SUPLEMEN PA MAMRE GBKP TGL. 24 - 30 SEPTEMBER 2023

Pdt. Larena br. Sinuhadji (Nd. ReyRapha Tarigan)

Teks : Perbahanen Rasul 18:1-4

Tema : JABU SI ERSADA ARIH

Tujun : Gelah Mamre

- Meteh uga kiniersadan arih Persila ras Akuila i bas ngaturken kegeluhen jabu bagepe tetap ikut muat bagin i bas ndukung dahin pelayanen i bas kerina situasi

- Mabai isi jabu guna tetap ersada arih ras nggit muat bagin i bas ndukung dahin pelayanen i bas kerina situasi

Penaruh

Bahan PA sendah enggo pernah jadi bahan PA Moria i bas tgl. 13 - 19 Agt. 2023 si lepas. Emaka pembahasen kerna bahan enda pe labo ndauh i bas bahan PA Moria ndai. La lit ise pe kita si erjabu alu tujun la ersada arih. Ise pe si erjabu, khususna kita kalak Kristen, ersura-sura gelah dua jadi sada, ersada arih, sue ras palas teologis perjabun kalak Kristen i ja Dibata si mpersadakenca. Memang labo hal si murah mempertahanken kiniersadan i bas perjabun, butuh perjuangan, butuh pengorbanen arah perbulangan ras pernanden nari. Tapi si paling penting i bas perjabun kalak Kristen, jangan pernah menyerah untuk terus bersatu.

I bas kesempaten enda erlajar ka kita mulihi kerna jabu si ersada arih rikutken teladan Persila ras Akwila. Mbera kenca dung kam kerina Mamre ngikuti PA enda, reh gegehna kam i bas menjalin kiniersadan i bas jabu alu gegeh si rehna i bas Dibata nari.

Mpebagesi Teks

Enterem temen sekerja Paulus i bas meritaken Kata Dibata, salah sadana eme pasangen suami istri Akuila ras Persila. Duana gelar kalak enda mekatep isebutken ras-ras. Bagi isi lagu perik si dua-dua ndai, teridah sada teridah bage duana. I bas Pustaka Si Badia, lit 7 kali ayat i ja gelar kalak enda isebutken (Perb. Rasul 18:2, 18, 19, 26; Roma 16:3; I Kor. 16:19; II Tim. 4:19).

I bas perikopta ikataken maka itadingken Paulus kota Aten ras lawes ia ku Korinti. I Korinti kepeken jumpa ia ras pasangen suami istri Akuila si asalna bas Propinsi Pontus nari ras Persila ndeharana, i ja kalak enda mbaru denga reh Italia nari sabab kerina kalak Jahudi ipelawes Kaisar Roma, Klaudius. Kaisar Klaudius eme Kaisar Roma si pe-4-ken si erkuasa benaken 24 Januari tahun 41 seh kematenna tahun 54. Ertina, itadingkenna kota Roma erkiteken lit konflik politik, i ja mengharusken kerina kalak Jahudi lawes i Italia nari. Enggo pasti hal enda mpengaruhi kondisi ekonomi keluarga Akuila, i ja sedekah enda enggo mapan usaha tenda si idalankenna i Italia. Tapi hal si menarik si banci siidah, maka duana kalak enda, ersada arih ngalaken perbeben nggeluh. Subuk i bas membangun ras mengembangken usaha tenda i Korinti bage pe nampati dahin pelayanen mpembarken Berita Si Meriah.

Usaha si seri eme erbahan tenda erbahanca Paulus jumpa ras pasangen suami istri enda. Rikutken teks bhs. Karo, maka Paulus leben si njumpai Akuila ras Persila (ay. 2d, “idahi Paulus kalak enda ndai”). Bahkan i rumahna me Paulus kesilang. Rikutken penuturen i bas ay. 11, maka 18 bulan (sada setengah tahun) dekahna Paulus i bas kota Korinti, iajarkenna Kata Dibata man anak kuta e. Ertina, selama kurang lebih sada setengah tahun Paulus tading i rumah Akuila ras Persila. Piga-piga poin penting si banci siusih i bas jabu Akuila ras Persila :

