Pekan Doa GBKP Tahun 2019

PEKAN DOA GBKP TAHUN 2019

Tema Umum : “Ersada Ras Erpengarapen I Bas Ertoto” (bdk. Perb. Rasul 1:14)

WARI I MINGGU 2 JUNI 2019

Pdt. Jepri Alexander Keliat

Renungan : Roma 12:12

Tema : Ertotolah La Ergadi Ngadi

I bas kerina kiniteken si lit i doni enda kerina nge lit ertoto bas kebiasaan kinitekenna. Min gia cara carana si berbeda tapi kerina kiniteken enda tek maka ertoto enda salah sada dalan erkomunikasi ras Dibata. Emaka bas Kamus Bahasa Indonesia pe “doa” iertiken permohonan (harapan, permintaan, pujiaan) kepada Tuhan. Emaka arah pengertin enda banci iertiken maka ertoto merupaken salah sada kebiasaan kalak si erkiniteken guna erkomunikasi ras Dibata guna nuriken perbeben dingen pengarapen, ngataken bujur, bage pe si debanna.

Surat rasul Paulus man jemaat Roma khususna ay. 12 secara umum ertemaken kerna kewajiben selaku kalak si erkiniteken. Kenca Paulus nerangi kerna keistimewaan dingen hak kalak si erkiniteken man Dibata (1-11) Paulus nerusi kerna tanggung jawab kalak si erkiniteken. Roma 12:12, enda sada rangkaian ras ayat sebelumna. Emaka konteks Roma 12:11-12 e me kap nuriken kerna kesetiaan i bas pelayanan man Tuhan.  lit 5 syarat pelayanen rikutken Roma 12:11-12 e me kap la mekisat, ukur si ergiah-giah, erpengarapen, megenggeng dingen ertoto la erngadi-ngadi. Maka palas ertoto la erngadi-ngadi si nimaksudken bas Roma enda e me kap notoken kerna pelayanen (daulos). Tentu pelayan Dibata labo bas konteks jadi serayan saja ngenca tapi selaku pelayan Kristus kita melayani Kristus bas kerina dampar kegeluhenta. Jadi orang tua, jadi anak, erdahin, erjuma ras si debanna e kerina termasuk pelayanen. Maka ertoto perlu la erngadi-ngadi sebab melala kel bagin kegeluhen si man bentasen kita seh maka harus nge kita perlu ertoto la erngadi-ngadi.

Rikutken pengertin i datas, ertoto la engadi-ngadi iperluken sekalak pelayan Dibata. Lit piga guna ertoto man sekalak pelayanan. Si pemena guna meteh sura-sura Dibata. Megati selaku pelayan Dibata la siangka sura-sura Dibata. Arah toto kita meteh sura-sura Dibata. Si peduaken ertoto man pelayan guna meteh enggo nge payo silakoken kita entah lang? Terdauhen ertoto man pelayan erguna guna mindo gegeh i bas kerina dahin pelayanen si lit. Ras si terakhir ertoto man pelayan pe erguna sebagai pengatan bujur erkiteken selaku pelayan iatanken denga ikut bas rarasen pelayanenna.

Kata “ertoto” si nipake i bas Roma si nipake e me kap kata proseuche si kata aslina e me kap proseuchomai si banci iertiken alu dua pengertin. Pengertin si pemena e me kap ertoto ku Dibata; ertoto alu jelas, semangat dingen tutus ertoto. Emaka pengertin si peduaken ingan ertoto (enda ipake bas kalak Yahudi ‘di kune la lit i je ingan ertoto).  Emaka kata “la erngadi-ngadi” i bas kata proskartereo si banci ertiken dengan tabah, hadir terus-menerus, tetap. Emaka arah pengertin kata enda kata proseuche proskarterountes banci iertiken ertoto alu jelas dingen semangat alu la erngadi-ngadi, tetap ras megenggeng nimai ulih jababen toto enda.

