SUPLEMEN PA MORIA GBKP TGL. 24 - 30 SEPTEMBER 2023

Pdt. Larena br. Sinuhadji (Nd. ReyRapha Tarigan)

Tantangan Untuk Aktif

Siman Ogen : Matius 6:24-33

Tema : ERGAN KESAH ASANGKEN ERTA

Tujun : Gelah Moria :

- Meteh maka geluhta meherga i adep-adepen Dibata

- Ngasup nulak pengajuk doni si erbahanca aru ate

Metode PA : Nonton Bareng

Kata Penaruh

Geluhta enda meherga kel i adep-adepen Dibata, maka Tuhan Yesus nggit ngorbanken diriNa guna keselamaten kita manusia. Alu bage ula ka sipekitik banta alu ngelakoken erbage hal si merendahken dirinta. Sabab memang kinatana, mekatep sipekitik banta, sirendahken dirinta pengelako ras pengajuk doni enda. Melala kalak nggit “melacurken” dirina guna duit, ndayaken sabu-sabu, nipu, bungaken sen, sabab kurang-kurangen lalap man bana materi. Piah dungna materi (duit) enggo jadi dibatana.

Bahan PA-nta sekali enda mabai kita ngasup njagai pusuh ras ukurta gelah ula tercemar i bas pengajuk doni. Ula erkiteken erta, mbue perbahanen si la mehuli silakoken, bahkan geluhta la nari mejuah-juah dekahen kita jungut-jungut, kelsehen, eraru ate, la nari ternikmati kita geluh enda.

Mpebagesi Pengangkan Kerna Ogen 

Perikop enda merupaken bagin i bas Khotbah Yesus i datas uruk si ibere judul “Kerna aru ate” (terj. TB-LAI “Hal kekuatiran”).

I bas ay. 24 Tuhan Yesus tegas mpersingeti pembacaNa gelah tetap ernalem man Tuhan si Esa, ula man dua tuan. Sabab adi dua sembah-sembahenta erbahanca la kita sungguh-sungguh, la fokus, si erbahanca erdua ukur kita. Dibata ngenca si patut isembah kita.
Tuhan Yesus mpetetap ukur si megi khotbahNa bage pe kalak si tek man baNa gelah ula eraru ate. Ajaren Yesus enda labo berarti la kita perlu memikirken kebutuhenta wari lepas wari. Memikirkan sesuatu tentu berbeda ras mengkuatirkan hal tersebut.

Cemas, aru ate, entah kuatir, eme hal si wajar ras alamiah asum kita ngalaken erbage-bage perbeben i bas kegeluhenta. Si paling penting ula berlebihen ras berkepanjangen (kai pe adi enggo pake “sa” la mejile, kecuali angsa ras gurisa). Ertina, kita arus mampu menerima keberadaan dirinta, la pe bagi ukurta si terjadi (It’s OK to be no OK). Kuatir si berlebihen, seri ertina la kita ngendesken geluhta man Dibata (ay. 30). Perikop enda pe labo melarang kita guna erdahin erbintuas guna ngelitken kebutuhen ras mpersiapken masa depanta. Labo ka situtupi kemalasenta alu jargon-jargon rohani, “Ernalemlah tetap man Tuhan,” “Teneng i bas pemeliharaan Tuhan.” Pemahamen si bage labo pas. Gegeh, kesehaten ras kepentaren arus sipakeken guna kita ncukupken kebutuhen geluhta. Larangen ula eraru ate lit 3 kali muncul, i bas ay. 25, 31 ras 34. Teluna ibenaken alu kata sambung “perban si e - emaka” (bhs. Ind. “Karena itu”). Lit kepeken alasen engkai maka la banci kita eraru ate.

Alasen si pemena, perban Dibata si isembah kita, Dibata si dem keleng ate, si tetap ncukupi kebutuhenta alu caraNa si luar biasa. I bas ay. 25 Tuhan Yesus ngatakenca ula aru ateta kerna kebutuhen pokokta (nakan, inemen ras uis). Sabab ergan kesah asa nakan, janah ergan kula asa uis. Kula ras kesahta enggo iselamatken Tuhan Yesus alu pengorbanenNa i kayu persilang. Tentuna, pangan, inemen bage pe peruista, rsd., pasti icukupken Dibata.

