PA Kategorial GBKP Tgl. 03 - 09 Maret 2019

PA MAMRE GBKP TGL. 03 - 09 MARET 2019

Nrs. Pdt. L. Sinuhadji (Bp. Rey Rapha Tarigan)

(Berwirausaha Dalam Meningkatkan Ekonomi)

Ogen : Epesus 2:8-10

Tema : ERDAHIN E ME AMANAH DIBATA

Tujun : Gelah Mamre :

1) Meteh maka erdahin e merupaken pendilo Dibata (erdahin e me ibadah, amanah/mandataris Dibata)

2) Ndahiken pendahinna alu tutus

Metode : Sharing

Perikop i bas bahan ogenta sendah e me “I bas kematen nari ku kegeluhen”, secara umum nuriken kerna gambaren kegeluhen perpulungen kalak si tek i Epesus sope ngaloken keselamaten i bas Dibata nari : mate pertendin, ngikutken kebiasan doni si jahat, ngikutken kalak si la nggit patuh man Dibata, nggeluh ngikutken kerina si jadi sura-sura kulana ras ukurna. Erkiteken si e patut nge kalak si bage geluhna ngenanami pernembeh Dibata. Tapi erkiteken perkuah ate Dibata si la ersibar ras keleng ateNa si mbelin kel, ipegeluhNa mulihi kerina kalak ertobat ras si tek radu ras Kristus. I bas persadan ras Yesus ipekeke Dibata kalak si tek ras Kristus, janah ipekundulNa kerina kalak si tek ras IA i bas ingan si meganjang.

I bas si e rasul Paulus ngingetkenca maka keterkelinen kalak si tek labo bekas perbahanen entah pe ulih perbahanenna, tapi erkiteken lias ate Dibata entah pe pemere Dibata. I bas si e labo lit dalanna ise pe muji bana. Emaka iajuk rasul Paulus perpulungen Epesus gelah lebih berkonsentrasi ku bukti nyata kiniteken i bas kegeluhen si tep-tep wari. I bas ay. 10 ikataken rasul Paulus nina, “Tinepa Dibata kap kita; i bas persadanta ras Kristus Yesus, ijadikenNa kita guna ndahiken dahin-dahin si mehuli si enggo leben irencanakenNa, gelah sidahiken e”. Akap kami enda nge si jadi fokus ogenta sendah. I bas kiniersadanta ras Kristus, ijadiken Dibata kita guna ndahiken, dahin-dahin si mehuli si enggo irencanaken Dibata man banta. I bas bhs. Ind. nina, “Allah membentuk kita supaya kita melakukan hal-hal yang baik yang sudah dipersiapkanNya untuk kita”. Ertina bentuk-bentuk perbahanen si sue ras peraten Dibata e enggo lit, tading silakoken i bas geluhta si tep-tep wari gelah i bas si e melala kalak si lit i sekelewetta tuhu-tuhu banci ngenanami keselamaten si holistik i bas Yesus Kristus.

Tema si seh man banta e me, “Erdahin e me amanah Dibata”. Alu tujun gelah Mamre meteh maka erdahin e merupaken pendilo Dibata (erdahin e me ibadah, amanah/mandataris Dibata), ras ndahiken pendahinna alu tutus. Dasar teologis kerna erdahin akap kami enggo rusur sibahas. Melala ayat-ayat i bas Pustaka si jadi palas guna kita tutus erdahin, umpamana, Kej. 1:28, Kuan. 6:6, Yoh. 5:17; 6:27, Ep. 4:28, rsd. Adi rikutken ogenta sendah, erdahin labo saja guna ndatken sen guna ncukupi kebutuhen geluhta, tapi erdahin i jenda si utamana e me guna ngelakoken kerina si jadi peraten Dibata i japa pe, i rumah, i bas ingan pendahinta, i bas kerina jenis usaha si ilakoken kita, termasuk i bas kita berwirausaha.

I bas minggu si lepas kita enggo membahas kerna enterpreneurship entah pe wirausaha, janah si lebih pas akap kami e me socialpreneurship, e me model bisnis si bermanfaat guna pemberdayaan masyarakat sekitar. Hasil yang ingin dicapai bukan keuntungan materi atau kepuasan pelanggan belaka, melainkan bagaimana gagasan yang diajukan dapat memberikan dampak yang baik dan positif bagi pengembangan masyarakat di sekitar kita. Ertina i bas wari si sendah iajuk kita gelah : 1) Geluh erkiniteken labo terpisah ras kegeluhen si tep-tep wari, i japa pe kita, seri si idahiken kita e me kerina si jadi peraten Dibata. 2) Ketutusenta erdahin teridah arah hasil pendahinta si banci jadi pasu-pasu labo saja man dirinta tapi terutama man kalak si deban i sekelewtta.