Arah dua kata i datas maka lit dua hal tantangen ertoto. Si pemena e me kap toto si jelas. Kai nge ndia antusena toto si jelas? Toto si jelas labo soal kata-kata tapi toto si jelas ibenai alu kiniteken. Adi la ipalasi kiniteken maka totonta e labo toto si jelas. Jelas alamatna, e me kap ku Dibata sebab tek kita maka Dibata nge si ngaloken pertotonta e. Jelas pe mengadung makna isi. Megati isi pemindon totonta pe labo jelas. Kita pe labo si eteh kai sura-suranta, emaka banci jadi isi totonta pe lalap ganti tiap kali ertoto. Pindolah sesuatu si kin e jadi keperlunta, jelas kin e jadi kebutuhenta.

Si peduaken la engadi-ngadi. Toto e me kap gegeh kineteken. Kalak si la ertoto alu konsisten maka situhuna ia labo nggeluh secara kiniteken. Terdauhen kai nge tantangen maka sulit kel kita guna banci ertoto alu kacamata konstan? Pemena tentu kondisi kegeluhen. Kondisi aman ras pe kehilangen harapen megati kel erbahanca kita sulit ertoto. Adi la lit persoalen megati la lit nanam ertoto. Enggo ndekah ertoto tapi lalap la sidat jabapenna enda megati erbahanca kita la dorek ertoto secara konstan. Bas bagin la erngadi-ngadi enda situhuna pe ngerana kerna ngaloken kerina ulih toto. Kalak si erkiniteken entah bagi ukur entah la gia bagi ukur ulih toto la ia ngadi ertoto sebab tek ia beluhen nge Dibata ngukuri dirinta asang kita.

Emaka ertotolah la erngadi-ngadi labo erkiteken ban melala ban pindonta tapi erkiteken e ngenca gegeh kegeluhenta.

WARI II SENIN 03 JUNI 2019

Pdt. Jepri Alexander Keliat

Renungen : Mazmur 5:1-4

Tema : “Muat Bagin I Bas Ertoto”

Melala kel cara nampati teman si kesusahen. Banci arah kerehenta, banci ka arah kita mereken penampat. Salah sada bentuk diakonia si megati sianggap remeh e me kap ertoto. Jarang kel ertoto ianggap sebagai penampat. Bahkan lit ka nina adi terjeng toto nge ngenca ise pe me beluh nina. Padahal toto mbelin kel gegehna, mbelin kel gunana. Notoken teman si memerluken e pe seri nge hulina ras bentuk penampat si deban.

Rikutken bahan renungenta Daud mindo Dibata guna banci dengkehken pertotona. Kata dengkehken pertoton {hagigi (meditasi / doa) binah (memperhatikan / mempertimbangkan) YHWH (Tuhan) haazinah (mendengarkan)} kata hazinah akar katana AZAN bas bahasa inggris iertiken listen labo hear. Hear hanya mendengar sesuatu yang tidak di sengaja misalna bagi bergi sora biang ngereng. Tapi adi listen e kondisi si memang tuhu tuhu guna banci mbegi sada percakapen gelah alu bage datna antusenna. Contohna umpamana emekap megi sora guru ngerana. Arah pengertin idatas Daud tek maka Dibata labo gelah enggo megiken kerina sora totonta. Tapi kerina totonta tuhu tuhu ibegikenna. Emaka bas Dibata tuhu tuhu mbegiken totona tek Daud maka pasti Dibata mereken jawaben ibas kerina totonta.

Daud pe erbahan pengakun maka Dibata e Raja (Melek) bagepe Dibata si erkuasa (elohim= ulung dan agung). Emaka tangkas maka palas maka Daud ertoto man Dibata sebab tek ia maka Dibata e Raja si erkuasa. Mazmur 5 emekap pemindon Daud si melala kel imbangna seh maka la ia ngasup nari guna ndungi kerina perbeben ras imbangna e. Daud si raja pe la ngasup ndungi persoalenna. Emaka mindo ia man Dibata arah totonta sebab min gia ia raja ia pe perlu penampat ibas Dibata nari.

Arah dua keterangen i datas lit piga piga hal si banci guna ipeseh bas pekan doa enda. Sipemena emekap la lit manusia si la butuh itotoken. Kerina manusia ugapape sekali hebatna perlu kel ia toto. Daud si hebat ternyata lemah ras butuh Dibata. Emaka notoken teman pe perlu kel ngge sebab temanta e pe membutuhken pertoton.

