PA Kategorial GBKP Tgl. 26 Mei - 1 Juni 2019

PA MORIA GBKP TGL. 26 MEI - 1 JUNI 2019

Nrs. Pdt. L. Sinuhadji (Bp. Rey Rapha Tarigan)

Tantangen : Kurang paham nggunaken IT

Ogen : Kejadin 6:9-22

Tema : MAKEKEN ULIH PEMETEH

Tujun : Gelah Moria :

1) Meteh kepentaren Nuah ngikutken perentah Tuhan

2) Pentar makeken duit guna usaha

Metode : Nuriken pengalamen nggunaken IT (Teknologi Informasi)/Nobar

Ogenta sendah akap kami enggo kerina kita meteh e me kerna turi-turin Nuah. Karakteristik Nuah ituriken i bas ay. 9 nina, “I bas jamanna, Nuah ngenca si mehuli, janah la lit kesalahenna. Ia erdalan i bas dalan Dibata”. I bas terj. TB-LAI nina, “Nuh adalah seorang yang benar dan tidak bercela di antara orang-orang sezamannya; dan Nuh itu hidup bergaul dengan Allah”. Ertina i bas ogenta sendah, kalak si benar i lebe-lebe Dibata ras manusia bage pe kalak si erdalan i bas dalan Dibata, tuhu-tuhu jadi hal si pentingna i bas turi-turin kerna Nuah ras keluargana.

Ituriken i bas ay. 11-13 maka i bas paksa e, kerina kalak (la termasuk Nuah ras keluargana) tuhu-tuhu jahat i lebe-lebe Dibata, janah i japa pe terjadi kejahaten. Manusia kerina enggo mbau lagu langkahna. Erkiteken doni paksa e enggo dem alu kejahaten, enggo itetapken Dibata ukumen man kerina manusia arah banjir si galang entah pe air bah.

Guna nelamatken Nuah ras keluargana, bagepe tinepa Dibata si deban, enggo ibahan Dibata sada rencana erbahan sada kapal. Kapal i jenda labo bagi kapal laut, tapi bagi ingan si banci mengambang i datas lau entah pe sada ingan si la banci kernep. Arus ibahan i bas kayu si nteguh nari (i bas terj. TB-LAI, “kayu gofir” nina, si la nari siteh kayu jenis kai). Gedangna 150 meter, belangna 25 meter, ganjangna 15 meter (i bas terj. BIS-BIMK nina, “133 meter panjangnya, 22 meter lebarnya, dan 13 meter tingginya”), ras kerina bahan-bahan si deban, sue ras kapasitas guna menampung Nuah ras keluargana bage pe tinepa Dibata si deban si ate Dibata arus iselamatken. Ilakoken Nuah kerina si iperentahken Dibata man bana amin pe mungkin melala tantangen si arus ihadapina erkiteken kai si ilakokenna e labo semal paksa si e.

Arah ogenta sendah iajuk kita gelah ngusih Nuah ras keluargana, jadi kalak si benar i lebe-lebe Dibata ras manusia, bage pe jadi kalak si erdalan i bas dalan Dibata. Si peduaken, teridah maka Dibata labo anti perkembangen teknologi, khususna si positif guna nampati manusia ras doni enda. Ertina kita pe arus nggit terbuka ras nggit erlajar (arah ise pe, termasuk anak-anakta) kerna perkembangen teknologi khususna i bas bidang informasi. I bas teknologi informasi enda genduari enggo terjadi perkembangen si pesat. Alat komunikasi si marenda i bas bentuk telepon si hanya banci igunaken ngerana jarak jauh, genduari enggo jadi telepon pintar si banci mengirim teks, foto, video, email, ngoge berita, igunaken guna transfer sen, nukur tiket, rsd., janah genduari enggo igunaken guna usaha entah pe bisnis online.

Tema i bas PA-ta sendah “Makeken ulih pemeteh” alu tujun gelah Moria meteh kepentaren Nuah ngikutken perentah Tuhan, janah pentar makeken duit guna usaha. Duit entah pe teknologi informasi hanyalah alat si sifatna netral. Si erbahanca duit entah pe teknologi e jadi negatif entah pe jahat e me manusia si erbahanca entah pe nggunakenca. I bas si e tentuna kita sebage pemakai sen entah pe teknologi arus ipalasi kepentaren i bas Dibata nari gelah bagi Nuah, ngasup makeken sen ras perkembangen teknologi alu mehuli. Ertoto kita kerna si e janah Dibata-lah si mpegegehi kita.