PJJ GBKP Tgl. 19 - 25 Mei 2019

PJJ GBKP TGL. 19 - 25 Mei 2019

Pdt. Larena br. Sinuhadji (Nd. Rey Rapha Tarigan)

Tema : IPILIH, ITETAPKEN RAS IBERE KUASA (Markus 3:13-15)

(Persikapen Pemilihen Pertua Diaken)

Turi-turin Yesus memilih ras netapken sepuluh dua kalak jadi ajar-ajarNa labo bas bahan PJJ-nta sendah saja, tapi pe bas Injil Mat. 10:1-4, Luk. 6:12-16, termasuk pemanggilen Yesus man ajar-ajarNa secara pribadi (Mat. 4:16-20, Simon Petrus, Andreas ras Anak Zebedeus e me kap Yohanes ras Yakobus; Mrk. 1:16-20 idem, Mrk. 2:13-17 Yesus ndilo Lewi pemungut cuke; Luk. 5:1-11 Yesus ndilo Simon Petrus, rsd.). Judul i bas perikopta “Yesus milih rasul si sepuluh dua kalak” (terj. TB-LAI, “Yesus memanggil kedua belas rasul”).

Ituriken lawes Yesus ku datas uruk-uruk, janah diloNa kalak rikutken si payo iakapNa (“memanggil orang-orang yang dikehendakiNya”). Ertina, syarat si pemena lebe rikutken si payo iakap Tuhan, labo kita manusia. Ertina, Tuhan ingan persukuten, labo sura-suranta (labo erkiteken perkade-kaden, labo erkiteken ia kalak berpangkat entah bayak, tapi nggit melayani perpulungen Tuhan bdk. 1 Tim. 3:1-13). Kalak enda ndai merespon pendilo Tuhan (labo erpenulak) i ja reh kalak enda ndai ndahi Yesus. Banci jadi lebih sepuluh dua kalak si merespon pendilo Tuhan Yesus. Tapi kedungenna itetapken Yesus sepuluh dua kalak jadi rasul. Bagin enda penting guna jadi perhatian man banta, kerna merespon pendilo Tuhan, walau pe kedungenna 12 kalak ngenca itetapkenNa jadi rasulNa. Adi sikaitken enda bas pemilihen Pt. ras Dk. bas Gerejanta, maka calon Pt. entah Dk. dua kali jumlahna asangken serayan si niperluken. Tapi mekatep si terjadi guna ndarami calon e pe mesera, deba la lit. Bahkan si enggo terpilih jadi calon mundur kenca ipepilihken i Runggun. Erlajar kita arah perikopta enda, pendilo Tuhan e irespon walau pe kedungenna sepuluh dua kalak ajar-ajar ngenca ipilih Yesus. Arus lit sipeturah i bas dirinta keriahen ukur ras kemegahen ipercayaken Tuhan arah perpulungenNa jadi Calon Serayan. Soal terpilih la terpilih Tuhan nge si nentukenca.

Itetapken Tuhan Yesus sepuluh dua kalak jadi rasul gelah ras Yesus (menyertai Yesus). Ertina, kenca enggo itetapken jadi serayan arus tetap ras Yesus, sabab kita erdahin bas peken anggurNa. Sekalak Serayan arus tetap tading (tinggal) ras Yesus.  Janah iberekenNa tugas guna mengajar ras ibere Yesus kuasa guna mpelawes setan-setan. I bas Kitab Mat. 10:1-4 labo hanya mpelawes setan kuasa si ibereken Yesus tapi pe pepalem erbage-bage pinakit.

Rasul si sepuluh dua kalak e, erbage-bage latar belakangna. Lit deba penjala nurung (Simon Petrus, Andreas, Yakobus, Yohanes), lit deba pemungkut cuke (Lewi, Matius), pejuang entah pe pemberontak nandangi pemerentah Roma (Simon kalak  Zelot). Si deban la isingetken latar belakangna. Tapi si jelas, i bas Yesus memilih ajar-ajarNa i bas erbage latar belakang dingen labo i bas kalangen kalak hebat tapi si pasti nggit guna idilo Tuhan.

Tema : “Ipilih, itetapken ras ibere kuasa”. Tentu berbeda jaman Yesus ras jamanta genduari enda. Labo langsung Tuhan milih ajar-ajarNa, tapi Dibata memakai kita perpulungenNa guna milih serayanNa, secara khusus i bas konteks GBKP 5 tahun sekali. Ipilih sebage calon, kedungenna itetapken jadi Serayan. Berarti lit si la terpilih. Labo penting e man banta sabab kita imamat am (kerina kita, perpulungen) si enggo ngaloken perkuah ate Tuhan, idilo guna tetap ndalanken Tri-Tugas Gereja (bersekutku, bersaksi ras melayani). Tetapi lit si idilo Tuhan secara khusus guna ngelai IA i peken anggurNa (Pdt.,Pt., Dk.) si idiloNa guna mpekena-kena GerejaNa guna mperlengakapi perpulungen ni Tuhan gelah sikap (siap sedia) berpartisipasi guna majekken kula ni Kristus. Jadi adi la kita terpilih ola kitik ukur ras mela, tapi berpikir positif ras optimis, berarti i bas dampar si deban Dibata make kita guna ngelai IA.

Man Calon Serayan ula mundur, meriah ukurta ipilih Dibata kita guna jadi Calon SerayanNa, sirespon pendilo Tuhan e alu sukacita, subuk terpilih entah pe la terpilih kedungenna. Janah si terpilih, berarti itetapken Tuhan arah GerejaNa guna jadi Serayan. Man banta si mungkin enggo lebih sada periode (banci jadi melanjut ku periode berikutna) ergakenlah pemilihen Tuhan arah perpulungenNa alu tetap tutus ras setia melayani. Penungkunen evaluatif banci siajuken banta : “enggo me maksimal kudahiken tugas pelayanen enda alu dem kiniteruken ukur dekah aku melayani (1 - 4 periode)? Perubahen si mehuli kai si enggo kuban dekah aku melayani? Kontribusi kai saja si enggo kubereken guna mpekena kegeluhen bergereja?” Man si mbaru denga terplilih i bas periode enda, ula mbiar adi Dibata enggo milih kita, pasti iperlengkapiNa kita alu erbage si mehuli. Si penting meteruk ukurta guna nggit iperlengkapi subuk arah erlajar pribadi, mengikuti kursus dingen si terpenting membangun hubungen si mehuli ras Dibata si mada GerejaNa.

Sigejapkenlah kita la metunggung, labo layak tapi Tuhan si mpetunggungken kita. Man perpulungen, mari sisuksesken Pemilihen Pt. ras Dk. Periode 2019 - 2024 enda alu kita ertanggung jawab reh, dingen pilihlah calon si tuhu-tuhu nggit melayani ras nggit berkorban guna kemulian gelar Tuhan.