SUPLEMEN PJJ GBKP TGL. 14 - 20 JULI 2024

Pdt. Larena Sinuhadji (Nd. ReyRapha Tarigan)

MEJINGKAT ERDAHIN GUNA NAMPATI - Perb. Rasul 20:32-35

[Erguna Man Kalak Si Deban Arah Usaha Dana]

Penaruh

I bas Wikipedia si nuriken kerna “Etos Kerja Protestan,” ikataken bagenda nina, “Mengingat keselamatan adalah anugerah, umat Protestan memandang pekerjaan sebagai tugas penatalayanan yang diberikan kepada mereka. Jadi, orang-orang Protestan tidak bekerja untuk mencapai keselamatan tetapi memandang bekerja sebagai sarana yang dapat mereka gunakan untuk menjadi berkat bagi orang lain. Kerja keras dan berhemat dianggap sebagai dua penerapan penting dalam mengelola apa yang telah Tuhan berikan kepada mereka.” Tulisen enda ncidahkenca maka i bas kiniteken kalak si tek, erdahin labo terjeng guna ncukupken kebutuhen geluh entah pe guna diri sendiri, tapi guna jadi pasu-pasu man kalak si deban bage pe guna kemulian gelar Dibata.

I bas kesempaten enda erlajar kita arah Paulus nari kerna mejingkat erdahin guna jadi pasu-pasu man kalak si deban.  

Mpebagesi Ogen

Ogenta sendah lit i teruh judul perikop “Kata-kata perpisahan i bas Paulus nari man Pertua-pertua i Epesus.” Kenca enggo pembarken Berita Si Meriah kerna Yesus Kristus sebage Tuhan ras Juruselamat i piga-piga ingan i Propinsi Asia (Epesus, Makedoni, Akaya, Troas, Miletus) iterusken Rasul Paulus perdalanenna ku  Jerusalem. Sope berkat ku Jerusalem Miletus nari, idilo Paulus Pertua-pertua Epesus guna nehken kata-kata perpisahan.
Lit piga-piga pesan penting si isehken Rasul Paulus man Pertua-pertua Epesus. Tapi i bas kesempaten enda hanya fokus ku bas ay. 32-35. I bas ogenta sendah Rasul Paulus mereken teladan man Pertua-pertua Epesus erkaiten ras hal-hal si sifatna materi i bas pelayanen. I bas dahin-dahin pelayanen si ilakonenna, khususna i bas dahin meritaken Berita Si Meriah, labo idarami Paulus kinibayaken entah pe keuntungen secara materi. Amin pe situhuna i bas kapasitas ras jabatenna sebage rasul, banci nge idatkenna kinibayaken entah pe keuntungen secara materi. Tapi la ilakokenna. Sebalikna justru Paulus mejingkat erdahin guna keperlun geluhna ras teman-temanna bage pe guna nampati kalak musil.

Rikutken Perb. Rasul 18:3 itulisken maka dahin sampingen Paulus e me erbahan tenda. Ikataken dahin sampingen (part time) erkiteken dahin utamana e me meritaken Berita Si Meriah. Enda akap kami penafsiren si logis, sebab erbahan tenda e labo hal si murah si banci idungi 1 entah 2 jam. Butuh waktu berhari-hari guna erbahan sada tenda. Adi dahin utama Paulus erbahan tenda, enggo pasti la lit waktu i bas ia guna er-Berita Si Meriah. Ertina banci ikataken enggo lanai lit waktu si terbuang pecuma i bas kegeluhen Paulus sebab i tengah-tengah kesibuken dahinna sebage per-Berita Si Meriah, adi lit sitik waktu luang, i je maka ipakekenna erbahan tenda, guna idayaken entah pe guna media pelayanenna er-Berita Si Meriah. I jenda nari tentu turah penungkunen, apakah Paulus la ngaloken hakna sebage sekalak rasul? Rikutken 2 Kor. 11:8-9 Paulus ngaloken tunjangen arah perpulungen-perpulungen nari guna keperlun geluhna bage pe guna keperlun pelayanenna. Tapi i bas si e, labo lit paksaan i bas perpulungen-perpulungen mereken dukungen materi, kerinana ibereken perpulungen alu sukarela ras meriah ukur.

