PA Kategorial GBKP Tgl. 16 - 22 Juni 2019

PA MORIA GBKP TGL. 16 - 22 JUNI 2019

Pdt. Larena br. Sinuhadji (Nd. Rey Rapha Tarigan)

Ogen : Lukas 2:41-52

Tema : NGANTUSI ANAK I BAS KEGIATENNA

Tujun  : Gelah Moria :

1) Meteh kuga Yesus mereken pengangkan man orang tuaNa

2) Ngajuk anak ngikuti dahin-dahin Gerejawi ras la eraru ate tupung anak e ngikuti kegiaten Gereja (PIARA)

Metode PA : Diskusi/Aksi

Keluarga Yusuf e me keluarga si taat beribadah, dingen saleh. Hal enda banci siidah i bas ayat-ayat sope si jadi perikopta. Yesus isunatken umur waluh wari (ay. 21), ipersembahken man Tuhan i Rumah Pertoton i Yerusalem (ay. 22-23) ras i bas perikopta enggo Yesus iajak orang tuana guna ngikuti perayaan Paksah bagi semalna tiap tahun orang tua Yesus berkat ku Yerusalem guna perayaan Paskah, i bas umurna enggo 12 tahun (anak Taurat). Kenca dung perayaan e, mulih ia, tapi Yesus tading i Yerusalem. I jenda me mulai turah persoalen. La sedar orang tua Yesus maka Yesus tading i Yerusalem, akapna kin sangana erdalan ras kalak si nterem. Sabab memang biasa secara rombongen, anak kuta, ras teman-temanna. Kenca enggo sada wari je maka enggo orang tuana sedar, maka idaramina ku kade-kade ras temanna. Perban lalap la jumpa, maka mulihken Yusuf ras Maria ku Yerusalem ndaramisa. Banci siidah i jenda kepedulian si luar biasa i bas Yusuf ras Maria, daramina seh dat, bahkan mulihken ku Yerusalem. La nari ukurina latih.

Puji Tuhan i bas wari peteluken idapetiNa Yesus sangana kundul ras guru-guru agama Yahudi i Rumah Pertoton. Alu tutus ibegiken Yesus pengajaren guru-guru e, janah isungkuniNa pe. Janah adi nungkun guru-guru e man Yesus, ijabapNa alu dem kepentaren, si erbahanca mamang ate kalak kerina si megi jawaben Yesus. Orang tuana sendiri pe mamang ngidah kepentaren Yesus. Emaka nina Maria “O Anakku, ngkai maka bagenda perbahanenNdu man kami? Aku ras bapaNdu enggo ndarami Kam alu aru ate.” Tuhu-tuhu cemas kel Maria asum la nari idahna anakna. Tapi jawaben Yesus mungkin banci ikataken kurang sopan tapi situhuna lugas (tepat, to the point), “Engkai maka idaramindu Aku? La kin ietehndu Aku arus i Rumah BapangKu?" Walau pe situhuna, arah jawaben Yesus icidahkenNa atena maka selain IA anak Yusuf ras Maria, IA pe Anak Dibata. Kenca dung si e, maka radu mulih Yesus ras orang tuaNa ku Nasaret, si nuduhken tetap IA patuh selaku anak, ibegikenNa kata orang tuaNa. Yesus reh belinna dingen reh tambahna pemetehNa, janah reh tambahna pe ngena ate Dibata ras manusia.

Pesan kai si banci sidat kita arah perikop enda? Si pemena, orang tua Yesus tuhu-tuhu mediate nandangi kiniteken anakNa, selain i bas jabu pe iajarken kerna Firman Tuhan, ipetandankenna pe kerna Rumah Pertoton ras tradisi-tradisi si semal irayaken. Melala orang tua si genduari lalai (absen, la peduli) guna mabai anakna geluh erkiniteken man Tuhan, subuk i tengah jabu bage pe mabai ku Gereja benaken kitik-kitik nari. Banci jadi awalna anakta la nggit sebab riahen akapna nonton TV entah main game, tapi otoritas tetap lit bas kita orang tua, tupung anakta kitik denga. Sabab ‘di kenca enggo galang sisuruh entah sipaksa ia ku Gereja enggo pasti erlangna.