Si peduaken, ndauh ergan kita asangken tinepa Dibata si deban (ay. 26c & 30). I jenda Tuhan Yesus make contoh perik-perik ras bunga ncole. Walaupe la ia merdang, rani, labo mpepulung persedian, tapi tetap nge ia man ibahan Tuhan. Adi Dibata pe ipeliharaNa perik-perik si kabang, pasti Dibata pe tetap memelihara geluhta ija iberekenNa gegeh, kesehaten ras kepentaren guna erdahin. Ndauh sikapen ras ergan kita asangken perik-perik si kabang. Ndauh jilen bunga ncole asangken paken Raja Salomo si seh kel bayakna. Ertina, bunga ncole si kentisik ngenca nggeluh, sendah lit pagi-pagi enggo melus, janah iambekken ku api sebage bahan bakar, sikap ka ibahan Tuhan, terlebih kita. Emaka tegas nina Tuhan Yesus, “Adi dukut-dukut si sendah nggeluh pagi iambekken ku bas api bage jilena ibahan Dibata, apai ka kam!”

Si peteluken, aru ate la pernah ndungi masalah, malah erbuena masalah. Aru ate mpeturah erbage masalah. Alu aru ate erbahanca gendek umur geluhta (Ayub 3:25). Aru ate labo banci nampati guna ngalaken perbebenta si wari pepagi, tapi enggo pasti ncedai geluhta sepanjang wari e. Semakin kita eraru ate reh beratna perbeben sialami kita. Bahkan perikop ndai jelas ngatakenca labo ngasup sitambahi umur geluhta arah eraru ate.

Si peempatken, maka kalak si eraru ate eme kalak si la nandai Dibata. Berarti adi lalap kita eraru seri ertina lenga sitandai Dibata ras lenga siimani Dibata si tetap njayam ras ncukupken kai si perlu man banta.

Versi Audio silahkan klik https://youtu.be/BkTlx5QUWUM

Pengkenaina

Tema-ta, “Ergan kesah asangken erta.” Tujun si pemena, mateh maka geluhta meherga i lebe-lebe Dibata. Tujun si pemena enda, akap kami enggo jelas. Emaka bas kita, arus lebe enggo clear, jelas, maka geluhta e meherga kel i lebe-lebe Dibata. Ula ka erkiteken pengelakonta si la mehuli sipekitik geluhta. Berjuang ras berusahalah kita ndalanken si mehuli, si ngena ateNa tandana kita ngergai geluhta. 

Tujun si peduaken, ngasup nulak pengajuk doni si erbahanaca aru ate. Nina kata Hikmat, “Hidup itu murah, lebel merek yang bikin mahal.” “Hidup itu sederhana, gengsi yang bikin jadi rumit.” Si penting si arus sidalanken kita eme ndarami Kinirajan Dibata ras ndalanken si ngena ateNa. Ertina, si mehuli saja siukurken ras sidalanken. Arus terbedaken kita apai kebutuhen apai sura-sura. Janah pelebekenlah kebutuhenta asangken keinginan daging. I bas kita erdahin, dahikenlah dahin si mehuli si enggo ipercayaken Tuhan banta alu tutus, jujur ras berintegritas gelah tetap gelar Dibata ipermuliaken (labo hanya terjeng tutus ku Gereja ras melayani, tapi mbungaken sen, nebu-nebu, tetap denga sidalanken). Ula sempat kita menghalalkan segala cara hanya erkiteken duit.

Latihlah geluh pertendinta alu pebue ngataken bujur, berbagi, fokus ku bas keleng ate Dibata nandangi geluhta. Delete, ambekken kerina racun-racun (toxic) si banci nambahi keguluten ras kearun ateta. Tetaplah ernalem man Tuhan Dibata.