Terdauhen notoken teman man Dibata e pe pengakun si ertoto maka Dibata ngasup ngelakoken kai pe. megati bas litna persoalen temanta mis sidarami jalan keluar tapi lupa kita maka gelah seh ku bas jalan keluar e toto menjadi hal si utama. Daud tek ia maka kerina jalan keluar banci lit adi erpengendes man Dibata. Alu ertoto manusia lanai sisada ibas persoalen kegeluhenna tapi nggo ia ras Dibata.

Terdauhen maka Daud ngigetken maka kerina bentuk pertoton ibegiken Dibata. Labo lit rumusen toto. Labo ka lit jelma si lebih unggul totonta asang kalak si deban. Sebab arah keterangen si ibereken Daud maka kerina pertoton pasti ibegiken Dibata. Bas perpulungenta mekatep kel kita jumpa ras perpulungen si tempa la beluh ertoto (deba ntah mekisatna), ras rusur ialaskenna maka totoku la ersepuh nina. Tapi arah keterangen bahanta wari enda labo erkiteken ise si ertoto tapi adi erkiniteken ia man Dibata pasti toto e ibegiken Dibata.

Adi mulih ka kita kubas bahan invocatio maka jelas megegeh kel gegeh toto syafaat. Sebab bangsa Israel si nggo i ngombangi bangsa  Assur, la tek bangsa Assur banci Dibata nampati bangsa Israel tapi erkiteken ertoto  Raja Hizkia ras Nabi Jesaya mis ialoi Dibata totonta emeka ikirimken Dibata malaikat munuhi panglima tentara assur (2 Kronika 32:21), emaka mela raja Assur. Kiningiten raja Hiskia ras Jesaya ertoto ngasup guna mebebasken bangsa Israel bas kiniseran nari.

Muat bagin ibas ertoto kepeken mbelin kel ngaruhna. Erbuena kita nggit nampati temanta arah pertoton mbelin kel e gunana. Emaka ntah lagia lit gegehta, senta guna nampati pe ntah bagi si kurang, notoken temanta ka lah gia kita sempat, e pe mbelin kel tuhu gunana.

WARI III SELASA 04 JUNI 2019

Pdt. Jepri Alexander Keliat

Renungan : Epesus 6:18-20

Tema : “Njagai Geluh Perpulungen Arah Pertoton”

Peperangen rohani, enda me si jadi bahasen tema kitab Epesus 6. Paulus ngandingken maka melala kel gundari tantangen kalak si erkiniteken sebab Iblis erdahin suari ras bergi guna ncedai persadan manusia ras Dibata. Baik e arah perbeben bagepe keriahen si lit melukah kel erbahanca sirang manusia ras Dibata. Di kune hal e terjadi tentu saja kematen (neraka) e jadi sikerajangen manusia.

La kel ate Paulus enda terjadi. Emeka lit piga piga senjata si banci ipakeken manusia guna banci njagai persadaan manusia e ras Dibata. Ketuhu-tuhu, kinibujuren, keriahen ukur, kiniteken, keterkelinen, kata Dibata. Enda me kerina senjata rohani sibanci ipakeken manusia. Hanya saja persoalenna kepeken senjata enda banci ipakeken adi kita ertoto (18). Hanya alu ertoto kerina senjata e silit bas kita e banci ipakeken. Sebab adi la bekas pemere Dibata lit kin pe senjata e bas kita la bo banci terpake. Emaka perlu kel notoken perpulungen gelah min kerina senjata si lit e banci terpakekenna.

Terdauhen Paulus pe mereken syarat emekap tutus ertoto. Kata tutus bas bahanta enda emekap proskarteresis si banci iertiken ketekunan. Megati notoken perpulungen e la menjadi bagin penting kel man banta seh maka labo tutus kel ateta notokenca. Padahal di kune naktak perpulungenta e kubas sada perbeben erkiteken dosa, kita pe ikut latih ibahanna. Emeka perlu kel tutus, la erleja leja guna notoken perpulungen gelah tetap terjaga.

