SUPLEMEN PA MORIA GBKP TGL. 10 - 16 SEPTEMBER 2023

Pdt. Larena br. Sinuhadji (Nd. ReyRapha Tarigan)

(Nilai Spiritual Kasih)

Ogen : 1 Korinti 13:1-13

Tema : ERKELENG ATE

Tujun : Gelah Moria :

- Meteh biak kekelengen si ituriken Paulus

- Ncidahken biak kekelengen i tengah-tengah kegeluhen

Metode : Aksi

PENGANTAR

Keleng ate eme bahasa universal i ja nilai-nilai si terkandung i bassa banci ialoken kerina mahluk hidup. Yesus Kristus reh ku doni enda pe erkiteken keleng ateNa man manusia. Erkiteken si e maka kasih (keleng ate) eme ajaren inti kekristenan. Emaka asum lit kalak Farisi nungkun man Yesus, “O guru, perentah si apai kin si pentingna kel i bas kerina undang-undang agama?” Erjabab Yesus nina, ”Kelengilah Tuhan Dibatandu asa ukurndu, asa tendindu, asa gegehndu lit. Enda me perentah si mbelinna ras si pentingna. Si peduaken, bali ras si ndai eme, kelengilah temanndu manusia bagi kam ngkelengi dirindu jine.”
I bas bahan PA-nta sekali enda mulihi kita membahas kerna keleng ate eme bagin i bas Tata Nilai GBKP K 5 (kasih, kejujuran, keugaharian, kekerabatan, dan kesetian), i ja  5 tata nilai enda ianggap paling relevan i bas paksa enda guna jadi fokus warga GBKP gelah ihayati, igumuli, isosialisasiken ras igeluhken terus-menerus seh makana enggo menjadi perilaku ras kebiasaan.

MPEBAGESI PENGANGKAN KERNA OGEN

Sope perikopta, Paulus nuriken kerna erbage-bage pemere ibereken Tuhan man manusia, lit si mpepalem kalak sakit, kengasupen nampati kalak si deban, kengasupen jadi pemimpin, entah pe kengasupen ngerana i bas cakap Kesah. Erkiteken pemere si pelain-lain e, maka kedungenna lit turah kesombongen terlebih man kalak si lit kengasupenna ngerana i bas cakap Kesah. Janah i jenda Paulus nuriken man perpulungen gelah ersura-suralah guna ndatken pemere-pemere Kesah si terulin. Pemere Kesah si terulin eme keleng ate.

I bas perikopta, Paulus jelas nuliskennca, maka keleng ate me si pentingna. Bicara beluh pe kita ngerana i bas kerina cakap manusia (kerina bahasa sikuasai), entah cakap malekat sekali pe, tapi adi la lit kekelengen man kalak si deban maka la lit ertina. Kai si kubelasken e la lebih asangken gung si erbulnang entah pe penganak si erdeping. Bahkan lit pe i bas kita pemere ernubuat, cukup kinitekenta seh makana ngasup mindahken deleng, tapi adi la lit kekelengenta man kalak si deban, sia-sia me kita. Lit pe kinibayakenta, statusta terpandang, tapi adi la lit kekelengenta si e kerina sia-sia belaka. Keleng ate eme hal si seh kel pentingna si arus mewarnai kegeluhenta.

Piga-piga hal si ilumbaken Paulus i bas perikopta :

1. Kebesaren, kehebaten ras karunia kai pe la lit ertina tanpa keleng ate bas kita.
2. Keleng ate labo kata sifat tapi kata kerja si arus icidahken i bas kegeluhenta si tep-tep wari. Megenggeng, mehuli, la percian, la menganjang rukur, la sombong, la mekarus, la ncariken untung man dirina sendiri, la ngkira kesalahan kalak. Ermeriah ukur i bas si benar. Kalak si erkeleng ate ngasup nggengken kai-kai pe, tetap erpengarapen dingen saber i bas kai-kai pe. Lit lebe si ndarat i bas dirinta maka e igelari kekelengen, subuk berupa materi, perhatian, tenaga, pemikiren, rsd. Emaka lit kuan-kuanen bahasa Inggris nari nina, “Love isn’t love until you give it away.” Ertina, keleng ate labo keleng ate adi la sibereken. Kata “kasih” i bas bhs. Ind. akap kami tepat sebab lit kata kerja “kasihkan” ertina “bereken,” sebab memang kasih itu harus dikasihkan ku kalak si deban.
3. Keleng ate ngenca si banci tahan rasa lalap (la erker-kerin). Adi ernubuat masap kap, ngerana i bas cakap Kesah ngadi  me,  janah pemeteh me masap nge. Alu bage tetap memotivasi kita ndalanken kekelengen i bas kegeluhenta. Terlebih Paulus ngelumbaken, lit telu si tetap arus idalanken eme: erkiniteken man Tuhan, erpengarapen man Dibata ras erkeleng ate man kalak si deban. Janah si pentingna (si ajaibna) i bas si telu e, eme engkelengi kalak si deban.

