SUPLEMEN PA MAMRE GBKP TGL. 17 - 23 SEPTEMBER 2023

Pdt. Larena br. Sinuhadji (Nd. ReyRapha Tarigan)

Ogen : Ester 4:7-17

Tema : PERJUANGEN SEKALAK BAPA

Tujun : Gelah Mamre :

- Meteh kuga perjuangen ras pengorbanen Mordekai mperjuangken kiniulin jabu ras bangsana

- Ngasup mereken diri guna erjuang ras erkorban guna kiniulin jabu ras bangsa

Penaruh

Sekalak dilaki adi enggo igelari “perbapan” ertina enggo lit tanggung jawabna man keluargana, eme man ndehara ras anak-anakna. I bas GBKP sekalak perbapan igelari “Mamre,” ertina harus lit nilai si lebih asangken perbapan secara umum. Nilai lebihna selain erdiate ras erpemere, Mamre GBKP eme sekalak perbapan si enggo ngaloken keselamaten i bas Yesus Kristus. Ertina tujun kegeluhen Mamre GBKP eme guna mpermuliaken gelar Dibata janah pembarken berita keselamaten arah pengkebet gelunna i japa pe ia ringan. I bas PA sendah mulihi Mamre GBKP ipegegehi arah pengalamen geluh Mordekai, sekalak perbapan si nggit erkorban ras erjuang guna kiniulin jabu ras bangsana.

Mpebagesi Ogen

Kitab Ester itujuken man kalak Jahudi si tetap denga tading i Media-Persia. Kenca italuken Persia kerajaan Babel si naban kalak Israel, emaka sada-persada kalak Israel iulihken ku Jerusalem atas seijin Raja Persia.

Mordekai, e me turang Ester sembuyak bapa, tapi asum mate orang tuana, ibuat Mordekai ia jadi anak angkatna je nari ipebelin-belinna bagi anakna kel (bd. 2:7). Sope perikopta, maka enggo jadi sura-sura Haman, sekalak Perdana Mentri, guna ngkernepken kalak Jahudi si lit i kota Susan ibukota Persia paksa si e, erkiteken Mordekai ngenca si la nggit nembah erjimpuh i lebe-lebe Haman guna mereken penghormaten. Akibatna labo saja man Mordekai Haman ernembeh ate tapi pe man kerina kalak Jahudi si lit i Persia, ersura-sura ia guna munuhsa.

Perikop si jadi ogenta sendah lit i teruh judul “Mordekai mindo penampat Ester.” I bas terj. TB-LAI nina, “Usaha Mordekai untuk menolong orang Yahudi.” Akap kami lebih tepat judul perikop i bas TB-LAI nari. Sebab memang i bas bindu 4 enda teridah usaha Mordekai gelah kalak Jahudi banci selamat la surung ikernepken termasuk arah Ester si enggo jadi kemberahen raja. Lebe icaingken Mordekai bajuna tanda atena ceda. Kenca bage ipakena uis guni, icaburkenna abu ku takalna, je nari erdalan ia ku tengah kuta janahna ngandung nderkuh-nderkuh alu pusuh getem. Dungna seh me ia i kerabangen istana. La ia ku bas, sabap la ise pe banci bengket adi make uis guni. Janah i belang-belang kerina propinsi, kenca perentah raja e imomoken, minter terbegi sora tangis megang i bas kalak Jahudi. Erpuasa ia, tangis ras ngandung, janah menam kerina make uis guni. Asum ieteh Ester kai si ilakoken Mordekai emaka ikirimkenna uis man paken Mordekai. Tapi la nggit Mordekai ngalokenca. 

Kedungena, ikirim Ester, Hatah, suruh-suruhenenna si dilaki guna nungkuni kai kin situhuna si terjadi. Kenca bage maka ituriken Mordekai kerna petaka si bakal terjadi nandangi kalak Jahudi, bahkan surat salinen raja si enggo imomoken i ibukota Susan maka kerina kalak Jahudi arus ikernepken. Janah tole ipindoken Mordekai gelah Ester ngadap man raja mindo perkuah ate raja gelah kalak Jahudi la surung ikernepken. Tapi itenahken Ester ka kata man Mordekai, maka lit aturen mainna ibas jumpa ras raja, adi la kin bekas tenah raja maka ise pe si berinisiatif jumpa ras raja pasti ibunuh, seyakatan adi dudurken raja ciken emas kerajaan man bana. I bas ay. 13-14 lit perkataan Mordekai si akhirna membakar semangat nasionalisme Ester ras pang Ester erkorban guna keselamaten bangsana, ras kedungenna Haman sendiri nge si igantung raja alu tiang gantungen si enggo isikapkenna guna Mordekai ras bangsa Israel selamat bahkan Mordekai imuliaken jadi Perdana Menteri gantiken Haman (Est. 7:10; 8:16-17).

Pengkenaina

I bas PA-ta sendah, iajuk Mamre gelah ngusih Mordekai jadi sekalak perbapan si ngasup mereken dirina guna erjuang ras erkorban guna kiniulin jabu ras bangsana. Si pemena lebe, adi kerna erjuang ras erkorban guna kiniulin jabu akap kami enggo nge ratana kam Mamre mereken teladan si mehuli. Tapi amin bage gia mari radu ras sievaluasi, apakah kam kerina Mamre enggo tuhu-tuhu ngasup mereken dirindu guna erjuang ras erkorban guna kiniulin jabu? Adi lit denga kam Mamre si lenga ngasup, pindolah gegeh i bas Dibata nari gelah ipengasupNa erjuang ras erkorban guna kiniulin jabu. Man bandu kerina Mamre si sedekah enda enggo tuhu-tuhu erjuang ras erkorban, i bas kesempaten enda mulihi ipegegehi gelah kam kerina Mamre tuhu-tuhu ndalanken tugas tanggung jawabndu selaku perbapan si nggit erjuang ras erkorban guna kiniulin jabu sue ras peraten Dibata.

Si peduaken mereken diri guna erjuang ras erkorban guna kiniulin bangsa. Mari radu ras sievaluasi kepedulianta nandangi situasi bangsa ras negaranta. Melala hal si banci silakoken sebage tanda kepedulianta nandangi bangsa ras negaranta. Umpamana, taat nggalari pajak, taat aturen-aturen si lit, ikut mendukung program-program pemerintah i bas rangka meningkatkan ekonomi masyarakat, notoken situasi bangsa ras negara gelah aman, tenteram, ras dame, rsd.-na. Pindolah gegeh i bas Dibata nari gelah ipengasupNa Mamre nggit erjuang ras erkorban guna kiniulin bangsa ras negara Indonesia.