Terdauhen ertoto pe Paulus man kerina kalak sitek (labo hanya man serayan) bas upaya njagai perpulungen gelah min ia pang nuriken si benar. Kata pang nuriken si benar (parresia = keberanian, kepercayaan diri, kebebasen). Kata Parresia ngertiken kerna keberanian nuriken kebenaren. Megati enda pe persoalen ibas njagai perpulungen. Melala kalak si erkiniteken erkiteken mbiar ras mehange la ia nggit nuriken kebenaren si lit. Emaka erkiteken si e piahna temanna si nggo lalar, erdauhna sirang ras Dibata. Emaka perlu ngge itotoken gelah kerina kalak si erkiniteken alu palas kita enda sada kula Kristus pang guna nuriken kebenaren silit alu teng-teng. Gelah temanta si sada kiniteken e la  ceda pusuhna erkiteken persingetta tapi sadar dingen jera ia.

Minimal lit dua hal siman totonken kerna jemaatta. Si pemena gelah ia meteh rahasia berita simeriah. Berita simeriah berpusat ibas berita kerna keleng ate Dibata silaersibar man kerina manusia. Manusia si ersalah nggo i kelini Dibata arah kerehen Yesus. Emeka kalak si nggo ngaloken berita e harusna jadi kalak siberbeda ras kalak si la erkiniteken. Kalak si nggo ngaloken berita simeriah ia lanai ikuasai dosa tapi justru jadi kalak si mencerminken kriteria kalak si nggo ngaloken berita simeriah e. Tantangen ngeluh kalak kristen genduari emekap kegeluhenna la ncidahken biak kalak si tek. Seh maka la terbedaken apakah ia erkiniteken ntah lang. Emaka harus ngge itotoken gelah kalak si erkiniteken ngasup ncidahken biak ngeluh kalak si erkiniteken.

Arah bahan invocationta pe maka salah sada topik si perlu kel itotoken kerna perpulungen emekap gelah bas kerina perpulungen lit pengertin bas dirina. Kata pengertin ibas bahasa aslina emekap epignosis. Kata epignosis enda banci iertiken ketajaman, kemampuan untuk menilai. Melala kinata kegeluhenta gundari maka labo ban la lit sekolahna, tapi ibas muat keputusen rusur kel kalak kristen justru la lit pengertin. Kiniteken harusna erbahan manusia semakin tajam, la melukah tek nandangi sada pandangen. Emaka perlu kel notoken perpulungenta gelah la melukah tek nandangi pengajaren si la payo. Tapi alu kacamata kiniteken ngasup ia guna ngidah persoalen sierbahanca la ia ndabuh ku bas dosa.

WARI IV RABU 05 JUNI 2019

Pdt. Larena br. Sinuhadji (Nd. Rey Rapha Tarigan)

Invocatio : “Ertotolah kerna aku gelah banci aku ngerana alu mehuli, maka banci kupetangkas rahasia e bagi patutna” (Kolose 4:4)

Renungen : 2 Timotius 2:1-7

Tema : “Notoken Laskar Kristus”

Bena Kata

Lit lagu KAKR “Saya bukan pasukan berjalan, pasukan berkuda, pasukan menembak, saya tidak menembaki musuh tapi saya laskar Kristus”. Ertina kita laskar entah pe prajuritna (Ind.) Tuhan. Secara fungsional laskar maju guna erperang melawan musuh ras erjuang gelah banci memenangken peperangen. Berarti adi kalak Kristen idilo guna jadi Laskar Kristus, berarti  kita idilo gelah ras Kristus guna kita erperang ngelawan Setan/Iblis (bdk. Ef. 6:11, “Pakeken kerina senjata si ibereken Dibata gelah ngasup kam tedis ngelawan akal Iblis si jahat”).

Renungen

Paulus mereken surat pastoralna man anak rohanina Timotius gelah tetap paguh ras setia ndalanken tanggung jawabna selaku pelayan Tuhan, ikut ngenanami kiniseran jadi laskar Kristus Yesus si tutus. Uga kin biak laskar Kristus si tutus?

-        Sekalak laskar si sangana ertugas fokus nandangi tugasna, la ia sibuk ngurusi hal-hal si deban di luar si enggo ibereken komandan man bana.

