PA Kategorial GBKP Tgl. 12 - 18 Mei 2019

PA MORIA GBKP TGL. 12-18 MEI 2019

Pdt. Larena br. Sinuhadji (Nd. Rey Rapha Tarigan)

Ogen : Masmur 122:1-9

Tema : IPEKENA MULIHI

Tujun : Gelah Moria :

1) Meteh kota Yerusalem si enggo ipekena mulihi alu susunen si mehuli ras serasi. 2) Erdiate nandangi rumah ras lingkungenna dingen mpekena-kenasa gelah mehuli ras serasi

Metode PA : Demontrasi Kebersihen Gereja

Perikop enda ibere judul “Pujin man Yerusalem” (TB-LAI, “Doa sejahtera untuk Yerusalem”) merupaken sada keriahen ukur si icidahken asum bangsa enda banci tading i Yerusalem bahkan bengket ku Rumah Pertoton Tuhan. Sabab Yerusalem selain sebage pusat pemerentahen, merupaken pusat keagamaan i ja kegiaten peribadaten kai pe ipusatken i Yerusalem. Perdalanan ku Yerusalem (ziarah ku Hollyland) i bas Padan Si Ndekah (PL) labo sekedar wisata (trend) bagi si genduari tapi merupaken sada ketetapen i bas Dibata nari (Ul. 16:1-17; Kel. 23:14-17).

Piga-piga point si banci siidah :

1) Sada keriahen ukur icidahken Pemasmur iiahken guna berkat ku Rumah Tuhan. Radu ras sieteh Pemasmur kalak si taat beragama, enggo pasti la pernah ia tading-tading i bas kegiaten keagamaan si ilakoken paksa si e. Tapi tetap teridah i jenda keriahen ukurna asum iiahken kalak guna berkat ku Rumah Pertoton Tuhan. Maka teridah i jenda nggeluh sikeleng-kelengen, saling mpersingeti sada ras si debanna.

2) Kota Yerusalem enggo ipekena mulihi alu susunen si mehuli dingen serasi. Labo terjeng bangunen secara fisik ipekena tapi geluh pertendin umatna pe enggo ipelimbarui. La nari ersembah ku dibata-dibata si deban, tapi ersembah man Dibata si mada kuasa. Kerina suku-suku ngataken bujur man Tuhan bagi si enggo iperentahken Tuhan.

3) Ay. 6-9, kesejahteraan kota Yerusalem menjadi inti i bas pertoton si iangkatken Pemasmur. Mejuah-juah dingen dame kalak si tading i Yerusalem. Ertina, arah bangunen fisik si sikap ras mejile, rikut kegeluhen spiritualitas umat pe enggo ipelimbarui, maka iarapken terjadi ketenengen nggeluh i Yerusalem. Raja dingen penguasa istana nggeluh i bas dame maka kedamen igejapken rayatna. Imam-imam ngerunggui ras memimpin alu mehuli maka umat Tuhan pe nggejapken kedamen e.

Secara khusus, pokok bahasen i bas PA-nta sekali enda me tanggung jawab Moria khususna i bas mpekena-kena lingkungen sekelewetna, termasuk Rumah Pertoton Tuhan ras kerina perlengkapenna. Sabab adi kurang mejile penataan, rikut kurang bersih banci mengganggu kita i bas khusuk beribadah. Umumna adi Gereja i kota enggo lit petugas kebersihen (koster) si ertugas guna mbersihken Gereja, maka ope ibadah lingkungen Gerejanta enggo bersih. Tapi lit ka gedung Gereja la terawat alu mehuli, i ja radu ras sampah ka i je kita beribadah ras bersekutu. Padahal kebersihan adalah cermin kalak si erkiniteken. Mulih kenca ibadah keadaan berbanding terbalik, sampah i japa pe. Banci jadi kurang tersedia tempat sampah, entah pe memang lenga lit kesadaren perpulungen membuang sampah pada tempatnya.

Arah PA-nta sekali enda mari mulihi sitingkatken peranta, khususna Moria guna mpekena-kena lingkungen Gerejanta, termasuk ruang Gerejanta walau pe enggo lit koster bas Gerejanta.