1. Tetap setia i tengah keluarga i bas ngalaken tantangen si mberat, sabab banci erkiteken pergumulen si mberat keluarga e, la nari harmonis ras setia. Keluarga enda tetap saling mendukung ras menopang.
2. Perbeben si mberat, labo mpengadi (menghalangi) keluarga enda jadi berkat (pasu-pasu). Akuila ras Persila ngasup rukur positif, maka rejeki e rehna i bas Dibata nari. Emaka aminna mbaru denga tading i Korinti, mbangun usaha kembali dari nol, labo erbahanca keluarga enda mbiar ras eraru ate. Labo lit ukurna cian entah pe saingenna akapna Paulus i bas seri usahna. Bahkan saling bersinergi, untuk saling menopang i bas usaha si seri. I rumahna ka Paulus kesilang selama kurang lebih sada setengah tahun.
3. Ersada ukurna i bas nampati pelayanen Paulus. Banci jadi selama Paulus kesilang i rumah Akuila ras Priskila, kesempaten man bana erlajar kerna Kata Dibata ras mendampingi Paulus i bas pelayanenna. Ay. 18, “kenca pelayanenna i Korinti, iterusken Paulus ku Siria radu Persila ras Akuila, ras menetap ka i Epesus. Berkat Paulus i Epesus nari tapi Akuila ras Priskila tading i kuta e.” Ertina, Paulus enggo mempercayaken dahin pelayanen e i kota Epesus man Akuila ras Persila. Bahkan i bas ay. 26 asum ibegi Persila ras Akuila pengajaren firman Tuhan arah Apolos i ja lit si kurang lengkap (sabab peridin Johanes ngenca ietehna). Alu dem kekelengen ras la mpermaluken Apolos, ibabana Apolos ku rumahna je nari alu lebih tepat iperjelasna man Apolos kerna dalan kegeluhen si ituduhken Dibata.
4. Rumah kalak enda pe ipake guna ingan pulung perpulungen i bas erlajar kerna Kata Dibata (1 Kor. 16:19).

Versi Audio silahkan klik : https://youtu.be/rJfOx0jDLcE

Pengkenaina

I bas jabu la lit istilah “superman” entah pe “superwoman”, tapi si lit “superfamily” ras e enggo icidahken arah kegeluhen jabu Akuila ras Persila si ersada arih. Keluarga enda ersada arihna i bas ndalanken kegeluhen jabuna, subuk suka bage pe i bas ngalaken perbeben geluh, terlebih i bas ketutusen duana melayani Tuhan. Keluaga si jadi usihen dingen metedeh ateta bage ka kegeluhen jabunta. Sue ras tema PA-ta sendah, iajuk kam kerina Mamre gelah ngusih kai si enggo ilakoken Akuila ras Persila. Ersada arihna i bas ngalaken tantangen pergumulen si mberat. Arah kai si ilakoken keluarga Persila Akuila, perlu akap kami siinget mulihi padan perjabunta ndube, “Aku si anu muat si anu jadi pasangenku. Janah aku erpadan tetap ngaloken kam subuk i bas paksa senang susah, meriah ukur ceda ate, sehat sakit. Aku tetap erpadan njagai kebadian perjabunta seh Dibata nirangken kita alu kematen.”

Melala hal si banci silakoken i bas jabu si ersada arih, umpamana, ersada arih i bas nampati, nehken kekelengen (melumbar mere) bage pe i bas dahin-dahin pelayanen. Kadang si terjadi pernanden melumbar, perbulangen perhitungen (pelit) bage pe sebalikna. Piah dungna erbuni-buni (la sietehen) i bas nampati keluarga bage pe dahin perpulungen. Puji Tuhan genduari enggo melala ersuruh ukur Mamre reh ku gereja. Tapi lit ka jabu, i ja Mamrena la enggo pernah idah bas dahin-dahin gereja. Moria ngenca ras anak-anak si aktif i bas dahin-dahin gereja. E pe sada pergumulen si mberat. Kurang siakap riahna ‘di kenca Mamre bas keluarganta lenga ukurna ersuruh i bas mendukung dahin-dahin pelayanen. Si parahna lit keluarga si ersada arihna i bas si la mehuli, radu mekisat i bas dahin-dahin gereja, radu pelit (kurang melumbar), radu la senang rumahna ipake guna ingan perpulungen, rsd.

Sue ras tujun PA-ta sendah, adi enggo siteh uga kiniersadan arih Persila ras Akuila i bas ngaturken kegeluhen jabu bagepe tetap ikut muat bagin i bas ndukung dahin pelayanen i bas kerina situasi, emaka i bas PA-ta sendah, marilah kam kerina Mamre kekelengen kami ertekad guna mabai isi jabu guna tetap ersada arih ras nggit muat bagin i bas ndukung dahin pelayanen i bas kerina situasi. Ertotolah pindo gegeh i bas Dibata nari gelah ipengasupNa kami ngelakoken kai si enggo itekadkenndu. Dibata si mpegegehi kam kerina.