SUPLEMEN PJJ GBKP TGL. 17 - 23 SEPTEMBER 2023

Pdt. Larena br. Sinuhadji (Nd. ReyRapha Tarigan)

ERTANGGUNG JAWAB NGURUS PERALATEN RUMAH PERTOTON

(Bilangen 3:27-31) - GBP GBKP : Tim Peralatan

Penaruh

I bas liturgi kebaktin Minggu Gerejanta biasa lit Minggu Perawaten Inventaris Gereja, tujunna eme gelah ngingetken kita maka kerina si ipergunaken i bas erbakti i Gereja harus irawat alu mehuli sebab e kerina mempengaruhi kelancaren ras kenyamanen i bas kita erbakti man Dibata. Selain soal kelancaren ras kenyamanen i bas proses kebaktin i Gereja, lit ka nge palas teologisna, i ja kalak Israel biasa mperdiateken hal-hal si erkaiten ras penyembahen man Dibata i bas Rumah Pertoton. I bas kesempaten enda, mulihi kita erlajar kerna tanggung jawabta ngurus peralaten Rumah Pertoton alu ilitkenna Tim Peralatan.

Mpebagesi Kata Dibata

Rikutken biotokoh Perjanjian Lama (PL), erti gelar “Kohat” entah pe “Kehat” eme “perkumpulan” entah pe “perhimpunan.” Ia anak pe-2-ken Lewi. Lit dua seninana eme Gerson sintua ras Merari si nguda (Kej. 46:11). Lit empat anak dilakina eme Amram, Izhar, Hebron ras Uziel (Kel. 6:18). Gelarna isebutken 43 kali i bas kitab Kejadin, Keluaren, Bilangen, Josua, 1 & 2 Kronika. Kerina kitab-kitab ndai ratana nuriken kerna tugas tanggung jawab Kehat ras kesusurenna i bas Kemah Suci bage pe i bas Rumah Pertoton i Jerusalem. Umur geluhna seh 133 tahun (Kel. 6:18). Amram si nusurken Musa ras Harun (Bil. 26:58-59).

I bas ogenta sendah ituriken maka Kohat ras kerina kesusurenna tading i selatan Kemah Suci. Tugas si harus ilakokenna eme ertanggung jawab ngurus kerina dahin si lit hubungenna ras barang-barang eme: peti perpadanen, meja, nahe lampu, batar-batar, perkakas si ipaku imam-imam i bas ingan si badia, ras kire-kire si i bas dalan bengket ku bas ingan si badiana kel. I bas Alkitab TB-LAI nina, “Yang harus dipelihara mereka ialah tabut, meja, kandil, mezbah-mezbah, perkakas tempat kudus yang dipakai untuk menyelenggarakan ibadah, juga tirai, termasuk segala pekerjaan yang berhubungan dengan semuanya itu.”

Kenca tugas pelayanen khusus si ipercayaken i bas ogenta sendah, Kohat ras kerina kesusurenna datken kepercayaan si lebihen asangken si enggo ipercayaken i bas jaman pemerintahan Raja Daud, Salomo, Yosafat, Hizkia, ras Yosia (bdk. 1 Kron. 6:31-38; 9:31-32; 26:23-31; 2 Kron. 20:9; 29:12; 34:12). Ertina Kohat ras kerina kesusurenna ngelakoken tugas tanggung jawabna alu mehuli seh makana ipercayaken Dibata alu tugas-tugas pelayanen si deban i bas Rumah Pertoton.

Pengkenaina

Tema si seh man banta i bas PJJ sendah eme, “Ertanggung Jawab Ngurus Peralaten Rumah Pertoton” i bas rangka sosialisasi Tim Peralatan. Arah ilitkenna Tim Peralaten enda tentuna erbahanca semakin enterem perpulungen si terlibat i bas pelayanen i Gerejanta alu talenta si lit eme i bas bidang perawaten kerina peralaten si igunaken i bas Gerejanta, baik peralatan elektronik, sound system, komputer, alat-alat musik, jaringan internet, kursi, mimbar, rsd.-na. Tim Peralaten si enggo ibentuk tentuna sangat nampati tugas tanggung jawab Runggun i bas perawatan inventaris Gereja. Arah litna Tim Peralaten tentuna banci semakin mperdiateken secara spesifik kerina inventaris si lit i bas Gerejanta, umpamana, Tim Peralaten Alat-alat Musik si memang lit talentana i bas bidang perawaten alat-alat musik. Tim Peralaten IT isina eme perpulungenta si lit i bas ia talenta i bas bidang IT. Rsd.-na.

I bas ogenta sendah, teridah maka Kohat ras kerina kesusurenna ndahiken tugas tanggung jawab pelayanenna alu mehuli seh makana ipercayaken Dibata man bana tugas tanggung jawab pelayanen si debanna. I bas ketutusenta ertanggung jawab ngurus peralaten Rumah Pertoton tek kita maka ipercayaken Dibata pe dahin-dahin pelayanen si deban janah tek kita maka Dibata mereken pasu-pasuNa man banta.