Si peduaken, Yusuf ras Maria sebage orang tua si mereken tanggung jawab ras kemandirian man Yesus sekaligus tuhu-tuhu aru ate asum la nari idahna anakna. Lit orang tua la berekenna kepercayaan ras kemandirian man anakna. Alu alasen terlalu sayang ras mbiar erkiteken pengaruh jaman, orang tua memproteksi anakna secara berlebihan. Piah dungna anak bertumbuh menjadi manja ras kurang mandiri. Lit ka orang tua si sama sekali la peduli kerna pergaulan, ras kebutuhen anakna. Anak-anak bertumbuh kurang kasih sayang, piah dungna jadi terbawa arus jaman anak-anakta.

Si peteluken, Yesus tetap i bas bimbingen orang tuana si tuhu-tuhu mperdiateken subuk kerna kebutuhen jasmani, rohani, karakterna, mentalna, si erbahanca ngena ate Dibata ras manusia (bdk. ay. 40, “Anak e reh belinna dingen reh gegehna; pentar IA janah tetap ipasu-pasu Dibata”).

Tema : “Ngantusi anak i bas kegiatenna”. Erbage-bage caranta orang tua guna ngarak-ngarak anak-anak, rikutken fase perkembangenna ras sifatna. Si paling penting seimbang sibereken kai si jadi kebutuhenna, subuk kulana, pertendin, karakterna, mentalna. Janah si menguntungken jaman genduari melala informasi kerna parenting (menjadi orang tua si mehuli) subuk arah sosial media, buku-buku, ceramah parenting bage pe materi i bas PA Moria. Ertina, nampati kita sebage orang tua uga arusna ndalanken tanggung jawabna gelah reh ulina wari lepas wari.

Tanggung jawab e pe icidahken arah mereken kesempaten man anak-anakta terlibat i bas kegiaten-kegiaten Gerejawi, khususna si kentisik nari ilakoken se-GBKP eme PIARA (Pesta iman anak ras remaja). Sada kegiaten si banci membangun kiniteken, kemandirian ras nambahi teman (bersosialisasi) man anak-anakta. Belajar untuk mau berbagi, menjaga kesehaten dengan makan dan istirahat yang teratur, rsd. Ertina, adi ikutina alu tutus, tentu mbue manfaatna man bana bage pe man temanna si debanna si la ikut si banci ka ibagikenna. Tema tahun enda “Kesatuan dalam kepelbagaian” (Unitiy in diversity). Sabab adi megermet kita enggo mulai terjadi pengotak-kotaken, kelompok-kelompok dingen kurang kiniersadan. Paling tidak anak-anakta ibabai guna menyadari maka kita erbage-bage (suku, agama, sifat, idiologi, rsd.), tapi kita tetap sada, NKRI harga mati! I bas kinierbagen si lit uga kita banci saling melengkapi ras menghargai. Alu bage sidukung kegiaten enda, alu tetap notokenca kegiaten erdalan alu mehuli, sibereken pedah si mehuli man anakta gelah tutus mengikuti kerina rangkaian acara, sidukung arah dana. Ula siambati anak-anakta bertumbuh ku arah si mehuli.

PA MAMRE GBKP TGL. 16 - 22 JUNI 2019

Nrs. Pdt. L. Sinuhadji (Bp. Rey Rapha Tarigan)

MAMRE ERDIATE, MAMRE ERPEMERE! BEASISWA MAMRE

Ogen : Kuan-kuanen 11:24-25

Tema : Melumbar I Bas Nampati

Tujun : Gelah Mamre :

1) Sedar biakna selaku kalak melumbar

2) Ertanggung jawab lako nampati

Metode : Diskusi

Ogenta sendah termasuk i bas perikop bindu 10 alu judul “Pertenget Salomo” i bas TB-LAI nina “Kumpulan amsal-amsal Salomo” ras i bas BIS-BIMK nina “Petuah-petuah Salomo”. Pertenget si ibereken Salomo enda polana kontras, i ja kai si ilakoken ras si idatken kalak si bujur, benar, pentar ikontrasken ras kalak si la bujur, bodoh, jahat. I bas si e melala pertenget si ibereken Salomo si maun-maun bagi la lit hubungenna sada ras si debanna tapi tuhu-tuhu banci nampati si ngoge erkiteken pertenget si ibereken Salomo enda sifatna praktis si terjadi i bas kegeluhen si tep-tep wari.

