SUPLEMEN PA MAMRE GBKP TGL. 28 JULI - 3 AGT. 2024

Pdt. Larena br. Sinuhadji (Nd. ReyRapha Tarigan)

Teks : Epesus 4:24-28

Tema : ERDAHIN ALU MEHULI RAS NAMPATI

Tujun : Gelah Mamre :

1) Meteh erdahin alu mehuli ncariken keperlun

2) Ncariken keperlunna alu tutus i bas erdahin ras nampati

Penaruh

Sekalak penyair Libanon nari si tergelar Kahlil Gibran pernah nulisken sada puisi bagenda nina, “Kerja adalah bentuk cinta yang terwujud nyata. Dan jika kita tidak sanggup bekerja dengan rasa cinta. Maka lebih baik kita meninggalkannya, mengambil tempat di depan rumah ibadah, lalu meminta sedekah dari mereka yang bekerja dengan penuh sukacita.” Puisi enda akap kami ngajuk kita gelah tutus erdahin, ula sempat jadi pemindo-mindo erkiteken kisat erdahin. I bas kesempaten enda mulihi kita erlajar kerna erdahin alu mehuli janah ulihta erdahin banci sipergunaken guna nampati kalak si membutuhken penampat.

Mpebagesi Teks

Lit dua judul perikop, ay. 1-16 lit i teruh judul “Kiniersadan kula.” I bas perikop enda, iajuk Paulus perpulungen gelah reh dewasana i bas erkiniteken man Dibata alu nggeluh ersada ras Kristus. Makeken kerina pemere-pemere Kesah Si Badia guna dahin pelayanen majekken kula Kristus. Ay. 17-32 lit i teruh judul “Kegeluhen si mbaru i bas Kristus.” I bas perikop enda, iajuk Paulus perpulungen gelah nangtangi karakter geluh manusia si male. Kai saja karakter geluh manusia si male e? Rikutken ay. 17-19 nina, la nandai Dibata, la erguna perukurenna, gelap pengertinna, bodoh, mersik ukurna, la meteh mela, jahat sura-surana, janah ilakokenna kerina si la mehuli alu la alang-alangen. I bas ay. 20-24 iajuk Paulus perpulungen gelah tuhu-tuhu makeken kerina si mehuli si enggo ipelajarina kerna Kristus guna mpelimbarui geluhna si tep-tep wari. Entah pe proses internalisasi nilai-nilai Kristus i bas kegeluhen si tep-tep wari. Gelah i bas si e terbentuk karakter geluh si mbaru rikutken peraten Dibata i bas Yesus Kristus. I bas ay. 24 ikataken, “kegeluhen si tuhu-tuhu adil dingen badia.”

I bas ay. 25-32 itulisken Rasul Paulus contoh-contoh praktis karakter-karakter si mbaru ndai. Rikutken ogenta sendah ibatasi hanya seh ay. 28, e me: nuriken si tuhu-tuhu entah pe jujur (ay. 25); ngasup engkuasai diri entah pe labo pedas merawa (ay. 26-27); ras erdahin alu mehuli guna ncukupken keperlun geluhna bage pe guna nampati kalak si lit i bas kepiceten (ay. 28). Secara khusus i bas PA-ta sendah fokus kita ku bas ay. 28 kerna erdahin alu mehuli. Lit dua hal si menarik i bas ay. 28 enda. Si pemena, erdahin alu mehuli ikaitken ras karakter manusia si male e me nangko. Ertina paksa si e mungkin melala kalak Kristen si dahinna nangko denga, seh makana iajuk Paulus gelah ula nai nangko. Dahin sebage penangko enda mungkin dahin si murahna guna memenuhi gaya hidup hedonis si populer paksa si e i bas budaya Yunani. Emaka i bas si e, ngajuk Paulus gelah nadingken budaya si la mehuli e, sebab erdahin alu mehuli e termasuk ku bas karakter manusia si mbaru i bas Kristus. Si peduaken, dahin si mehuli e ikaitken ras nampati kalak i bas kepiceten. Ertina lit tanggung jawab sosial i bas dahin si mehuli si idahiken perpulungen, khususna guna nampati sapih-sapih perpulungen si membutuhken penampat.

Versi Audio silahkan klik : https://youtu.be/og68e6n40bU

Pengkenaina

Tema ras tujun i bas PA-ta sendah mulihi ngajuk kam kerina Mamre gelah erdahin alu mehuli, tutus, penuh tanggung jawab, dem alu pengataken bujur man Dibata arah kai pe profesindu. I bas si e mulihi kam isingetken maka, si pemena, profesi kai pe si idahikenndu genduari e me Dibata si mpercayakenca man bandu. Emaka ula lupa ngataken bujur man Dibata.

Si peduaken, rikutken ogenta sendah isingetken mulihi gelah ula sempat Mamre dabuh ku bas budaya hedonis ras instan. Budaya hedonis ras serba instan erbahanca kita kisat erdahin. Menginginkan kaya mendadak tanpa bekerja keras. E maka genduari melala kalak si ndabuh ku bas judi online ras pinjaman online erkiteken ingin kaya tanpa bekerja keras. Emaka erbintuaslah kam erdahin. Kai pe profesindu genduari dahikenlah alu tutus ras mehuli, sebab e termasuk karakter manusia si mbaru i bas Kristus. Ertotolah gelah ipengasup Dibata kam ngaturken ulih pendahinndu guna keperlun geluh si tep-tep wari, janah teklah maka Dibata si ncukupken kerina keperlun geluhta.

Si peteluken, i bas ulih pendahinta lit tanggung jawab sosialta guna nampati kalak si membutuhken penampat. Emaka i bas PA-ta sendah mulihi kam kerina Mamre iajuk gelah semakin meningkatkan kualitas ras kuantitas i bas erpemere man kalak si membutuhken penampat. I bas si e ertotolah kam gelah ipengasup Dibata jadi Mamre si erpemere alu mehuli. Dibata si masu-masu kam kerina Mamre GBKP.