-        Memiliki sikap bagi kalak si sangana ikut i bas perlomban, e me patuh nandangi peraturen-peraturen si lit bas perlumban e. Adi aturen main silanggar, enggo pasti kena diskualifikasi ras la banci kita menang i bas perlumban e.

-        Memilki sikap bagi sekalak perjuma, i ja tuhu-tuhu ia alu tutus, sabar, semangat erdahin i bas jumana benaken  persiapen lahan, tanah igemburi, nuan bibit, isuanken ku bas lahan, irawat subuk isiram, itama pupuk, isemprot (iagui) hama-hama si mengganggu je nari i bas waktuna rani ia.

Paulus, Timotius, e me laskar Kristus si enggo mereken geluhna erdahin i bas peken anggur Tuhan, ngelai perpulungen Tuhan gelah banci paguh kinitekenna. La banci lang mbue rusur tantangen, perbeben si ialami subuk i bas diri sendiri (kurang ketutusen, kurang maksimal melayani), arah perpulungen (la nggit iajari, mengerasken ukur, perpecahen) bage pe lingkungen (ngambati perdalinen pemberitaan Berita Si Meriah). Alu bage rikutken tema i bas wari enda notoken laskar Kristus, notoken kerna kalak Kristen khususna si enggo idilo guna jadi pelayan Tuhan gelah tetap memiliki semangat bagi laskar Kristus. Dukungen arah perpulungen khususna i bas toto seh kel mbelin kuasana si mpengasup Serayan Tuhan setia ndahiken tugasna (bdk. sikap sebage laskar fokus, patuh man Kristus, lit kesabaren, ketutusen, kinijingkaten bagi sekalak perjuma). E maka i bas invocatio pe banci siidah, uga Paulus mindo dukungen doa arah perpulungen gelah banci ia ngerana alu mehuli, alu la biar-biaren, dingen mpetangkas Firman Tuhan bagi patutna (Kol. 4:4).

Mari perpulungen teruslah ertoto guna Serayan Tuhan. I tengah jabu paling tidak seminggu sekali. I bas PJJ ban sekalak arah perpulungen si ertoto secara khusus kerna Serayan Tuhan ras jabuna, gelah reh tutusna pelayanen si idahikenna. Semangat, kesetian, ketutusen Serayan Tuhan la terlepas i bas dukungen doa arah perpulungen. Dingen tanggung jawab si e enggo iueken perpulungen asum kami Serayan Tuhan itangkuhken, i ja kami Serayan si itangkuhken ngala kempak perpulungen dingen nina peliturgi : “Tatang-tatangndu ras dukungndu ia i bas doa gelah ngsup ndahikenna tugasna”.

WARI V KAMIS 06 JUNI 2019

Pdt. Larena br. Sinuhadji (Nd. Rey Rapha Tarigan)

Invocatio : “Pindolah tentu ngalo me kam, daramilah tentu idatndu, tuktuklah tentu italangi pintun man bandu” (Matius 7:7)

Renungen : 1 Tesalonika 1:2-7

Tema : “Ertoto Ras Erdahin”

Bena Kata

Ertoto ras Erdahin  (Ora et Labora) merupaken sada kesatuan, la banci sipisahken. Sabab lit deba kita, ertoto saja tanpa ibarengi alu erdahin. Enggo pasti la ibereken Tuhan si nipindoken kita. Umpamana, ertoto kita gelah ibereken Tuhan rejeki simpar, tapi medem saja dahinta la lit kai pe dahin si idahinken kita. Mate lumben banci kita. Entah pe sebalikna, erdahin terus tanpa ertoto, sabab bas perukurenna, erkiteken kehebatenku nge maka lit rejekiku, sukses aku, bayak aku, rsd. Si e erbahanca kedungen jadi meganjang rukur. Sigejapkenlah kai pe si lit bas kita erkiteken perkuah ate Tuhan. E maka lit lagu rohani karo ngatakenca, “Kutotoken sikudahiken dingen kudahiken sikutotoken”.

