SUPLEMEN PA MAMRE GBKP TGL. 2 - 8 AGT. 2026

Pdt. Larena Sinuhadji

Nandai Persekutuan Mamre

Ogen : Kejadin 5:21-24

Tema : NGGELUH I BAS PERSADAN RAS DIBATA

Tujun : Gelah Mamre :

1) Ngasup nuriken kerna Enoh i bas persadanna ras Dibata

2) Nuriken penandaina kerna persekutuan Mamre

Metode : Sosialisasi Persekutuan Mamre

Penaruh

Tema i bas PA-nta sendah ngajuk kam kerina Mamre gelah nggeluh reh ersadana ras Kristus sebab kiniersadaan ras Kristus sangat menentukan kedewasaan rohani Mamre. Engkai maka bage? Hubungenta si ndeher ras Kristus hanya Dibata ras kam ngenca si metehsa. Kalak si ngidah arah ndarat nari banci salah pengidahna. Siakap ndeher ras Kristus, enggo dewasa kinitekenna, kepeken hanya tampak luar belaka, sementara si la teridah dem alu dendam, kebencian, iri hati, rsd.-na. Arah pengerana ras perbahanen pe banci kalak salah menilai. Siakap palasna keleng ate Kristus kepeken palasna hanya moralitas umum entah pe adat istiadat. Emaka i bas kesempaten enda, radu ras mulihi kita erlajar kerna kiniersadaan ras Dibata i bas Yesus Kristus, sekaligus sievaluasi kiniersadanta ras Kristus sedekah enda.

Mpebagesi Ogen

Perikop ogenta sendah nuriken kerna Enoh anak Jaret, i ja tupung umurna 65 tahun tubuh anakna dilaki, si tergelar Metusalah. Enoh e me kesusuren Adam si peenemken. Kenca tubuh anakna Metusalah Enoh nggeluh i bas persadan ras Dibata 300 tahun dekahna. Labo melala cataten si banci sidat kita kerna tokoh Enoh enda. Si jelas, umurna ndauh beda ras 5 kalak si idatasna, si rata-ratana nggeluh datas 800 tahun. Sedangken Enoh nggeluh 365 tahun ngenca dekahna. Tapi si mbedakenca, kidekah ia nggeluh tetap ia erdalan i bas dalan Dibata seh ia la nari teridah perban iangkat Dibata.

Kegeluhen Enoh si singkat (adi sibandingken ras kerina si idatasna), banci jadi kesaksin i bas Padan Si Mbaru. Heber 11:5-6 ngatakenca, maka Enoh nggeluh i bas kiniteken, kehidupannya berkenan kepada Allah. Erkiteken kiniteken nge maka ngasup Enoh ndalanken si sentudu bagi si ngena ate Dibata. Bage pe i bas kitab Judas 1:14-15, Enoh menentang dosa ras kejahaten ras mberitaken ukumen man kalak si la bertobat.

Nggeluh i bas persadan ras Dibata (“hidup bergaul dengan Allah,” i bas bhs. Heber “halak,” atau berjalan terus-menerus dengan Allah). Terjemahen versi Septuaginta nina, “menyenangkan Allah.” Uga pengertin nggeluh i bas persadan ras Dibata? Litna kerembakenna ras Tuhan (memiliki hubungan pribadi yang intim dengan Tuhan). Masmur 1:2 , Lukas 11:28, matuhi Firman Tuhan ras ngukurisa ras ndalankenca i bas kegeluhenna, ertoto, bersekutu ras teman-teman sada kiniteken. Tetap ia ernalem man Tuhan. Si ngena ate Dibata idalankenna, kebalikenna si erbanca la ngena ate Dibata la idalankenna.

Ulih i bas kerembakenna ras Tuhan, la ia mate tapi iangkat Dibata. Berbeda ras kalak si idatasna, isuratken mate. Enoh la ngalami kematen fisik tapi iangkat Dibata. Bahkan adi siidah kesusuren Enoh pe ipasu-pasu Tuhan. Metusalah me manusia si gedangna nggeluh (969 tahun), Lameh si tercatat i bas ay. 29, maka anakna mereken kemalemen ate man manusia ras Tuhan, sebab i bas kelatihenna erdahin ngusahai taneh si enggo isumpahi Tuhan, tubuh anakna si tergelar Nuah. Nuah kalak si ngena ate Tuhan dingen iselamatken Tuhan i bas banjir si mbelin nari, sebab ia pe erdalan i bas dalan Dibata. Ertina, kalak si erkemalangen man Tuhan, kesusurenna pe tetap ipasu-pasu Tuhan (Masmur 112:2). Erdalan ras Dibata erbahanca tetap kita nggejapken perkuah ate Tuhan subuk i bas kegeluhenta bage pe kematenta.

Versi Audio silahkan klik : https://youtu.be/Tes3EctrQqg

Pengkenaina

Kai si idalanken Enoh patut jadi usihen man banta, khususna man kam kerina Mamre, i ja tetap alu konsisten ia ngerembaken dirina ras Tuhan, nggeluh ersada ras Tuhan seh ngayak ia iangkat Tuhan. Ras enda penting nggeluh i bas dirinta, terlebih i bas jaman gundari enda si mbue kel godaan ras tantangen. I ja adi la megegeh kinitekenta banci kita terbawa arus jaman, bahkan kita ka mabai kalak nggeluh i bas si la mehuli. Terlebih kegeluhen kalak si tek harus maba terang, jadi pasu-pasu (berkat) ku sekelewetna, ibenaken i bas jabuna, terus ku pendahinna, pergaulenna i tengah masyarakat, bage pe i tengah-tengah Gereja Tuhan.

Konsistensi, kesetian guna nggeluh ersada ras Tuhan, labo gampang. Sebab, banci erkiteken erbage-bage hal erbahanca la nari kita nggeluh ersada ras Tuhan (kesibukan, kemalasan, kesuksesan, kineseran, tantangen, rsd.). Banci kita nggeluh rembak ras Tuhan, ersada ras Tuhan erkiteken kiniteken si enggo ibereken Tuhan banta arah perkuah ateNa. I bas tetap kita banci njagai nggeluh i bas erkiniteken man Tuhan maka ibereken Tuhan keselamaten man banta. Bage pe i bas kegeluhenta si tep-tep wari ipasu-ipasu Tuhan tetap geluhta, iberekenNa damai sejahtera terus ku anak ras kempunta.

Penungkunen evaluatif man banta, enggo nge sedekah enda kita konsisten, setia nggeluh ersada ras Dibata i bas Yesus Kristus? Adi enggo, puji Tuhan! Sitotoken terus gelah Dibata mpengasup kam kerina Mamre nggeluh ersada ras Dibata si teridah arah pengkebet geluhndu. Adi lenga, mari radu ras kita ertekad nggeluh ersada ras Dibata arah ketutusenta ertoto, erlajar Kata Dibata, ikut muat bagin i bas dahin-dahin pelayanen, rsd.-na. Khususna i bas PA-nta sendah si lit sosialisasi kerna Persekutuan Mamre, mari radu ras kita ikut muat bagin i bas kerina dahin-dahin pelayanen Mamre si enggo iprogramken i bas Runggunta masing-masing. Gelah alu bage kinieradanta ras Dibata banci igejapken Mamre-mamre si deban, sikeleng-kelengen sada ras si debanna, saling menopang, saling memotivasi, mediate sada ras si debanna. Dibata si mpengasup kam kerina Mamre GBKP.