempatken, ay. 56, “Tapi nina suruh-suruhen e, “E ola kal ambati aku. Enggo ibere TUHAN maka sangap perdalanenku, e maka berelah aku mulih ku tuanku.”

Kisah enda berakhir happy ending, erkedungen alu mehuli. Tuhan naruhken Elieser ku kade-kade Abraham, e me Betuil ras anakna si dilaki Laban turangna Ribka  (bindu 23:20, Betuil e me kap anak Nahor senina Abraham). Gayung bersambut, subuk Ribka bage pe orang tuana menahang ukurna guna nehi sura-sura Abraham, kerna perjabun anakna. Ribka ras Ishak pe singenan (labo terpaksa), Ribka jadi ndehara Ishak. Teks ngatakanca, maka ngena kel ate Ishak man Ribka, janah erkiteken si e terapul ia, aminna gia nandena enggo mate. 

Versi Audio silahka klik : https://youtu.be/sycnLou-WAk

Pengkenaina

Arah bahan PA Mamre enda, maka enggo jelas tanggung jawab orang tua nehken pengajaren kerna perjabun si payo man anak-anak. Piga-piga hal si banci ilakoken Mamre: si pemena, mpersingeti man anak gelah tetap ndarami teman geluh si sada kiniteken, bahkan kalak si tutus erkemalangen man Tuhan (bdk. 2 Kor. 6:14, “Ola kam nggit teriket i bas sada pasangen ras kalak si la tek man Tuhan. Ja nge banci kebenaren erkongsi ras kejahaten! Ja nge banci terang ersada ras gelap?”). Terlebih ola min sempat anakta ka si pindah kinitekenna erkiteken perjabun. Emaka penting, terus-menerus ipersingeti gelah ndarami teman geluh si sada kiniteken. Hal enda prinsip, dingen la banci ikompromiken. Konsekuensina, anak-anakta benaken kitik-kitik nari babai geluh erkemalangen man Tuhan, cinta Tuhan, rajin ku gereja ras terlibat i bas dahin-dahin pelayanen.

Si peduaken, adi kalak Karo, ula erteman ras si semerga (perjabun sumbang). Hal enda cukup panjang lebar ijelasken i bas bahan bimbingen PA Mamre. Sebab gerejanta pe la ipasu-pasu ‘di kenca perjabun sumbang (bdk. Tager GBKP Bab XI Ps. 42. Poin 6, “Perkawinan kawin sumbang (semerga) yang dilarang adat, tidak dapat diberkati dalam GBKP.”

Si peteluken, i bas proses ndalanken pertemanan, mulai berpacaran seh ku bas perjabun arus tetap ijaga maka mehuli perdalanenna.

Si peempatken, orang tua la banci memaksaken kehendak i bas ndarami teman geluh man anakna, sebab labo nari genduari jaman Siti Nurbaya. Orang tua banci mpeseh sura-surana man anak kerna teman geluh anakna tapi orang tua la banci memaksakan kehendak. Ssbab ‘di kenca lit persoalen i bas jabuna, enggo pasti orang tua si isalahken.

Si pelimaken, tentuna i bas si enda, si pentingna kel orang tua (Mamre) harus tetap maba i bas pertoton, gelah bagi Elieser i bas ndarami jodoh man Ishak tuhu-tuhu ipasu-pasu Tuhan.
Si terakhir mari radu ras sipelajari Konfesi GBKP kerna perjabun kalak si tek i bas konteks GBKP, gelah semakin mbages pengangkanta sebage orang tua. I teruh enda ibahan kami Konfesi GBKP BAB XI kerna “Perkawinan.”

Kami percaya, bahwa: 

• Perkawinan adalah ikatan perjanjian antara laki-laki dan perempuan di hadapan Allah dan di hadapan jemaat. Perkawinan merupakan anugerah Allah yang harus dipelihara dalam kekudusan (Kej. 2:18;24). Oleh karena itu, perkawinan Kristen bersifat monogami dan tidak dapat diceraikan oleh manusia kecuali oleh kematian (Mat. 19:6).
• Perkawinan yang kokoh dibangun di atas iman kepada Allah Bapa, AnakNya Yesus Kristus dan Roh Kudus, oleh karena itu perkawinan terjadi antara laki-laki dan perempuan yang sama-sama Kristen  (2 Kor. 6:14). 
• Perkawinan merupakan ikatan yang kudus dan anugerah Allah kepada manusia, maka perkawinan itu harus dijalani dengan ucapan syukur dan penuh tanggung jawab.
• Laki-laki dan perempuan yang memutuskan untuk berumah tangga, wajib terlebih dahulu menyatakan pengakuan dan perjanjian kesetiaan mereka kepada Allah dan terhadap jemaat di dalam kebaktian pemberkatan perkawinan.
• Makna perkawinan adalah sebagai media (wadah) karya keselamatan Allah (Kej. 12:2; Mat. 1:18). Allah senantiasa campur tangan di dalam kehidupan keluarga dan melalui kehidupan tersebut Allah mewujudkan karya keselamatanNya. Dengan demikian, perkawinan yang berkenan kepada Allah adalah perkawinan yang dilaksanakan untuk kemuliaan Allah.