SUPLEMEN PJJ GBKP TGL. 26 MEI - 1 JUNI 2024

Pdt. Larena Sinuhadji (Nd. ReyRapha Tarigan)

NGGELUH I BAS SURA-SURA DIBATA (1 Petrus 1:13-16)

Penaruh

Mungkin pernah sioge filosofi Tiongkok nari, “Yin Yang.” Antusenna kurang lebih bagenda, “Prinsip Yin dan Yang dari filsafat Tiongkok adalah bahwa segala sesuatu ada sebagai dua hal yang saling bertentangan dan tidak dapat dipisahkan. Contoh kekuatan berlawanan YinYang adalah: perempuan - laki-laki, gelap - terang, tua - muda, termasuk je akap kami, kekuatan kebaikan dan kekuatan kejahatan si saling tarik-menarik. I bas kekristenan pe lit pemahamen tarik-menarik antara kecenderungen guna ngelakoken si mehuli sue ras peraten Dibata, biasana iistilahken alu “sura-sura Kesah Dibata,” ras kecenderungen guna ngelakoken si jahat alu istilah “sura-sura daging.” Salah sada perbeben kalak si tek i bas Gal. 5:24 ras Kol. Kol. 3:5 e me ngelawan kerincuhen entah pe sura-sura daging.

I bas kesempaten enda radu ras kita erlajar kerna nggeluh sue ras sura-sura Dibata erpalasken ogenta sendah.

Mpebagesi Ogen

Surat Petrus si pemena ialamatken man kalak Kristen si merap i belang-belang bagin utara Asia Kitik. I bas surat enda kalak Kristen igelari “bangsa pilihen Dibata.” Tujun surat Petrus si pemena enda e me mpegegehi ukur si ngogesa si sangana iayak-ayak dingen ngenanami kiniseran erkiteken kinitekenna man Yesus. Guna si e, Petrus ngingetken kalak si ngoge suratna e nandangi Berita Si Meriah kerna Yesus Kristus, i ja kematenNa, kekekenNa, ras kerehenNa, si enggo ipadankenNa mereken pengarapen man banta kerina. Erkiteken si e, kalak si tek la banci lang harus megenggeng i bas kiniseranna, sebab kiniseran e sada pengujin nandangi kinitekenna si sejati, janah la banci lang kerina kalak megenggeng ngaloken pemere asum kerehen Yesus si peduakaliken. Janah kerina kalak si tek iajuk alu mesangat gelah nggeluh bagi kalak si enggo jadi sikerajangen Dibata i bas paksa kesusahen.

Ogenta sendah lit i teruh judul “Kegeluhen si mbaru man anak-anak Dibata” i bas terj. Alkitab TB-LAI Ed. II nina, “Kekudusan dan kasih persaudaraan.” I bas ogenta sendah, iajuk Rasul Petrus kerina perpulungen si sangana ngenanami kiniseran si mberat, gelah, si pemena, tetap erpengarapen nandangi pasu-pasu si pagin ibereken Dibata sanga kerehen Yesus si peduakaliken. Tapi i bas erpengarapen e labo terjeng kem saja, entah pe pasrah, menyerah pada keadaan. Iajuk Petrus perpulungen gelah tetap nikapken ukur ras metenget (waspada) katawari pe. “Sikapken ukur” i bas terj. BIMK nina, “hendaklah kalian siap siaga.”

Si peduaken, perpulungen imotivasi gelah tetap erkemalangen man Dibata, ngikutken sura-sura Dibata alu nggeluh badia. I bas terj. BIMK nina, “Taatlah kepada Allah, dan janganlah hidup menurut keinginanmu yang dahulu, pada waktu kalian masih belum mengenal Allah. Sebaliknya, hendaklah kalian suci dalam segala sesuatu yang kalian lakukan, sama seperti Allah yang memanggil kalian itu suci.” I bas ay. 14 ras 15 lit kesan tersirat maka lit perbeben si mberat i bas diri perpulungen antara nggeluh ngikutken sura-sura daging entah nggeluh i bas kegeluhen si mbaru alu ngikutken sura-sura Dibata. I bas si e tentu Rasul Petrus erpengarapen gelah perpulungen kalak si tek paksa si e tetap megenggeng nggeluh ngikutken sura-sura Dibata amin pe mberat konsekuensina.

Versi Audi silahkan klik : https://youtu.be/t62mR0YBRJE

Pengkenaina

I bas kesempaten enda, amin pe ndauh ulin geluhta asangken perpulungen paksa Rasul Petrus, iajuk kita gelah tetap erpengarapen alu tetap waspada setiap saat, sebab Iblis imbangta e gawah-gawah ku jah ku je bagi sada singa si erngaung ndarami si man jergemenna (1 Pet. 5:8). Berikutna, iajuk pe kita gelah tetap nggeluh erekemalangen man Dibata alu ngikutken sura-sura Dibata, e me hidup di dalam kekudusan.

Rikutken uraian i bas buku Bahan Renungen PJJ-nta, PJJ-ta sendah i bas rangka nikapken pusuh perukurenta guna ikut muat bagin i bas proses pemilihan pertua diaken tingkat Runggun si irencanaken ilakoken i bas minggu pemena bulan Juni si reh enda. Kai saja si banci silakoken sue ras tema PJJ-ta sendah sikaitken ras proses pemilihen pertua diaken? Si pemena lebe, perbedaan konteks antara situasinta gundari ras perbeben kalak si tek i bas jaman Petrus jelas sangat berbeda jauh. Ertina, ikut muat bagin i bas proses pemilihen e labo beban si mberat. Emaka marilah kita ikut muat bagin i bas pemilihen e alu reh ku gerejanta masing-masing i bas waktu si enggo itentuken.

Si peduaken, pilihlah calon-calon si tuhu-tuhu erkemalangen man Dibata, tutus i bas ngelai, bertanggung jawab, beritegritas, rsd.-na. Adi rikutken ogenta sendah, calon-calon serayan si hidup dalam kekudusan. Emaka sitotokenlah gundari nari, ise-ise saja si ateta sipilih, gelah Kesah Si Badia membimbing kita, mpengasup kita, mereken keberanian man banta guna milih calon-calon si tutus ras erkemalangen man Dibata. Milih calon-calon sue ras pilihenta, secara objektif, erpalasken track record pelayanen, bage pe memilih secara bebas dan rahasia, akap kami labo hal si man kebiaren, sebab si ilakoken kita e sue ras sura-sura Dibata. 

Si peteluken, man bandu calon-calon serayan si enggo terpilih i bas pemilihen tingkat Sektor, enda sada kesempaten si ibereken Dibata guna mengevaluasi diri entah pe bertekad semakin meningkatken kualitas pelayanan i bas gerejanta masing-masing, bage pe bertekad guna nggeluh sue ras sura-sura Dibata. Man bandu si lenga terpilih i bas periode enda, mbue denga bidang pelayanen si banci sidahiken alu tutus guna kemulian gelar Dibata. Emaka marilah kita tetap megegeh ertoto gelah ipengasup Dibata kita nggeluh sue ras peraten Dibata.