SUPLEMEN PA MORIA GBKP TGL. 21 - 27 JULI 2024

Pdt. Larena br. Sinuhadji (Nd. ReyRapha Tarigan)

Moria Jadi Pasu-pasu Man Sangkep Nggeluh

Si Man Ogen : Rut 4:13-16

Tema : MABA KERIAHEN MAN SANGKEP NGGELUH

Tujun : Gelah Moria :

- Nuriken perbahanen Rut nandangi sangkep geluhna

- Nuriken perbahanen si maba keriahen man sangkep geluh

Metode PA : Menginventarisasi perbahanen si mehuli

Penaruh

Adi sisungkun kam kerina senina Moria, apai si ipilihndu, jadi beban nandangi sangkep geluh, entah jadi pasu-pasu si maba keriahen sangkep geluh? Tentu jawabenndu jadi pasu-pasu si maba keriahen sangkep geluh. Tapi mekatep si terjadi tanpa sisedari, kita enggo jadi beban nandangi sangkep geluhta. Rusur sibegi turi-turin ndehara entah pe pernanden si besar pasak daripada tiang, boros nggeluhna, i japa pe lit utangna guna nukur kai pe demi ncidahken gaya hidup mewah. Piah dungna, enggo melimber takal perbapan guna nggalari utang-utang ndai. Lit pernanden i bas jaman gundari enda enggo dekahen er-medsos, engkeriken kuota, sementara urusen rumah tangga ras anak-anak enggo terbengkalai. Lit ka pernanden si tutusa erdahin, piah dungna la lit waktuna guna mperdiateken perbulangen ras anak-anak. Lit ka pernanden si bocor, kerinana ibelaskenna man ise pe, piah dungna la maba kemelan man sangkep geluh. Enda akap kami contoh-contoh ndehara entah pe pernanden i bas konteks jaman gundari enda si labo maba keriahen nandangi sangkep geluhna.

I bas kesempaten enda radu ras kita erlajar arah Rut nari, i ja kegeluhenna tuhu-tuhu jadi pasu-pasu, maba keriahen, man sangkep geluhna.

Mpebagsi Si Man Ogen

Turi-turin kerna Rut akap kami enggo rusur sibahas i bas PA-PA Kategorial bage pe PJJ. Ertina ratana kita enggo meteh turi-turin kerna Rut enda tangtangna nari seh pendungina. Ogenta sendah e me bagin pendungi Kitab Rut si berakhir bahagia. Happy ending. Piga-piga tokoh entah pe karakter i bas Kitab Rut enda e me Elimelek, Naomi, Mahlon, Kilyon, Orpa, Rut, ras Boas. Elimelek e me perbulangen Naomi. Mahlon ras Kilyon e me anak-anak Elimelek ras Naomi. Orpa ndehara Kilyon, ras Rut e me ndehara Mahlon. Elimelek sada jabu pindah ku Moab erkiteken terjadi kelehen si mesangat i Betlehem. Kenca enggo seh Moab, la ndekah, mate Elimelek, Mahlon, ras Kilyon. Tading Naomi, Orpa ras Rut. Amin pe enggo mate perbulangenna, Orpa ras Rut tetap setia mendampingi Naomi bibina. Tapi akhirna, Orpa mulih ku orang tuana kalak Moab. Rut terus mendampingi Naomi seh mulih ku kutana Betlehem.

Amin pe beda kiniteken ras budaya, Rut si kalak Moab (gundari wilayah negara Yordania), nggit erkorban nadingken kinitekenna, keluargana, ras budayna guna ngikutken kiniteken ras budaya Naomi si kalak Yahudi. I bas Rut 1:16, ikatakenna, “Ola suruhndu aku nadingken kam bibi! Raslah kita berkat. Ku ja kam lawes, ku je aku, i ja kam ringan i je aku ringan. Bangsandu jadi bangsangku, janah Dibatandu jadi Dibatangku.” Enda akap kami pernyataan si penting i bas Rut nari, banci ikataken pengakun kiniteken Rut nandangi Dibata si isembah Israel. Enda hal penting si pemena adi ngerana kita kerna jadi pasu-pasu ras maba keriahen man sangkep geluhta. Harus leben kita erkiniteken man Dibata, sebab Dibata ulu pasu-pasu ras keriahen si tuhu-tuhu.

Tapi sope kita ngerana terdauhen kerna Rut, seh i jenda teridah tuhu-tuhu peran Naomi i bas mereken teladan si mehuli man permain-permainna seh makana tanpa ragu sedikit pun itadingken Rut kerinana guna ngikutken Naomi. Kehadiren Naomi tuhu-tuhu jadi pasu-pasu ras maba keriahen man Rut, si mungkin lenga pernah inanamina sope jumpa ia ras Naomi bibina.

Si peduaken, Rut sekalak pernanden si mejingkat ras mediate nandangi sangkep geluhna. I bas bindu 2 ituriken erdahin Rut i juma Boas pepulung gandum ras ngemo. Si e kerina ilakokenna guna memenuhi kebutuhen geluh ia ras bibina si tep-tep wari. Lang banci saja si Rut enda kem saja i rumah nimai ulih pendahin Naomi, tapi si e la ilakokenna. Rut mediate nandangi kebutuhen geluh keluargana, emaka mejingkat ia erdahin. Enda akap kami teladan si banci siusih, sebab kalak si mejingkat ndahiken dahin kai pe si lit i lebe-lebena tentu jadi pasu-pasu ras maba keriahen nandangi sangkep geluhna.

