PJJ GBKP Tgl. 26 Mei - 1 Juni 2019

PJJ GBKP TGL. 26 MEI - 1 JUNI 2019

Pdt. Larena br. Sinuhadji (Nd. Rey Rapha Tarigan)

Tema : BERITAKENLAH! (Markus 16:19-20)

Mberitaken Berita Si Meriah e me tanggung jawab kalak si tek man Yesus Kristus. Ope Yesus keke i bas si mate nari, kurang lebih empat puluh wari icidah-cidahkenNa diriNa man ajar-ajarNa guna mpetetap ajar-ajarNa maka Yesus nggleluh i bas si mate nari, enggo italukenNa kematen, sabab lit deba ajar-ajar e la tek kerna kekeken Yesus Kristus (bdk. Mrk. 16.14). Kenca ipetetapNa ajar-ajarNa iberekenNa perentah man ajar-ajarNa guna  lawes niari doni enda ras mberitaken Berita Si Mehuli man kerina manusia. Janah i bas perikopta enda, kenca Yesus nangkih ku surga, idalanken ajar-ajar perentah Tuhan Yesus. Lawes ajar-ajar janah erberita ku japa pe (bdk. Perb. Rasul 1:8, “naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda”). I bas tugas si ibereken Tuhan, maka Tuhan ikut erdahin ras-ras kalak enda dingen nampatti ia i bas dahinna. Ertina, janji pengkawali ras penemani Tuhan tetap ibereken Tuhan man kalak si tek. Dingen asum tugas e idalanken, maka Tuhan tetap mperlengkapi alu tanda kuasa ras tanda sengget.

Tema i bas PJJ minggu enda “Beritakenlah!” Ras enda perintah. Kai si arus siberitaken? Enggo pasti Berita Si Meriah (Roma 10:15), Kabar Keselamaten (Perb. 13:26). Berarti adi Berita Si Meriah siberitaken, berita keselamaten siberitaken, si mberitaken lebe arus enggo ngaloken ras nggejapken maka ia enggo iselamatken Tuhan.  La mungkin adi kita sendiri pe ragu denga ras keselamatenta je nari kita erberita. Bas kita enggo selesai kerna keselamatenta ras nggeluh kita selaku kalak si enggo iselamatken Tuhan (hidup baru), alu bage la kita jadi batu antuken man kalak si deban. Sabab lit ka pernah viral pernyataan, “katangku e lah begiken, ula nen perbahanennku”. Berikutna si mberitaken arus lebe ia ermeriah ukur, ndatken sukacita arah Berita Si Meriah si enggo leben alokenna. Adi bas kita pe lenga dung (selesai) guna tetap bersukacita i bas kerina dampar geluhta enggo pasti hanya formalitas saja kita mberitaken Berita Si Meriah.

Berita Si Meriah si arus siberitaken labo hanya secara verbal (kata-kata) siberitaken, tapi pe arah kerina pengkebet geluhta. Ras ula sempat kita si lebih itonjolken asangken Kristus Yesus, sabab berita e kerina Kristus si enggo jadi Juruselamatta. Dave Thomas pendiri rumah makan Wendy’s pernah muncul lebih kurang 800 iklan TV. Ipromosikenna kerna rasa Hamburger man kerina pemirsa alu cara simpatik ras penuh humor. Terakhir usur ikatakenna maka ia hanya utusen, labo pesan itu sendiri. Termasuk kita, maka kita hanya penyampai pesan, isi pesan e kerna Kristus si enggo jadi Juruselamatta, berita kabar baik kerna kinulin si enggo ilakoken Yesus man manusia. Ula sempat kita mengambil alih pesan e menjadi berita kerna kita (bdk. 2 Kor. 4:5, “labo kerna diri kami si iberitaken kami, tapi kerna Yesus Kristus selaku Tuhan”). Kita dapat menjadi pemberita yang baik bagi Kristus saat kita tidak banyak berbicara tentang diri sendiri. Mari tetap sidalanken perentah Yesus enda sikap entah kurang sikap waktuna (bdk. 2 Tim. 4:2, “Pembarkenlah berita e, subuk tenteng ras la tenteng paksana terusken gelah beritaken”). Ertina, tupung bas kita pe sangana i bas keadaan susah pe situhuna je pe kesempaten man banta naksiken keleng ateNa, maka Dibata la pernah nadingken geluhta kalak si tetap ernalem baNa. Tuhan tetap nampati ras mperlengkapi kita alu erbage kepentaren ras kuasaNa asum siberitaken Berita Si Meriah.