PA Kategorial GBKP Tgl. 17 - 23 Maret 2019

PA MORIA GBKP TGL. 17 - 23 MARET 2019

Nrs. Pdt. L. br. Sinuhadji (Bp. Rey Rapha Tarigan)

PEMILIHEN PERTUA & DIAKEN

Ogen : 1 Samuel 16:1-7

Tema : MPERSUKUTI DIBATA I BAS MILIH SERAYAN

Tujun : Gelah Moria :

1) Meteh Samuel tetap ersukuten man Dibata i bas milih SerayanNa

2) Milih Serayan erpalasken sura-sura Dibata

3) Meteh maka dahin milih Serayan Tuhan e me persuruhen Dibata

Metode : Perenungen (Paksa Teneng)

Ogenta sendah nuriken kerna Daud si ipilih jadi raja. Akap kami ogenta sendah enggo biasa sibegiken kita. Ituriken maka raja Saul enggo itulak Dibata erkiteken enggo lanai ersukuten man Dibata. Kerna salah lepak raja Saul banci sioge 1 Sam. 13 ras 15. Samuel pe ceda atena erkiteken perbahanen Saul. Emaka enggo itentuken Dibata raja si bakal nggantiken Saul. Nina Dibata, “genduari buatlah minak saitun jenari laweslah ku Betlehem ndahi Isai, sabap enggo Kupilih sekalak anakna jadi raja”.

Kenca enggo seh i rumah Isai, ituriken i bas ay. 6 nina, “idah Samuel anak Isai, Eliap gelarna, jenari nina i bas ukurna, “Si enda, si tedis i jenda i bas adep-adepen TUHAN, la banci lang enda me si enggo ipilihNa”. Tapi nina Tuhan i bas ay. 7, “Ola nehen kuga gedangna ras kuga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna”. Terj. TB-LAI nina, “Janganlah pandang parasnya atau perawakan yang tinggi, sebab Aku telah menolaknya. Bukan yang dilihat manusia yang dilihat Allah; manusia melihat apa yang di depan mata, tetapi TUHAN melihat hati”.

Si jadi fokus akap kami i bas ogenta sendah e me ay. 7, si intina, manusia cenderung ngenehen fisik entah pe si teridah arah darat nari, tapi si inehen Tuhan e me pusuhna (hati) i bas milih sekalak pemimpin entah pe sekalak persuruhen Dibata. Si menarik i bas ay. 7 enda, “perawakannya yang tinggi” enggo lanai jadi kriteria sekalak pemimpin, sebab sope Daud, Saul igambarken sebage sekalak si sempurna secara fisik. I bas 1 Sam. 9:2, ituriken nina i bas terj. TB-LAI, “Saul, seorang muda yang elok rupanya; tidak ada seorang pun dari antara orang Israel yang lebih elok dari padanya: dari bahu ke atas ia lebih tinggi dari pada setiap orang sebangsanya”. Amin pe salah perkiraan Samuel, tapi tetap ia ersukuten man Dibata ras ndalanken kerina proses penangkuhen Daud jadi sekalak raja nggantiken Saul.

Kai ertina maka si inehen Dibata e me pusuhna? Ertina si paling penting i bas sekalak pemimpin entah pe persuruhen Dibata e me nggit ia tuhu-tuhu ersukuten man Dibata. I bas bhs. Ind. kira-kira, “memiliki hati yang taat serta mau belajar dan diajar oleh Allah”. Kriteria si bagenda rupana lit i bas diri Daud. I bas ay. 13 ituriken maka kenca enggo iminakina Daud, rempet Daud ikuasai Kesah Tuhan, janah Kesah e tetap ras ia. Em tandana maka Daud sekalak si taat, nggit ia erlajar ras iajari Dibata.

PA Moria sendah i bas rangka persiapan pemilihan pertua diaken si melayani i bas peken anggur Tuhan i GBKP. Kerna palas i bas kerina proses pemilihen pertua diaken i bas GBKP bage pe kerna kriteria pertua diaken ras hal teknis i bas pemilihen akap kami enggo isosialisasiken i bas Runggunta masing-masing sue ras pengelayasi si enggo ikirimken Moderamen nari. Salah sadana lit i bas bagin tengah buku PJJ-ta. Akap kami perlu ka terus sipelajari pengelayasi e gelah reh tangkasna man banta kerna pemilihen pertua diaken i bas GBKP.

Sue ras ogenta sendah, palas i bas kita milih tentuna si pemena lebe enggo genduari nari sitotoken. Ersukuten kita man Dibata i bas kita  milih. Ertina labo kita asal milih, kenca enggo tuhu-tuhu siukurken ras sinen ketutusenna i bas pelayanen, maka sitotoken pilihenta gelah adi terpilih ia kari tuhu-tuhu ngasup ia jadi persuruhen Dibata melayani Tuhan ras perpulungenNa i GBKP alu tutus. Si peduaken si jadi palas i bas kita milih tentuna bagi kriteria Tuhan nandangi raja pengganti Saul. Prioritas si arus siperdiateken e me “memiliki hati yang taat serta mau belajar dan diajar oleh Allah”. Ngataken bujur kita sebab i bas GBKP labo gelar kesarjanaan, entah pe kebeluhen i bas bidang akademis tertentu si jadi syarat i bas pemilihen pertua diaken. Ertina si paling penting e me nggit ia erlajar ras iajari Dibata i bas pelayanen.