PA MAMRE GBKP TGL. 12 - 18 MEI 2019

Nrs. Pdt. L. Sinuhadji (Bp. Rey Tarigan)

MAMRE CENTER

Ogen : Lukas 5:15-16

Tema : Mamre Center e me ingan jumpa ras tole nandai sura-sura Dibata

Tujun : Gelah Mamre :

1) Nggejap kuga perluna ertoto (retreat) e me prioritas utama i bas nggeluh erkiniteken. 2) Erbahan komitmen guna ikut muat bagin mbangun Mamre Center

Bahan ogenta sendah nuriken kerna mujizat si ilakoken Yesus mpepalem kalak si sakit. I bas ay. 12-14 ipepalem Yesus sekalak dilaki si sakit gadamen. Kenca bage berita kerna Yesus si mpepalem kalak si gadamen ndai reh mbarna. E maka i bas ay. 15 ikataken nina, “nterem kalak reh megiken IA dingen mindo gelah ipepalemNa ia i bas penakitna nari”. I bas ay. 15 enda si jadi tekanen sue ras temata sendah e me, selain mpepalem kalak sakit Yesus pe mereken pengajaren man kalak si nterem janah kalak si nterem pe megiken pengajaren Yesus.

Ay. 16 nina, “Tapi ulin iakapNa IA lawes ku ingan si melenget, janah i je IA ertoto”. Ertina i tengah-tengah kesibukenNa, sempat denga Yesus ngadi kentisik guna ertoto i bas ingan si melenget. Piga-piga ayat si deban i bas Injil Lukas nurikenca maka rusur Yesus ertoto sekalak i bas ingan si khusus (bdk. Luk. 6:12; 9:18; 11:1). Kai si ilakoken Yesus enda mereken teladan man banta kerna pentingna ngadi lebe kentisik i bas kesibukenta si tep-tep wari guna : merenung, berefleksi, erbahan evaluasi kerna si enggo ilakoken, janah ertoto. I bas ngadi kentisik guna ertoto e nge situhuna rahasia gegeh Yesus seh makana ngasup melayani kalak si nterem.

PA-nta sendah i bas rangka Mamre Center alu tema “Mamre Center e me ingan jumpa ras tole nandai sura-sura Dibata”, si ertujun gelah Mamre nggejap kuga perluna ertoto (retreat) e me prioritas utama i bas nggeluh erkiniteken, bage pe erbahan komitmen guna ikut muat bagin mbangun Mamre Center. Arah tema bage pe tujun PA-nta sendah akap kami enggo teridah tujun ibangunna Mamre Center e me guna ingan pembinaan kiniteken khususna retreat. Retreat e me sada kegiaten pembinaan kiniteken si ibahan secara komunal (bersama-sama) i ja komunitas kalak si tek “mundur sejenak” nadingken kegiaten rutinna, berkat ku ingan si khusus (biasana ingan si melenget), guna merenung ras ertoto. Kegiaten retreat enda gundari enggo semal ilakoken perpulungen GBKP. E maka pembangunen Mamre Center enda arus sidukung.

Kegiaten retreat secara komunal labo banci ilaksanaken alu mehuli adi la lit bas kita pengalamen ngadi kentisik bagi pengalamen Yesus i bas ogenta sendah. Ertina retreat secara pribadi entah pe “saat teduh” seh kel pentingna bagi si nilakoken Yesus si jadi gegehNa guna melayani. Guna si e si pemena lebe, arus lit i bas kita kininggiten guna megiken pengajaren arah Kata Dibata, bagi kalak si nterem i bas ogenta sendah si megiken pengajaren Yesus. Si peduaken, arus lit bas kita komitmen ngelitken waktu khusus guna ngadi kentisik i tengah-tengah kesibukenta nari i bas sada wari guna merenung, berefleksi, erbahan evaluasi kerna si enggo ilakoken, ertoto, bage pe si berkaiten ras si pemena ndai, ngoge Pustaka Si Badia.