Secara khusus i bas ogenta sendah ngerana kerna kinibayaken ras melumbar mere, nina “Lit kalak si melumbar mere, tapi tambah-tambah kebayakenna, lit kalak degil, tapi tambah-tambah kemusilenna. Melumbarlah mere maka kam reh bayakna, sampatilah kalak maka kam pe isampati.” I bas terj. BIS-BIMK nina “Ada orang suka memberi, tapi bertambah kaya, ada yang suka menghemat, tapi bertambah miskin papa. Orang yang banyak memberi akan berkelimpahan, orang yang suka menolong akan ditolong juga.” Kalimat si pemena ncidahkenca kinata geluh, i ja lit kalak si melumbar mere tapi la pernah kekurangen i bas kai pe, sebalikna, lit kalak si pelit (kikir, terlalu irit) amin pe bayak ia, si ertambah labo ertana tapi kemusilenna. Kalimat si peduaken pengajuk man si ngoge gelah melumbar mere sebab Dibata pasti nampati kalak si melumbar mere alu cara Dibata.

Erbage cara Dibata i bas mperdiateken kalak si ernalem man baNa, i bas ncukupi kebutuhen geluh kalak si tek umpamana, pasu-pasu Dibata simpar alu pendahin kalak si erkiniteken, selalu lit kalak si deban si ipake Dibata guna nampati, rsd. Selain si e, lit ulih non material si ibereken Dibata man kalak si tek si melumbar mere : dame sejahtera, kemalemen ate, pengataken bujur (ada rasa bersyukur), keriahen ukur, rsd. Sebalikna kemusilen labo saja erkaiten ras erta, tapi musil non material : la lit pengataken bujur, la lit keriahen ukur, geluhna la tenang rusur lit i bas kebiaren, sitik ngenca temanna, sitik si nggit mperdiateken, terlalu perhitungan, lit sifat kurang-kurangen entah pe la bias soal erta amin pe triliunen ertana bas bank, rsd. Banci sibayangken uga latihna kalak si bage rupana.

Ogenta sendah akap kami lit hubungenna ras bindu 10:22 nina “Erkiteken pasu-pasu Dibata nge maka kalak jadi bayak, erdahin erbintuas labo nambahi kebayaken.” Ertina adi ngerana kita kerna kebayaken entah pe kiniliten material, si pemena leben arus lit palas kiniteken i bas kita maka kerinana erkiteken pasu-pasu Dibata labo erkiteken kebeluhen entah pe kehebatenta. Umpamana, ipediat Dibata geluhta la lancar, entah pe iijinken Dibata reh sakit pinakit mekelek i bas geluhta padahal sangana jaya-jayana karirta ras melala senta. Tentu senta si melala ndai keri erkiteken pinakitta. Si peduaken, lit tujun Dibata maka ipercayakenNa kiniliten entah pe kinibayaken i bas kita, e me guna mpermuliaken gelar Dibata i tengah doni enda : mperdiateken kalak si musil, mere man si kekurangen entah pe membutuhken, rsd. (bdk. 2 Kor. 9:8; rsd.). Si peteluken, kinibayaken labo saja soal erta doni, tapi kerina karakter si mehuli sue ras peraten Dibata : ramah, peduli, murah hati, mejingkat nampati, nggit erkorban, rsd. (bdk. 2 Kor. 8:2; rsd.). Ertina si musil secara erta doni pe banci denga ia melumbar mere, la lit alasen guna la melumbar mere.

PA-ta sendah lit i bas tema umum “Mamre erdiate, Mamre erpemere! Beasiswa Mamre”, tema khusus “Melumbar i bas nampati” alu tujun gelah Mamre sedar biakna selaku kalak melumbar, janah ertanggung jawab lako nampati. Adi sipake logika doni enda tentu tema ras tujun PA-ta sendah labo masuk akal, sebab adi melumbar kita tentu ertanta semakin berkurang. Janah logika doni enda, kalak si sukses e me kalak si percaya diri alu mengandalkan kebeluhenna, kehebatenna, ras kinibayakenna. Tapi adi kalak si erkiniteken man Dibata labo kebeluhenna, kehebatenna, ras kinibayakenna si iandalkenna tapi Dibata. Amin pe mungkin secara doni enda beluh ia, hebat ia, janah bayak ia, tapi tetap meteruk ukur ia, iandalkenna Dibata i bas geluhna.

Kerina kalak si tek man Dibata i bas Yesus Kristus, enggo ibereken Dibata kapasitas guna melumbar mere, labo saja mere erta doni, tapi pe mereken kerina si mehuli sue ras peraten Dibata. Emaka radu ras sitingkatken kuantitas ras kualitas i bas kita erdiate, erpemere, adi memang lit program beasiswa Mamre tentu arus semakin itingkatken jangkauanna. Dibata si mereke gegeh man banta kerina.