PJJ GBKP Tgl. 03 - 09 Maret 2019

PJJ GBKP TGL. 03 - 09 MARET 2019

Pdt. Larena br. Sinuhadji (Nd. Rey Rapha Tarigan)

Tema : “AKU SURUHLAH AKU” (Jesaya 6:1-8)

(Persikapen Pemilihen Calon Pertua Diaken)

Megati kita isuruh ras megati ka kita nuruh kalak si deban. Umpamana adi sisuruh anakta guna ndahiken sada-sada hal, si erbahanca  latih ukurta adi si isuruh la ia nggit. Sisuruh anakta uekenna tapi la dahikenna. Umpamana, “Ia Mak, beres Mak!” Pedas kel uekenna, tapi lalap ia main-main. Uekenna, dahikenna tapi la beres, gelah menggo, tambah ka jungut-jungut. Tapi lit ka anakta malem ateta banna, uekenna, beres ka banna dahin e, bahkan lit ka deba anakta e bage nina, “Kalau perlu, Mamak, Bapak panggil aja aku ya Mak”. Malem kel ateta, ieteh anakta muat ukurta.

Bagem me gambaren i bas Dibata ndilo kita anak-anakNa gelah banci kita jadi perpajangen tan Dibata guna mpekena-kena doni enda, menyuarakan suara kebenaran Tuhan. Ate Dibata gelah kita ngueken pendiloNa. Bage si enggo ibelasken Yesaya, “Enda aku Tuhan, suruhlah aku!” Ertina lit i je sada kebersediaan, kininggiten guna ngaloken ras ndahiken tugas e, subuk si menyenangken entah pe si mberat. Janah bahan PJJ-ta sekali enda mulihi mpersingeti kita, mpekeke ukurta guna tetap semangat i bas ndalanken pendilo Tuhan e.

Yesaya idilo Tuhan jadi nabi, ikaitken ras kematen raja Usia. Adi sioge 2 Raj. 15, i bas masa pemerentah raja Usia i ja umur 16 tahun ia enggo jadi raja, janah kidekah 52 tahun ia memerentah jadi raja. Memang tangtangna ia jadi raja, luar biasa pembaharuan si ibahanna, tapi la total pembaharuan si nilakokenna. Ingan ersembah man dibata-dibata si deban la radasken, arah si e mabai bangsa Israel ersembah man dua dibata. Termasuk pemimpin-pemimpin pe mbue la jadi contoh. Si lit sen ngenca kasusna ibelana, bahkan la lit kebujuren. Si megegeh nindes si la megegeh. Secara ekonomi, politik, keamanan, sosial, banci kataken “carut-marut”. I bas situasi si bagenda me Dibata ndilo Yesaya jadi suruh-suruhenNa.

Icidahken man banta i bas sada pengenehenen, idahna Tuhan i bas Rumah Pertoton. IA sangana kundul i bas kursi kemulianNa, jubahNa ndemi kerina Rumah Pertoton. I sekelewetna lit tedis Malekat Serafim, si ernala-nala bagi api, lit 6 kabengna (dua nutupi ayona, nahena, dua nari guna ia kabang). Sialon-alon kerina Malekat Serafim e rende muji Tuhan, “Badia, badia, badia Tuhan si mada kuasa badia kap, doni enda dem alu kemulianNa”. Bagem bagi sora koor, merdu, erbolo-bolo, seh makana palas Rumah Pertoton e mugur-ugur ibahan sorana janah Rumah Pertoton dem alu asap.

I bas perjumpanna ras Tuhan, sedar Yesaya kerna dirina, sedar ia kerna Dibata mada kuasa si enggo idahna, minter iungkapkenna, “Cilaka me aku!” Itandai Yesaya dirina kalak si perdosa, meluat, tiap ranan si mentas i bas biberna nari dosa kerina, bahkan tading bas lingkungen si perdosa ka. Penggejapen kerna dosana secara pribadi, kinilatungungenna, janah dosa bangsana. Kenca idahna Tuhan, lanai iakapna ia metunggung, la layak. Kenca bage sada i bas Malekat Serafim ndai kabang ndahi Yesaya. Ibabana rara si ibuatna i bas batar-batar persembahen nari alu jepit-jepit. Ikuitna biber Yesaya alu rara ndai, je nari nina, “Rara enda enggo ngkenai biberndu, e maka genduari salahndu enggo masap janah dosandu enggo ialemi.”

