PA Kategorial GBKP Tgl. 19 - 25 Mei 2019

PA MAMRE GBKP TGL. 19 - 25 MEI 2019

Nrs. Pdt. L. Sinuhadji (Bp. Rey Rapha Tarigan)

SPIRITUALITAS MAMRE

Ogen : 1 Kronika 11:10-25; Perb. Rasul 23:1

Tema : NGELAI / ERDAHIN ALU PUSUH

Tujun : Gelah Mamre :

1) Meteh maka ngelai alu pusuh e me panggilen pelayanen Tuhan

2) Si ngelai alu pusuh e me erpalasken keleng ate Kristus, seh maka la pamrih i bas ngelayani

Ogenta sendah lit dua, si pemena nuriken kerna tentera Daud si terberita (terj. BIS - BIMK, “Pejuang-pejuang Daud yang terkenal”), turi-turin enda pe banci sioge i bas 2 Sam. 23:8-23. I bas ogenta lit empat kalak tentera si terberita si ituriken e me : Jasobeam ras Eleasar si termasuk i bas tentera “Si Telu”, kenca bage lit Abisai peminpin “Si Mbisa Telu Puluh” ras Benaya sekalak i bas “Si Telu Puluh” si iangkat Daud jadi kepala pengawal pribadina. I bas 2 Sam. 23:8-23 ituriken kerna tentera “Si Telu Si Terberita” e me Josep Basebet (peminpin “Si Telu”), Eleasar, ras Sammah. Selain “Si Telu” enda ndai lit Abisai peminpin “Si Telu Puluh Si Terberita” ras Benaya sekalak i bas “Si Telu Puluh” si ertugas jadi pengawal pribadi Daud. Lit perbedaan gelar antara turi-turin i bas 1 Kron. 11:10-25 ras i bas 2 Sam. 23:8-23, tapi akap kami banci saling melengkapi sada ras si debanna.

I bas ogenta si pemena enda ndai i bas ay. 10 ikataken, “Enda me daftar tentera Daud si terberita. Radu ras bangsa Israel si deban, tentera e nampati Daud gelah jadi raja. Sue ras si enggo ipadanken TUHAN, ijaga kalak enda maka kerajan Daud tetap megegeh”. Ertina ogenta si pemena nuriken kerna pengabdian si mehuli tanpa pamrih kerina pihak-pihak si nampati Daud jadi raja bage pe i bas njaga maka kerajan Daud tetap megegeh. Pengabdian tanpa pamrih enda i bas ogenta icidahken arah kinipangen tentera-tentera enda ndai berjuang alu resiko kebenen nyawana i bas ay. 17-18. Tapi pengabdian tanpa pamrih enda pe ibalas Daud alu penghargaan si ilakoken Daud i bas ay. 19.

Ogenta si peduaken Perb. Rasul 23:1 si nuriken kerna rasul Paulus si lit i lebe-lebe pengadilen agama Yahudi, ikataken Paulus i lebe-lebe anggota sidang e nina, “O senina-senina! Seh i bas wari enda aku tetap nggeluh alu pusuh peraten si bersih i lebe-lebe Dibata”. Si jadi penekanen e me “tetap nggeluh alu pusuh peraten si bersih i lebe-lebe Dibata”, i bas terj. bhs. Ind., nina, “aku tetap hidup dengan hati nurani yang murni di hadapan Allah”. Kerna kegeluhen rasul Paulus kenca enggo ia jera (bertobat) enggo radu ras siteh maka luar biasa perjuangenna i bas meritaken Berita Si Meriah, bahkan banci ikataken adi la lit rasul Paulus banci jadi Berita Si Meriah e labo seh man kerina kalak si labo kalak Yahudi. Enggo itehna kai resikona adi ia meritaken Berita Si Meriah, tapi tetap denga idalankenna alu pusuh peraten si bersih i lebe-lebe Dibata.

Jadi lit dua hal si penting i bas dua ogenta sendah e me : pengabdian tanpa pamrih ras pusuh peraten si bersih i lebe-lebe Dibata.

PA-nta sendah lit i teruh tema umum “Spiritualitas Mamre”, i bas tema khusus “Ngelai entah pe erdahin alu pusuh”, alu tujun gelah Mamre meteh maka ngelai alu pusuh e me panggilen pelayanen Tuhan, janah ngelai alu pusuh e me erpalasken keleng ate Kristus, seh maka la pamrih i bas ngelayani. Adi sikaitken ras ogenta sendah banci ikataken maka pengabdian tanpa pamrih ras pusuh peraten si bersih i lebe-lebe Dibata e me bagin si penting i bas spiritualitas kalak si tek, khusuna Mamre GBKP.

I bas si e tentuna jadi bahan refleksi entah pe evaluasi man banta kerina Mamre, khususna kita si jadi pengurus i bas kerina tingkaten (sektor, runggun, klasis, moderamen). Apakah lit i bas kita pengabdian si tulus tanpa pamrih bage pe pusuh peraten si bersih, entah lit denga kita si mengharapkan pujian, sanjungan, entah mencari keuntungan materi i bas pelayanenta? Adi lit tentuna perlu siperobahi, jadikenlah tokoh-tokoh i bas ogenta bage pe Yesus Kristus sebage usihen i bas kita melayani. Adi enggo lanai lit si bage-bage tentuna perlu terus sitingkatken kuantitas bage pe kualitas pelayanenta.

Melayani dengan hati tulus mengasihi seperti Yesus perlu terus sipelajari alu rajin ngoge Pustaka Si Badia bage pe silakoken alu terus melayani baik i bas gereja, rumah, pendahin, i japa pe kita. Gelah kualitas spiritualitasta semakin hari semakin meningkat tentuna arus sipindo gegeh i bas Dibata nari arah pertoton si ipenangkih kita secara teratur setiap wari. Dibata si mpegegehi kita.