PJJ GBKP Tgl. 10 - 16 Maret 2019

PJJ GBKP TGL. 10 - 16 MARET 2019

Pdt. Larena br. Sinuhadji (Nd. Rey Rapha Tarigan)

Tema : PILIHLAH SI MEHULINA (Pilipi 1:9-10)

(Persikapen Pemilihen Calon Pertua Diaken)

Bahan sekali enda pe ngerana denga kerna persikapenta dalam rangka pemilihen Pertua Diaken (Pt. & Dk.) Periode 2019 - 2024. Minggu si nderbih lebih fokus kita ku soal kesiapenta guna ipilih bagi si enggo memenuhi syarat ras terpilih. Sedangken i bas bahanta sekali enda tanggung jawabta perpulungen guna memilih Serayan, ras i bas kita memilih arus tuhu-tuhu pe ersikap gelah ula sempat “mandangi roka dung peranin”.

Surat Paulus man perpulungen Pilipi ituliskenna asum ia i bas penjara. I bas bindu pertama enda, Paulus ertoto nandangi perpulungen erkiteken kekelengen perpulungen man Paulus asum tantangna ia melayani i Pilipi. Secara khusus i bas nats-ta Paulus ertoto gelah : 1) Ertambahna keleng ate perpulungen. 2) Ertambahna pengangkan ras pemeteh si tuhu-tuhu. Terj. TB-LAI, “Semoga kasihmu makin melimpah dalam pengetahuan yang benar dan dalam segala macam pengertian”. Ertina, kekelengen banci ertambah-tambah adi pemeteh ras pengertin ta pe ertambah. Ertina pemeteh ras pengertin si payo kerna Kristus mabai kita erlumba nehken kekelengen. Sabab Kristus me ulu kekelengen. 3) Alu bage ngasup perpulungen milih apai si mehulina i bas kegeluhen enda, sabab palasna kepentaren si lit bas ia. Bena-bena kepentaren e me erkemalangen man Dibata.

Adi sikaitken ku bas kegeluhenta, maka i bas doni enda kita iperhadapken ras pilihen-pilihen i bas geluhta tep-tep wari. Ku Gereja tupung wari Minggu entah gawah-gawah? Si mehuli silakoken entah si kemali? Memilih Serayan alu erpengendes man Tuhan gelah terpilih Serayan si tutus ras nggit melayani entah asal-asalan kita memilih piah dung kita sendiri kecewa erkiteken la lit ketutusenna i bas dahin si enggo iampeken Tuhan bana.

Memang payo labo lit kita si sempurna, tapi si lang-langna guna kita milih Serayan Tuhan arus kita megermet ras sisungkun Tuhan. Ula erkiteken hubungen perkade-kaden. Ula erkiteken ia kalak bayak. Ula erkiteken la pernah Gereja gelah kenca enggo terpilih maka asumsinta rajin ia ku Gereja. Lagu langkah ras cara nggeluh anggota jabuna la jadi batu antuken man perpulungen ras masyarakat si terkait ku bas pelanggaraan etika kesusilaan, demoralitas : korupsi, judi, peredaran narkoba, rsd. Nehen Tata Gereja GBKP 2015 - 2025, Tata Laksana, Ps. 91 dan 95.

Adi siperdiateken buku “Setialah 27” bahan sosialisasi Pemilihen Pt. & Dk., maka i je isuratken nggit ras mejingkat makeken waktuna guna Gereja ras ngaturken perpulungen alu saber ate. Ukuren kinijingkaten e me minimal dua kali sebulan menghadiri Kebaktin Minggu, PJJ, PA Kategorial. Si sanga menjabat Pt. & Dk., minimal dua kali sebulan ngikuti Sermon. Adi siperdiateken maka syarat si itamaken labo i datas standar rata-rata tapi sangat standar. Adi guna jadi Serayan si ipake Tuhan guna melayani pe, standarna di bawah rata-rata entah “cukup” maka enggo pasti pelayanenna ke depan pe biasa-biasa saja entah pe kurang ketutusenna. Jingkaten ka kari perpulungen e asangken Serayanna. La pang Gerejanta namaken standar si maksimal erkiteken pertimbangen enterem ka kari si ngatakenca, “labo lit kari si pang jadi Serayan adi megajangsa persyaratenna” (hlm. 11-12).

Emaka labo heran enggo pe dua entah telu periode Serayan Tuhan e lit ka si ku Gerejana jarang, Sermon ikelangi, entah pe erjudi denga. Tapi Firman Tuhan i bas PJJ sendah mpersingeti kita, pilihlah si mehulina gelah man banta manfaatna perpulungen. Adi Serayanna aktif, tutus, jagaina etikana enggo pasti perpulungen pe reh maju ras berkembang.