Renungen

I bas suratna Paulus nehken pujian ras pergegeh tole man perpulungen Tesalonika. Hal si menarik si mekatep jadi ciri i bas Paulus nandangi perpulungen si isuratina, e me tetap ia ertoto dingen la lupa ia ngataken bujur arah hal si positif si tetap idalanken perpulungen e (bdk. Pil. 1:3; Kol. 1:3).

Ay. 2, Paulus lalap nginget perpulungen Tesalonika ras ibabana i bas pertotonna. Janah i bas si e pe la ia lupa ngataken bujur man Dibata arah kai si ilakoken perpulungen Tesalonika.

Ay. 3, hal-hal positif si iapresiasi Paulus arah perpulungen Tesalonika e me :

-        Icidahkenna perpulungen e kinitekenna arah perbahanen.

-        Latih erdahin erdandanken keleng ate si lit bas perpulungen e. Ertina, nggit perpulungen e latih erdahin, dingen palasna erdahin e me keleng ate, labo motivasi si deban.

-        Tetap ukur perpulungen e i bas erpengarapen man Yesus Kristus. Dingen enda terbukti, asum melala kiniseran sialami perpulungen, tetap ukur perpulungen e ngaloken berita si meriah alu keriahen ukur (ay. 6).

-        Buah kiniteken si teridah i bas kegeluhen tep-tep wari i bas perpulungen e jadi usihen man perpulungen i Makedoni ras Akaya. Bahkan adi siidah i bas ay. 8-10 maka berita kerna perpulungen Tesalonika erkiniteken man Dibata enggo mbar ku japa pe. Kerina kalak ncakapken perpulungen enda, uga nai kalak enda ersada arih ngalo-ngalo Paulus ras teamna, kuga perpulungen enda nadingken sembah-sembahenna guna tutus nembah man Dibata si nggeluh dingen si tuhu-tuhu (bdk. Perb. Rasul 17).

Bage pe pelayen Paulus ras teamna, labo terjeng kalak enda ertoto saja, tapi rikut ras usaha bage perjuangen dingen teridah ka arah buah kiniteken si jadi usihen man perpulungen Tesalonika. I bas ay. 5 Paulus ngatakenca, maka Berita Si Mehuli si ibabana man perpulungen Tesalonika labo alu kata, tapi pe alu kuasa ras Kesah Si Badia, alu kiniteken si tetap nandangi pengajaren si tuhu-tuhu. Kegeluhen Paulus ras teamna tuhu-tuhu jadi usihen man perpulungen Tesalonika. Bdk. 1 Tes. 2:9 i ja Paulus ras teman-temanna erdahin suari ras berngi gelah ula jadi tanggungen perpulungen kidekah  kalak enda meritaken Kata Dibata. Paulus ras teamna enggo jadi usihen man perpulungen labo bas toto saja, entah pe meritaken Kata Dibata tapi i bas pengkebet kegeluhen si tep-tep wari, termasuk i bas dahin si tep-tep wari.

Tuhan enggo mereken dahin man banta rikutken profesinta masing-masing. Lebe arus sisyukuri alu kita ertanggung jawab ndahiken dahinta tep-tep wari. Sigejapken gegeh ras kepentarenta terbatas, maka alu bage tetap kita ertoto man Tuhan maka ngasup kita ndahikenca, dingen banci ka ipake Tuhan kita jadi sira ras terang alu tetap profesional ras berintegritas.  Ada usaha ras pengendesenta man Tuhan (Invocatio).

WARI VI JUMAT 07 JUNI 2019

Nrs. Pdt. L. Sinuhadji (Bp. Rey Rapha Tarigan)

Invocatio : “Pertoton Daud. O TUHAN, dengkehkenlah pemindonku kerna kinibujuren, perdiatekenlah pertotonku mindo penampat! Begikenlah pertotonku, i bas biberku nari si la lit i je penipu” (Masmur 17:1)

Renungen : Pilipi 4:6-8

Tema : “Ertoto Mpegegehi Kula, Ukur Ras Tendi”

Kearun ate (kekuatiran) rusur sialami i bas geluhta erkiteken la lit kepastin kerna kai si bakal terjadi i lebe-lebeta. Akibatna kearun ate erbahanca geluhta la tenang (gelisah), dem alu kebiaren, janah maun la kita ngasup ndahiken dahin-dahin si deban erkiteken la konsentrasi.