Jadi kai maksudna i jenda mejingkat Paulus erdahin? Si pemena maksudna jelas maka Paulus labo kalak perkisat. Paulus labo kalak si milih-milih dahin. Janah Paulus labo tipe kalak si suka menunda-nunda pekerjaan. Kai pe dahin si lit i lebe-lebena mis idahikenna alu tutus ras mejingkat. I bas waktuna er-Berita Si Meriah, mis idahikenna alu tutus ras mejingkat. I bas waktuna melayani perpulungen, mis idahikenna alu tutus ras mejingkat. I bas waktuna erbahan tenda, mis ibahanna alu tutus ras mejingkat. Labo nggit Paulus jadi beban perpulungen i bas ia ndahiken dahin pelayanenna bage pe guna ncukupken keperlun geluhna. Apai ka memanfaatken jabatenna guna mpepulung kinibayaken.

Si peduaken, rikutken Fil. 4:11-13 & 1 Tim. 6:8 jelas maka beluh Paulus mengelola kiniliten materi alu mehuli seh makana finansial si lit i bas ia banci ipergunaken secara efektif ras efisien guna pelayanen bage pe guna keperlun geluhna. Selain beluh ia mengatur kinilitenna, Paulus pe beluh mengatur waktu alu mehuli seh makana la lit waktu si terbuang percuma.

Si peteluken, tek Paulus maka Dibata pasti ncukupken kerina keperlun geluhna (bdk. Fil. 4:19). Akap kami enda si jadi palas kiniteken maka pang Paulus ngatakenca i bas ay. 35 nina, “Malemen kap ate mere asangken ngalo.” Ertina i jenda semakin jelas karakter Paulus si independen, labo nggit ia bergantung man kalak bayak, apai ka mindo-mindo guna keperlun geluhna bage pe guna pelayanenna. Bahkan ngasup ia mereken penampat man kalak si deban si membutuhken penampat.

Versi Audio Silahkan Klik : https://youtu.be/6NxoSmTip5I

Pengkenaina

Arah Paulus radu ras kita erlajar piga-piga hal kerna erdahin. Si pemena, harus lit i bas kita pemahamen erpalasken kiniteken maka kerina si lit i bas kita e me anugerah Dibata man banta, labo erkiteken gegeh beluhta. Prestasi, keduduken, jabaten, pendahin, rsd. I bas si e harus kita ngataken bujur man Dibata. Janah teklah adi ernalem kita man Dibata, pasti icukupkenNa kerina kebutuhen geluhta.

Si peduaken, mejingkat bagi Paulus i bas ndahiken kai pe dahin si ipercayaken Dibata man bana. Mejingkat ertina labo perkisat, la milih-milih dahin, janah la menunda-nunda pekerjaan. Kai pe dahin si lit i lebe-lebeta mis sidahiken alu tutus ras mejingkat. I bas waktuna erdahin bas kantor, erdahinlah alu tutus ras mejingkat. I bas waktuna melayani i Gereja, layanilah alu tutus ras mejingkat. I bas waktuna pulung ras keluarga, pulunglah alu meriah. Rsd.

Si peteluken, beluh mengelola kiniliten materi alu mehuli seh makana finansial si lit i bas kita banci sipergunaken secara efektif ras efisien guna keperlun geluhta, bage pe guna nampati kalak si deban. Selain si e, iajuk kita gelah beluh mengatur waktu alu mehuli seh makana la lit waktu si terbuang percuma.

Erdahin alu mejingkat ras tutus akap kami e me tugas tanggung jawabta selaku kalak si enggo ngaloken keselamaten i bas Yesus Kristus. Kita erdahin labo terjeng sebage bentuk tanggung jawab atas anugerah si rehna i bas Dibata nari. Kita erdahin erkiteken ngusih Dibata. Dibatanta si isembah kita erdahin lalap, labo saja i bas IA nepa doni ras kerina isina, tapi seh ngayak gundari pe ikawali ras isampatiNa kita (bdk. Joh. 5:17). PJJ-ta sendah mulihi ngingetken kita kerna misi Dibata i bas pendahinta e me guna kemulian gelarNa (soli Deo gloria) ras guna jadi pasu-pasu man kalak si deban. Ulih pendahinta tuhu-tuhu memuliaken gelar Dibata erkiteken idahiken alu mejingkat ras tutus, janah ulih pendahinta pe banci jadi pasu-pasu man kalak si deban si membutuhken penampat.