SUPLEMEN PA MORIA GBKP TGL. 1 - 7 NOVEMBER 2026

Pdt. Larena Sinuhadji (Nd. ReyRapha Tarigan)

Penggunaan Media Sosial

Si Man Ogen : Epesus 4:25-32

Tema : NURIKEN SI TUHU-TUHU

Tujun : Gelah Moria :

- Meteh biak-biak kegeluhen si mbaru

- Pentar make media sosial alu ngirimken postingen si erguna

Metode PA : Aksi erbahan konten positif

Penaruh

Media sosial, banci ikataken enggo jadi kebutuhen geluhta i bas jaman si gundari enda. I bas sada sisi media sosial banci nampati kita i bas datken erbage-bage informasi si mehuli guna peningkaten kualitas geluhta, peningkaten ekonomi, rsd.-na. Tapi melala ka dampak negatifna. Media sosial rusur sipake guna datken validasi arah pamer gaya hidup hedonis, ngelakoken erbage-bage hal si jahat, upamana penipuan, eksploitasi seks, investasi bodong, transaksi narkoba, judol, pinjol, rsd.-na. Emaka selaku kalak si enggo ngaloken keselamaten i bas Yesus Kristus, harus terus metenget, waspada, ula sempat kita jadi pelaku entah pe korban i bas media sosial si lit i bas HP-nta masing-masing. I bas PA-nta sendah radu ras mulihi kita erlajar kerna bijak bermedia sosial erpalasken si man ogenta.

Mpebagesi Si Man Ogen

Lit dua judul perikop i bas bindu 4 surat Rasul Paulus man Perp. Epesus. Si pemena “Kiniersadan kula” (ay. 1-16). I bas perikop enda, iajuk Paulus perpulungen gelah reh dewasana i bas erkiniteken man Dibata alu nggeluh ersada ras Kristus. Makeken kerina pemere-pemere Kesah Si Badia guna dahin pelayanen majekken kula Kristus.

Si peduaken, “Kegeluhen si mbaru i bas Kristus” (ay. 17-32). I bas perikop enda, iajuk Paulus perpulungen gelah nangtangi karakter geluh manusia si male. Kai saja karakter geluh manusia si male e? Rikutken ay. 17-19 nina, la nandai Dibata, la erguna perukurenna, gelap pengertinna, bodoh, mersik ukurna, la meteh mela, jahat sura-surana, janah ilakokenna kerina si la mehuli alu la alang-alangen. I bas ay. 20-24 iajuk Paulus perpulungen gelah tuhu-tuhu makeken kerina si mehuli si enggo ipelajarina kerna Kristus guna mpelimbarui geluhna si tep-tep wari. Entah pe proses internalisasi nilai-nilai Kristus i bas kegeluhen si tep-tep wari. Gelah i bas si e terbentuk karakter geluh si mbaru rikutken peraten Dibata i bas Yesus Kristus. I bas ay. 24 ikataken, “kegeluhen si tuhu-tuhu adil dingen badia.” I bas ay. 25-32 itulisken Paulus contoh-contoh konkrit karakter-karakter si mbaru ndai. Rikutken si man ogenta sendah ibatasi hanya seh ay. 28, eme: nuriken si tuhu-tuhu entah pe jujur (ay. 25); ngasup engkuasai diri entah pe labo pedas merawa (ay. 26-27); ras erdahin alu mehuli guna ncukupken keperlun geluhna bage pe guna nampati kalak si lit i bas kepiceten (ay. 28).

Pengkenaina

Rikutken tema bage pe tujun PA-nta sendah, iajuk kita kerina Moria gelah nuriken si tuhu-tuhu bagi si enggo ipedahken Paulus man Perp. Epesus i bas ay. 25. Palasna tentu erkiteken kita enggo nggeluh i bas kegeluhen si mbaru i bas Kristus. Emaka harus lit i bas kita biak nuriken si tuhu-tuhu, entah pe jujur. Ay. 25 i bas bhs. Ind., ikataken bagenda nina, “Karena itu buanglah dusta dan berkatalah benar seorang kepada yang lain, karena kita adalah sesama anggota.” Ertina iajuk kita kerina gelah jujur kepada diri sendiri, jujur kepada sesama saudara seiman, ras jujur kepada semua orang. Kerna perilaku jujur akap kami enggo rusur sibahas i bas tata nilai kejujuran. Kari i bas bagin terakhir bahanta enda mulihi itulisken kami kerna tata nilai kejujuran.

Biak nuriken si tuhu-tuhu enda iarapken banci siaplikasiken i bas kita ber-media sosial. Ula sempat kita jadi korban entah pe pelaku penyebaran berita bohong (hoax), penyebar gosip, penyebar harapan palsu, penipuan, rsd.-na. Gelah alu bage reh pentarna kita i bas ber-media sosial. Media sosial tuhu-tuhu sipakeken guna hal-hal si mehuli, si positif, mambai ku si mehuli sue ras peraten Dibata. Emaka mari radu ras kita ertekad makeken media sosial alu kepentaren si rehna i bas Dibata nari. I teruh enda mulihi isingetken kami kerna uraian tata nilai kejujuran. Bagenda nina.

Kejujuran adalah: bersih, transparan dan bertanggung jawab dalam setiap tugas pelayanan supaya berkenan di hadapan Tuhan.

Panduan Perilaku: 
- Hati yang lurus, tidak berbohong atau berkata apa adanya.
- Tidak curang atau mengikuti aturan yang berlaku.
- Tulus ikhlas, tidak munafik atau bermuka dua.

Kata Kunci: 
- Integritas
- Bersih
- Transparan
- Terus terang
- Bertanggung jawab

Perilaku Yang Dianjurkan:
- Senantiasa bersikap jujur, sesuai antara perkataan yang diucapkan dengan perbuatan

Kalimat Afirmasi:
- “Kami warga GBKP akan senantiasa bertindak jujur dan berpegang teguh pada nilai moral dan etika Kristen yang ditetapkan oleh gereja."
- “Kami insan GBKP menjunjung tinggi kejujuran di tengah keseharian sebagai jemaat pilihan Allah.”