Api e me sada lambang penyucian, pembersihen. Yesaya isuciken alu api sebage lambang ia enggo ibersihken, ikudusken, seh makana la nari seri ia ras situasi sekelewetna. Yesaya nggejapken, ia siawalna la metunggung, enggo ipetunggungken Tuhan, lit proses perdamaian arah pengalemi dosa i bas Dibata nari, si erbahanca gundari lit perbedaanna, lit gegeh si mbaru, semangat si mbaru. Yesaya ijadiken Tuhan Yesaya si mbaru, tampil beda ras kalak si deban. Emaka nina Tuhan, “Ise enda Ku suruh, ise si nggit maba berita i bas Aku nari?”E maka minter ialoi Yesaya, “Enda aku Tuhan, suruhlah aku!” Igejapi Yesaya Tuhan si petunggungken Ia, si melayakken Ia, si mereken gegeh, makana pang ia ngatakenca “i jenda aku Tuhan suruhlah aku!” (di sini aku, dan ini aku).

Proses bagi si ialami Yesaya enggo sialami. Kita enggo ibersihken, iselamatken bahkan enggo ibereken Tuhan Kesah Si Badia erdahin i bas kita si tetap mpelimbarui geluhta, si nampati, si mpegegehi, si ngapuli. Ertina, iperlengkapi Tuhan kita, la kita itadingkenNa. Tapi melala kita la sitandai banta, la sieteh ngataken bujur. Ntah pe sitandai banta, tapi la kita nggit reh ku Tuhan guna ipelimbaruiNa (direstorasi, diubahkan Tuhan). Mungkin lit kita si ngatakenca, “Ia ah aku melala denga dosangku, la aku layak ku Gereja”. Padahal gereja bukan untuk orang yang bersih tapi kalak si igejapina ia mbue ngelakoken kesalahan, la metunggung, Tuhan ngenca alu keleng ateNa banci mbersihken Ia i bas kerina dosa nari. Penandaita kerna Tuhan merupakan dasar i bas kita banci nandai banta, kita kalak perdosa. Desken pengalamen Yesaya asum ia berhadapan ras Tuhan. La lit dosa si banci ibuniken asum kita jumpa ras Tuhan.

Perkuah ate Tuhan beliden asangken dosa-dosanta. Uga pe belinna dosa-dosanta, Tuhan la pernah nadingken kita. Sekalak teolog i Jerman nari Dietrich Bonnhoefer ngatakenca, “Grace is free, but is not cheap”. Anugerah Tuhan itu memang diberikan secara gratis (free) tetapi itu bukan anugerah yang murahan (cheap) karena di dalamnya ada satu pribadi tidak berdosa dan tidak bercela yang harus mati, mencurahkan darahNya menanggung dan mengampuni dosa-dosa kita. Pengangkan si bagenda rupana mabai kita nggit guna ipake Tuhan, jadi perkakasNa, ibenaken i bas jabunta nari, terus ku sektor, inganta erdahin, sekolah, i japa pe (terpanggil kita, kepate kita). Kisah Bob Bufford, CEO Bufford Television, ngatakenca : 1) Hidup yang bermakna adalah bukan hanya sekedar sukses, diberkati, tetapi juga berbagi kesuksesan dan berkat bagi orang lain. 2) Hidup yang bermakan bukan sekedar puas diri, tetapi membuat orang lain yang berinteraksi dengan kita merasakan kepuasan yang sama (Labo kita ngenca puas tapi kalak menderita siban). 3) Hidup bermakna itu jika kita tahu apa tujuan Tuhan menempatkan kita di dunia ini, yaitu memberitakan kabar baik, sukacita, memuliakan Tuhan. Secara khusus, i bas kita genduari mpersiapken diri guna pemilihen Serayan Tuhan i GBKP, Pertua ras Diaken periode 2019 - 2024. Mekatep si terjadi la lit calon e bas sektor nari alu alasen : mbiar, la lit pemeteh, sibuk denga, rsd. Segala macam alasen siban gelah ula kita i je. E maka labo bagi ungkapen Yesaya siban, tapi “I jenda aku Tuhan, suruhlah ia.” Ise-ise labo siakap dalih asal ula kita. Seharusna pengataken bujurta man Tuhan memotivasi kita guna nggit erdahin i bas peken anggurN. Adi soal pemeteh, kebeluhen ras kepentaren Ia nge simperlengkapisa. Si penting nggit lebe ras meriah ukurta.

Enda aku Tuhan suruh aku menjadi semangat i bas kita ndahiken pendilo Tuhan, Lit i je niat, kesedian, kesungguhan, komitmen, kosistensi (la mburlah-mburlih), sebab idahiken subuk senang, susah, bagi ukur ntah la bagi ukur, ula meros, ula menggo, ula mbue alasen. Termasuk kita si enggo ibereken Tuhan tugas khusus genduari pe tetap sitingkatken pelayanenta, ula i bas periodisasi ngenca lit i je kinijingkaten sitik. Dibata si telu sada tetap erdahin guna mperlengkapi kita, nampati kita.