Karakteristik manusia si geluhna rusur ikuasai kearun ate enda enggo iteh Paulus. Emaka i bas bagin pendungi suratna man perpulungen i Pilipi, ipegegehi Paulus perpulungen e gelah ula aru ate. I bas ay. 6 ikataken rasul Paulus nina, “Ula aru atendu kerna kai pe, tapi i bas kerina pertotonndu, pindolah man Dibata kai si iperlukenndu, janah pindolah rusur man baNa alu pusuh si dem pengataken bujur”. I bas bhs. Ind. nina, “Janganlah hendaknya kamu kuatir tentang apa pun juga, tetapi nyatakanlah dalam segala hal keinginanmu kepada Allah dalam doa dan permohonan dengan ucapan syukur”. Rikutken terjemahen bhs. Ind., akap kami mungkin kalimat si pas i bas bhs. Karo, “Ula aru atendu kerna kai pe, tapi pindolah rusur man Dibata kerna kai pe si niarapkenndu arah pertotondu alu pusuh si meteruk ras dem pengataken bujur”.

Maksud rasul Paulus gelah perpulungen e ula nggit ikuasai kearun ate, sebab kearun ate rusur erbahanca la ngasup kita ngelakoken kai pe selain mbiar ras gelisah. Tapi katakenlah man Dibata, arah pertotonta, kerna kai pe si jadi arapenta alu meteruk ukur (permohonan) ras ngataken bujur. Meteruk ukur (permohonan) ras ngataken bujur e me tandana Dibata si lebih berkuasa asangken kita manusia, janah Dibata si lebih berkuasa asangken kearunateta. I bas doni enda memang la lit kepastin, tapi i bas Dibata lit kepastin kerna masa depan si mehuli nandangi kita anak-anakNa, maka arus lit kiniteken i bas kita maka Dibata pasti mereken si terbaik, amin pe mungkin si terjadi la bagi ukurta (bdk. Jer. 29:11).

Ay. 7 e me ulih pertotonta. Pertotonta erbahanca persadanta ras Kristus semakin paguh, janah lit kemalemen ate i bas kita. Ay. 8 e me pengajuk gelah kita mengalihkan perhatian alu cara ngukurken si mehuli, si bujur, mulia, benar, bersih, mejile ras kerna kerina si patut ipuji, sebab si e kerina erbahanca kita terhindar i bas kearun ate.

Latar belakang invocationta e me Daud lit i bas keadaan si mesera, lit i bas ancamen bahaya erkiteken musuh-musuhna. I bas keadaan si bagenda rupana, erpengendes Daud alu ertoto man Dibata. I bas pertotonna mindo Daud alu meteruk ukur ras pusuh si bersih gelah ikabulken Dibata kerina si jadi pingko-pingkona. Dibata ngenehen pusuh si bersih i bas Daud nari makana ikabulken Dibata pemindon Daud.

Tema i bas renungenta sendah “Ertoto Mpegegehi Kula, Ukur Ras Tendi”. Jelas arah bahan renungenta bage pe invocationta, maka ertoto man Dibata i bas Yesus Kristus erbahanca kita megegeh baik secara kula, ukur bage pe tendi. Emaka ula kita malas i bas ertoto. Ertoto la selalu ilakoken secara formal (lipat tan, tutup mata), ertoto banci silakoken i japa pe kita janah i bas keadaan si kugana pe.

WARI VII SABTU 08 JUNI 2019

Pdt. Larena br. Sinuhadji (Nd. Rey Rapha Tarigan)

Invocatio : “Alu meseksek mindo aku man baNdu, cidahken bangku perkuah ateNdu sue ras si enggo ipadankenNdu” (Masmur 119:58)

Renungen : Lukas 18:1-8

Tema : “Megenggeng I Bas Ertoto”