Si peteluken, Rut sekalak si meteruk ukur. Kenca enggo erjabu ras Boas, situhuna banci saja Rut enda memanfaatken erta kinibayaken Boas guna kepentingen dirina, tapi si e la ilakokenna. Amin pe erjabu ia ras kalak bayak ras terhormat i tengah-tengah masyarakat Betlehem, tetap denga ia meteruk ukurna. Kiniteruken ukur Rut enda banci jadi teladan man banta adi ateta nggit kita jadi pasu-pasu ras maba keriahen man sangkep geluhta.

Si peempatken, rikutken ogenta sendah, Rut e me sekalak si perkeleng. Amin pe Naomi semetua Rut, tapi tuhu-tuhu keleng ate Rut nandangi bibina bagi ia engkelengi nande bapana. Janah keleng ate Rut enda teridah i bas kegeluhenna si tep-tep wari seh makana isaksiken diberu-diberu si deban si jadi jiran Naomi. I bas ay. 15 ikataken bagenda nina, “Keleng kel ate permainndu man bandu, janah enggo lebihen perbahanenna man bandu asangken pitu anak dilaki.” Ertina luar biasa kel keleng ate Rut nandangi sangkep geluhna. I bas si e labo kemamangen adi kesusuren Rut enda jadi raja Israel si termasyur sepanjang sejarah, e me Raja Daud. Enda pe akap kami banci jadi usihen man banta adi ateta nggit kita jadi pasu-pasu ras maba keriahen nandangi sangkep geluhta. 

Versi Audio Silahkan Klik : https://youtu.be/h6HuP6FDpco

Pengkenaina

Tema ras tujun PA-ta sendah ngajuk kerina kita Moria GBKP gelah jadi pasu-pasu ras keriahen man sangkep geluh. Sibenaken i bas keluarga inti lebe. Penungkunen evaluatif man banta, enggo nge kita jadi pasu-pasu ras maba keriahen nandangi perbulangen ras anak-anak i rumah? Adi enggo, tentu perlu tetap sievaluasi ras sitingkatken kuantitas ras kualitasna. Adi lenga, tentu PA-ta sendah jadi pembelajaren man banta gelah kita jadi pasu-pasu ras maba keriahen man perbulangen bage pe anak-anak. I bas si e tentu harus nggit kita berkorban, sebab ateta me gayung bersambut, perbulangen ras anak-anak pe jadi pasu-pasu ras maba keriahen man banta. Tapi i bas kinatana, maun-maun labo e si terjadi, enggo pe kita berkorban, tapi perbulangen ras anak-anak la jadi pasu-pasu ras la maba keriahen man banta selaku pernanden. I bas kesempaten enda iajuk kita gelah tetap terus jadi pasu-pasu ras maba keriahen man isi jabu.

Kenca enggo kita jadi pasu-pasu ras maba keriahen nandangi isi jabuta, siterusken ku sangkep geluhta. Sangkep nggeluh adi rikutken Kamus Karo Indonesia ertina: kelengkapan hidup, yaitu: kalimbubu, sembuyak, dan anak beru. Emaka kai pe si ilakoken kita nandangi sangkep geluhta, marilah siusih Rut i bas ia jadi pasu-pasu ras maba keriahen man sangkep geluhna. I jenda iulihi kami, si pemena lebe, harus kita tutus erkiniteken man Dibata ulu pasu-pasu ras keriahen. Si peduaken, harus mejingkat ras mediate. Si peteluken, harus meteruk ukur. Si peempatken, harus dem alu keleng ate nandangi sangkep geluhta.
I bas GBP GBKP lit Tata Nilai Kekerabatan si akap kami penting guna ngingetken kita mulihi alu arapen semakin mpeteguhi tekadta jadi pasu-pasu ras maba keriahen nandangi sangkep geluhta. 

Deskripsi:
Saling peduli dan menghargai perbedaan dalam membangun kerja sama tim pelayanan yang sinergis (Yoh. 15:13-15; 1 Kor. 13:5-10).

Panduan Perilaku:
• Menghargai setiap orang apapun latar belakangnya
• Memberi kesempatan kepada berbagai pihak untuk berkontribusi
• Terbuka dalam bekerja sama untuk menghasilkan nilai tambah
• Suka menolong orang lain
• Membangun lingkungan kerja yang kondusif

Kata-kata kunci:
• Peduli (caring)
• Perbedaan (diversity)

Kalimat afirmasi:
“Kami saling peduli dan menghargai perbedaan dalam membangun kerja sama tim yang sinergis”

Perilaku yang dianjurkan:
• Saling membantu dan mendukung sesama insan organisasi dan masyarakat
• Menghargai ide, pendapat, maupun saran orang lain
• Mengingat kontribusi setiap orang dari berbagai latar belakang yang berbeda-beda
• Bersinergi untuk mencapai tujuan bersama

I bas si e marilah sikembangken tata nilai kekerabatan i bas kegeluhenta si tep-tep wari baik i tengah-tengah jabu, bage pe sangkep geluhta, rikutken tema ras tujun PA-ta sendah. Dibata si mpegegehi kita.