Versi Audio silahkan klik : https://youtu.be/-MRhj47iX8w

PENGKENAINA

Tema si seh man banta e me “keleng ate” mulihi i bas rangka sosialisasi Garis Besar Pelayanan (GBP) GBKP Tahun Pelayanan 2021 - 2025, khususna kerna Tata Nilai Kasih. Rikutken Buku GBP GBKP hlm. 42-43 ijelasken maka:

Deskripsi Kasih: Kasih adalah pelayanan yang bersumber dari sifat dan ajaran Tuhan Yesus yang intinya dalam praktek adalah mengasihi Tuhan dan mengasihi sesama (Matius 22:37-39; Yohanes 13:35; 1 Korintus 13:4-7).

Panduan perilaku:

• Senantiasa memuji, memuliakan dan bersyukur atas kebaikan Tuhan
• Selalu berusaha sedapat mungkin membawa damai, menyenangkan sesama dan menjadi berkat bagi orang lain.

Kata-kata kunci:

• Puji Tuhan
• Bersyukur
• Rendah hati (murah hati)
• Mengampuni
• Sopan dan ramah

Kalimat afirmasi: “Kami insan GBKP mengasihi Tuhan dan mengasihi sesama dengan segenap hati, jiwa dan akal budi.”

Perilaku yang dianjurkan:

• Rendah hati, murah hati, sabar
• Sopan dan ramah
• Mau mengampuni kesalahan orang lain
• Suka menolong orang lain tanpa mengharapkan balasan

I bas Pa Morianta minggu enda, mari sievaluasi dirinta masing-masing, apakah kemajuan teknologi ras perkembangen jaman enda erbahanca keleng ate bas dirinta enggo mulai terkikis? Apakah lebih senang kita ngukurken dirinta ras anggota keluarganta saja (hidup individualis)? Keleng ate si enggo sidalaken kita, alu motivasi si murni kah (tulus nge)? Entah lit denga “udang di balik batu?” Apakah perlu denga kita pujian manusia i bas kita nehken penampat, maka ‘di kenca lupa gelarta isebutken sebagai penyumbang (donatur), minter megelut ukurta? Entah kita termasuk si nehken kekelengen alu menuntut balas (transaksional)? Kukelengi kam gelah sada paksa waktu pe dukungndu aku, sampatindu aku, rsd. Yesus ngajarken kita ngkelengi alu keleng ate si tuhu-tuhu, alu motivasi si murni. Bahkan kalak si nembeh atena kita pe arus tetap sikelengi. Bagi nina Injil Lukas 6:27-28 "Tapi man bandu si megiken Aku, Kukataken, kelengilah imbang-imbangndu, mehulilah perbahanenndu man kalak si ernembeh ate nandangi kam, pasu-pasu kalak si numpahi kam, janah totokenlah kalak si erbahan la mehuli man bandu.”

Rikutken Matius 22:37-39 (bdk. Markus 12:30-31; Lukas 10:27), sope kita erkeleng ate man sapih-sapih kita, harus leben sigejapken keleng ate Dibata si mbelin man banta. Kenca sigejapken keleng ate Dibata emaka ngasup kita ngkelengi Tuhan asa ukurta, asa tendinta, dingen asa gegehta lit. Secara konkrit engkelengi Dibata eme alu ngelakoken kerina si jadi peraten Dibata. Adi enggo sigejapken keleng ate Dibata janah enggo kita erkeleng ate man Dibata maka e si jadi palas i bas kita erkeleng ate man sapih-sapih kita. Mari kia sebarkan cinta, kasih ke manapun kita pergi. Mother Teresa pernah ngatakenca, “Jangan biarkan seorangpun datang kepadamu tanpa pergi dengan lebih bahagia.” Ertina, erlumbalah kita erbahanca bahagia kalak jumpa ras kita, ernanam kehadirenta man kalak si deban. 

Mulai dari hal kecil, mulailah alu mereken senyuman perban senyuman eme awal i bas kekelengen. Kembali nina Mother Teresa, “Terkadang kita berpikir, bahwa kemiskinan hanyalah kelaparan, ketelanjangan dan tunawisma. Kemiskinan karena tidak diinginkan, tidak dicintai, tidak diperhatkan adalah kemiskinan terbesar.  Oleh karena itu, kita harus mulai dari rumah kita kita sendiri untuk mengatasi kemiskinan semacam ini.” Mulai dari hal kecil, mulai bas dirinta nari, mulai bas jabunta nari ras sipelebar sayap kekelengenta man si deban. Banci jadi keleng ate si enggo sibereken kita, kurang irespon, ilupaken kalak. Amin bage gia, tetaplah kita ngelakoken kekelengen. Tuhan nampati kita.