SUPLEMEN PJJ GBKP TGL. 24 - 30 SEPTEMBER 2023

Pdt. Larena br. Sinuhadji (Nd. ReyRapha Tarigan)

PERPULUNGEN SI RATUR (Bilangen 2:1-34)

Penaruh

Dibata si isembah kita eme Dibata kiniraturen. Itepa Dibata alam semesta ras kerina isina alu ratur, sistematis ras tuhu-tuhu terprogram, seh makana kerinana banci erdalan alu mehuli. Raja Daud ngakukenca maka Dibata eme Dibata si ratur, nina, “Sebab IA menegakkan bagiku suatu perjanjian kekal, teratur dalam segala-galanya dan terjamin” (2 Sam. 23:5b). Rasul Paulus pe ngajarkenca kerna kiniraturen i tengah-tengah perpulungen, nina, “Tetapi segala sesuatu harus berlangsung dengan sopan dan teratur” (1 Kor. 14:40).

I bas PJJ-ta sendah radu ras kita mulihi isingetken kerna kiniraturen i bas perpulungen rikutken Kata Dibata si jadi ogenta sendah.

Mpebagesi Kata Dibata

Kata Dibata si jadi ogenta i bas PJJ-ta sendah masuk ku bas bagin persiapan bangsa Israel bengket ku taneh Kanaan, benaken bindu 1:1 seh bindu 4:49. I bas bagin enda lit telu hal si ilakoken bangsa Israel rikutken perentah Dibata. Si pemena bindu 1:1-54 nuriken kerna penghitungen kekuatan tempur tentera Israel. Si peduaken bindu 2:1-34 nuriken kerna pengaturen posisi perkemahen bangsa Israel. Ras si peteluken bindu 3:1-4:49 nuriken kerna pengaturen tugas-tugas suku Lewi kerna peribadaten i bas Kemah Perjumpan. Sope bengket ku taneh Kanaan tentuna melala hal si arus isikapken, sebab i bas taneh Kanaan enggo lit bangsa-bangsa si deban si tading i je. I bas si e kemungkinen terjadina peperangen ras bangsa-bangsa si deban sangat potensial terjadi. Emaka telu hal ndai tuhu-tuhu isikapken bangsa Israel rikutken perentah i bas Dibata nari. 

I bas ogenta sendah, ituriken maka Dibata mereken perentah man Musa guna ngaturken, entah pe membagi ras menata, bangsa Israel ku bas posisi kemahna masing-masing. Penataan posisi perkemahen enda ilakoken alu formasi melingkar rikutken arah mata angin, Timur, Selatan, Barat, Utara. Engkai maka alu formasi melingkar ngikutken arah mata angin? Formasi melingkar enda akap kami ngikutken formasi militer si tujunna guna pertahanen ras melindungi hal si penting eme Kemah Perjumpan. Kemah Perjumpan eme pusat kiniteken ras lambang kerehen Dibata i tengah-tengah bangsa Israel. Janah alu formasi melingkar enda banci siantisipasi arah japa pe rehna serangen i bas musuh nari.

I bas tabel i teruh enda banci teridah kiniraturen perkemahen bangsa Israel

Arah tabel i datas teridah pengaturen si mehuli gelah proses e banci erdalan alu mehuli. Lit je 11 suku Israel, Suku Jusup iwakili Manase ras Eperaim. Suku Lewi labo termasuk i je sebab enggo lit tugasna si khusus (bdk. Bil. 3). Kerinana lit 603.550 pasuken Israel si enggo sikap guna bengket ku taneh Kanaan. 

I bas ay. 34 ituriken nina, “Ilakoken kalak Israel me asa kai si enggo ipedahken TUHAN man Musa. Erkemah ia kerina, sekalak-sekalak i teruh benderana, janah erdalan sekalak-sekalak ras senina-seninana si sada nini.” Ayat enda ncidahkenca maka bangsa Israel pe patuh nandangi aturen entah pe sistem si enggo ibahan guna kiniraturen bangsa e 

Versi Audio silahkan klik : https://youtu.be/rjTB0L7eRzI

Pengkenaina

Tema si seh man banta i bas PJJ sendah eme “Perpulungen si ratur.” Arah ogenta sendah mulihi kita erlajar kerna kiniraturen si rehna i bas Dibata nari. Musa sebage suruh-suruhen Dibata patuh nandangi kiniraturen si isehken Dibata man bangsaNa Israel. Janah bangsa Israel pe patuh ngikutken kerina aturen si enggo isehken Dibata seh makana kerina banci erdalah alu mehuli guna kiniulin bangsa Israel sendiri. I bas si e tek kita maka aturen-aturen si rehna i bas Dibata nari tujunna guna kiniulin manusia. Guna kiniulin e maka kita pe harus patuh nandangi aturen-aturen i bas Dibata nari. 

Perpulungen kalak si tek pe tumbuh ras ibangun i bas prinsip-prinsip kiniraturen si rehna i bas Dibata nari. Rasul Paulus i bas Epesus 2:21 ngatakenca i bas bhs. Ind. nina, “Di dalam Dia tumbuh seluruh bangunan, rapi tersusun, menjadi bait Allah yang kudus, di dalam Tuhan.” Bage pe i bas Epesus 4:16 nina, “Dari pada-Nyalah seluruh tubuh, -- yang rapi tersusun dan diikat menjadi satu oleh pelayanan semua bagiannya, sesuai dengan kadar pekerjaan tiap-tiap anggota -- menerima pertumbuhannya dan membangun dirinya dalam kasih. Emaka i bas si e, mari radu ras kita erkiniteken alu ratur erpalasken Kata Dibata. Mari radu ras kita bersekutu alu ratur erpalasken keleng ate Yesus Kristus. I bas Gerejanta enggo melala aturen-aturen si enggo isepakati bersama i bas sidang-sidang gereja erpalasken Kata Dibata, baik tingkat Runggun, Klasis, bage pe Sinode. Mari radu ras sipatuhi ras sidalanken gelah kiniraturen i bas Dibata nari banci sigejapken i bas Gerejanta.