PJJ GBKP Tgl. 5 - 11 Mei 2019

PJJ GBKP TGL. 5 - 11 MEI 2019

Pdt. Larena br. Sinuhadji (Nd. Rey Rapha Tarigan)

Tema : BUJUR I BAS ERUSAHA (Amos 8:4-6)

Entrepreneurship : Palas Spiritualitas

Perikopta merupaken bagin i bas pengenehenen Amos si peempatken kerna buah pangan sada raga, janah secara khusus si jadi renungenta ibere judul “Keruntuhen Israel” (i bas Alkitab TB-LAI nina, “Peringatan terhadap orang yang mengisap sesamanya”). Jelas arah ogenta maka ituriken kerna kejahaten bangsa Israel, e me kerna perbahanenna si la bujur. Piga-piga hal icatatken i jenda :

• Ndedehi kalak si kekurangen dingen rusur ndarami dalan lako ngkernepken kalak musil.
• Mpekitik tumba pendayan.
• Mperberat anak timbangen penukuren.
• Make timbangen palsu guna nipui langganenna.
• Gandum si la erguna meganjang banna ergana.
• Ndarami kalak musil si la ngasup nggalari utangna subuk nggalar sepasang selop pe la ngasup je nari itukurna jadi budakna.

Rikutken kai si isuratken kitab Amos maka kejahaten si enggo ilakoken bangsa enda la ilupaken Tuhan janah ukumen Tuhan enggo nimai.

Tema i bas PJJ-nta “Bujur i bas erusaha”. Mungkin secara ekonomi kita bertanya, adina bujur i bas erusaha, me ndekah makana banci kita jadi kalak bayak? Penungkunenna banci ka ibaliken, adina bayak alu cara si la bujur me labo maba kemalemen ate man banta bahkan si reh rawa Dibata. Johanes Calvin bapa Gerejanta ngatakenca maka erdahin, erusaha e me panggilen Dibata man banta, sabab Dibata pe seh asa genduari erdahin (bdk. Joh. 5:17). Dingen erdahin, erusaha labo guna mpebayak diri, mpepulung erta, keberhasilen duniawi tapi guna memuliaken Dibata. Erta merupaken akibat sampingen i bas kita erdahin. Ertina, usaha entah pe dahin si idahiken kita kai pe profesi ras sikerjaken kita arus si ngena ate Dibata ras memuliaken Tuhan (Gloria Dei). Enggo pasti erbage-bage bentuk kecurangen, kinilabujuren la banci silakoken sabab enggo ertentangen ras kebenaren Firman Tuhan. Subuk make timbangen palsu, la dem timbangenna rikutken si ipindoken pelanggan, barang si itukur lit si macik (expired) entah la nari banci ipake (entah pe ipan) tanpa sepengetahuan si nukur, pake kuasa kegelapen (penglaris) gelah laris manis usahan, rsd.

Ogenta  jelas maka la ilupaken Tuhan i bas kejahaten si ilakoken kita. Kuan 11:3, “Kalak bujur itegu-tegu kebujuren, kalak perguak kernep erkiteken bualna”. Emaka geluhlah kita i bas kebujuren. Ipasu-pasu Tuhan tetap kalak si bujur. Secara doni memang banci tambah kinibayakenta ras kuasata asum sipake dalan si la bujur i bas erusaha (contoh caleg si erbahan money politic), tapi si e sesaat ngenca ras labo maba dame sejahtera man banta. Ula kita tergoda i bas ngelakoken cara-cara doni sabab perayakenta nggeluh labo hanya i bas doni enda saja tapi pe kenca kita lawes nadingken doni enda, kai pe si enggo silakoken kita sipertanggungjawabken man Tuhan.