Bena Kata

Lit ulih kalak si megenggeng. Janah Firman Tuhan sendiri pe mbue si ngerana kerna ulih i bas kita megenggeng (Mat. 10:22; Mat. 24:13, “Tapi Kalak si megenggeng seh kedungenna terkelin kap”. Luk. 21:19, “Mengenggenglah kam, sabab alu bage maka kam banci ngkelini geluhndu”; 2 Tim. 2:2, “Adi tetap megenggeng kita, ras Ia ka pe kita pagi erkuasa”; Yak. 1:12, “Malem ate kalak si megenggeng sanga ikenai erbage-bage percuban e, ialokenna me ulih kemenangenna, e me kegeluhen si enggo ipadanken Dibata man kalak si ngkelengi Dibata”; ras melala denga si deban). Ertina, pelin-pelin keuntungen man banta asum kita megenggeng. Dingen labo gampang (murah) sikap megenggeng enda nggeluh bas kita. Arus melala latihan, lit bas kita penguasan diri, belajar guna lebih tenang (labo panik ras sibuk la menentu). Tuhu-tuhu sabar i bas ndalani proses demi proses i bas Dibata menempa kegeluhenta. Ertina, i bas kerina dampar geluhta iperluken sikap megenggeng. Subuk i bas sekolah, darami dahin, berusaha, ngalaken sakit pinakit, termasuk pe i bas ertoto.

Renungen

Bahan renungenta ibere judul “Perumpamaan diberu si enggo mbalu ras hakim” (TB-LAI, “Perumpamaan tentang hakim yang tak benar”). Jelas i bas awal perumpamaan enda enggo ibenai alu pengantar guna ngajari ajar-ajar gelah ertoto rusur maka ola peltep pengarapenna (selalu berdoa dengan tidak jemu-jemu). I ja, i bas sada kuta lit sekalak hakm si la erkememalangen man Dibata dingen la erkeleng ate man manusia. Dingen lit ka sekalak diberu si enggo mbalu, si rusur ndahi hakim e gelah banci isampati hakim i bas perkarana nandangi imbangna. Ndekah hakim e la nggit nampati perkara diberu e, tapi perban rusur ia igangguna maka kedungenna ipejorena perkara diberu e alu alasaen gelah ola nari diberu e rusur reh dingen dungna iraukina ayo hakim e. Jadi alasenna semata guna dirina, labo erkiteken empati i bas persoalen si ialami diberu si enggo mbalu ndai. Ertina, lit ulih megenggeng ndai. Apai ka Dibata adi sibandingken ras hakim ndai. Sabab Dibatanta Dibata si perkeleng. Maka nina Yesus, “Ma ibegiken Dibata nge kalak pilihenNa si erlebuh suari ras berngi mindo penampat man baNa?” Dingen palasta ertoto e me kinitekenta man baNa, tek man Tuhan sabab ietehna kai si tebaik bas geluhta. Ula monce-once kinitekenta. Dung kenca ertoto, ragu denga kita kerna kai sipindoken kita man Dibata. Jakub 1:7 ngatakenca kalak si monce-once berarti ertupang ukurna; la ia ngasup muat keputusen i bas kerina si iahanna. Emaka la pada iarapkenna ndatken kai pe i bas Tuhan nari.

Tema i bas Pekan Doa wari terakhir “Megenggeng i bas ertoto”. Arah tema enda mulihi ipersingeti kita guna tetap bertekun i bas ertoto, ula ermedu-medu. Labo berarti kedungenna seolah-olah kita memaksa Tuhan gelah mereken rikutken si nipindoken kita. Sebage contoh, sakit keluarganta dingen sitotoken gelah malem. Reh dekahna sitotoken labo reh sehatna tapi pinakit ndai reh kelekna. Tapi terus kita berdoa gelah mujizat Dibata terjadi. Mungkin enggo banci siubah isi doanta, gelah Dibata mereken gegeh ras kemalemen ate i bas ngalaken pinakit e. Tetap paguh kiniteken amin sekali sakit reh kelekna. Emaka sekalak Teolog Richard Neibuhr pernah ertoto ras isi doana tuhu-tuhu menginspirasi e me kerna doa kedamaian (serenity prayer) : “Ya Tuhan anungerahkan kepadaku kedamaian untuk menerima hal-hal yang tidak dapat aku ubah, keberanian untuk mengubah hal-hal yang dapat kuubah dan kebijaksaan untuk mengetahui perbedaannya.”