I bas si e tentuna labo hal si mesera i bas kita mengamati ise-ise saja si  “memiliki hati yang taat serta mau belajar dan diajar oleh Allah”? Sekalak pembelajar tentuna ia sekalak si rendah hati, mau belajar dari siapa saja, juga ia mau belajar dari kesalahan dan memperbaikinya. Labo lit si paling beluh i bas pelayanen i bas GBKP enda, si lit e me si nggit ia erlajar, ngikutken ras ndalanken kerina aturen si enggo jadi kesepakatan bersama. Harus iakui melala kita serayan si bertahan i bas kelepakenta, padahal enggo lit juklak si arus silakoken tapi la silakoken. Contoh umpamana, beluhen sekalak serayan lulusen SMA i bas ia erbahan laporen keuangan ras ilaporkenna setiap bulan sue ras ketentun si lit bas Tata Gereja, asangken sekalak si secara akademis menguasai bidang keuangan. Engkai maka banci bage? Erkiteken serayan lulusen SMA ndai nggit ia erlajar. Enda sada contoh maka si paling penting i bas dahin pelayanen i GBKP enda e me nggit ia erlajar ngikutken ras ndalanken kerina aturen si enggo jadi kesepakatan bersama erpalasken Kata Dibata.

Emaka mari radu ras kita tuhu-tuhu jadi pemilih si bertanggung jawab, ula asal pilih erpalasken hubungen perkade-kaden, erpalasken erta kebayaken, erpalasken kebeluhen akademis, ras erpalasken hal-hal si deban si la sue ras peraten Dibata. Pilihlah si nggit ia erlajar, nggit ia alu tutus melayani, ras si mbiar man Dibata. Gelah dahin-dahin pelayanen bas gerejanta labo terjeng gelah enggo saja, tapi tuhu-tuhu pelayanen si berkualitas guna kemulian gelar Dibata. 

PA MAMRE GBKP TGL. 17 - 23 MARET 2019

Nrs. Pdt. L. br. Sinuhadji (Bp. Rey Rapha Tarigan)

ENTERPRENEURSHIP DAN LINGKUNGAN HIDUP

Ogen : Kejadin 2:4b-15

Tema : MAMRE KREATIF RAS MEHULI

Tujun : Gelah Mamre :

1) Ngangka maka kewirausahaan e me pendilo Dibata

2) Ndahiken dahinNa tetap njaga (mpekena-kena) lingkungen labo icedai

Metode : Diskusi

Dibata njadiken doni enda alu perencanaan si matang. Alu program ras alur si sistematis ijadikenNa doni enda ras kerina isina. Peken Eden si jadi ogenta sendah, e me model i ja Dibata njadiken doni enda alu perencanaan si matang ras mehuli seh makana tercipta ekosistem si seh kel jilena si ngasup menopang kegeluhen kerina makhluk. Seh asa gundari lenga lit hasil karya manusia si ngasup menandingi kerina si enggo itepa Dibata.

Manusia ijadiken Dibata alu tugas khusus, i bas ay. 15 ituriken maka manusia itamaken Tuhan i Peken Eden guna ngusahai ras njagaisa. I bas terj. TB-LAI nina, “untuk mengusahakan dan memelihara taman itu”. Ngusahai ertina aktifitas si ilakoken manusia guna memenuhi kebutuhen geluhna. Njagai ertina i bas ngusahai e manusia tuhu-tuhu mpediateken kelangsungan ekosistem gelah banci tetap banci erdalan alu mehuli janah beberkelanjutan seh ku anak kempu, entah pe generasi-generasi berikutna. Akap kami dua hal enda si jadi fokus i bas PA-ta sendah.

PA sendah i bas rangka Enterpreneurship & Lingkungan Hidup, alu tema “Mamre kreatif ras mehuli” ras tujun gelah Mamre ngangka maka kewirausahaan e me pendilo Dibata, janah Mamre ngasup ndahiken dahinNa tetap njaga (mpekena-kena) lingkungen labo icedai. Beda kita manusia ras Dibata e me, Dibata menciptakan dari yang tidak ada menjadi ada (creatio ex nihilo) sementar kita manusia menciptakan dari yang sudah ada. I bas si e lebe arus sipahami alu mehuli sebab maun kita manusia hanya beluh ngkerikenca. Adi siperdiateken lingkungan hidup i sekelewetta enggo tangkas maka enggo melala kerusakan parah si terjadi erkiteken ulah manusia si hanya beluh ngkerikenca tanpa lit kesadaren guna memelihara entah pe njagaisa.

Ertina i bas PA sendah, iajuk kita labo hanya menyadari bahwa erdahin entah pe er-wirausaha e me pendilo Dibata, tapi i bas sisi si deban pe kita iajuk gelah jadi wirausahawan si berwawasan lingkungan hidup, e me wirausahawan si peduli ras nggit memelihara entah pe njagai ekosistem si enggo ijadiken Dibata. Enterpreneur si kreatif ras berwawasan lingkungan hidup umpamana, nggit ras ngasup ia mengolah sampah menjadi produk daur ulang si berguna. Iukurkenna alternatif si deban selain plastik entah mengurangi sampah plastik. Si itawarken labo saja produkna, tapi pe meng-edukasi konsumen gelah peduli lingkungan hidup, rsd.

Emaka mari radu ras kita menjadi wirausahawan si kreatif ras berwawasan lingkungan hidup, janah ula lupa kita ertoto gelah ipengasupNa ras ipegegehiNa kita i bas kita njagai entah pe memelihara lingkungan hidup si enggo ipercayakenNa man banta. Dibata si masu-masu kita kerina.