PA Kategorial GBKP Tgl. 24 - 30 Maret 2019

PA MORIA GBKP TGL. 24 - 30 MARET 2019

Pdt. Larena br. Sinuhadji (Nd. Rey Rapha Tarigan)

Entrepreneurship Padan Si Ndekah

Ogen : Kejadin 1:1-31

Tema : ERDAHIN (Pondasi Jiwa Entrepreneurship)

Tujun  : Gelah Moria :

1) Ngidah cara Dibata erdahin ras ulihna

2) Ngumban cara Dibata i bas dahin ras usahaNa

Metode PA : Nggar-gari ras ngusih pendahin Dibata

Bahan PA Morianta ngerana kerna Dibata nepa doni enda ras kerina isina. Dibata nepa i bas si la lit nari jadi lit (lat. : creatio ex nihilo). Ikataken maka doni lume denga dingen la lit tempasna (TB-LAI “belum berbentuk dan kosong”). Tapi kenca enggo dung itepa Dibata doni enda maka doni enda enggo terisi alu erbage si mehuli ras kerina enggo lit tempasna. Piga-piga hal si penting jadi cataten i bas Dibata nepa doni enda :

1) Itepa Dibata doni enda ras kerina isina alu KataNa si erkuasa. Ay. 3 nina Dibata, “Jadilah terang!” Emaka jadi me terang” (ay. 6, 9, 11, 14, 20, rst).

2) I bas Dibata nepa doni enda ras kerina isina tuhu-tuhu irancangNa alu mehuli, sebab labo manusia itepa Dibata i bas wari pemena, tapi manusia itepaNa i bas wari peenemken. Ertina, icukupi Dibata lebe kerina kebutuhen manusia maka kedungenna itepa Dibata manusia.

3) I bas Dibata nepa manusia, berbeda ras tinepa Dibata si deban, sebab manusia itepa Dibata sentudu ras tempas Dibata, menam seri ras Dibata gelah manusia (dilaki ras diberu) banci jadi mandataris Dibata (perpanjangen tan Dibata) e me “ngkuasai” kerina nurung, perik-perik ras kerina asuh-asuhen ras rubia-rubia si meliar. Adi sibandingken Kej. 2:7, alu tan Dibata ibuatNa sitik abu taneh ijadikenNa manusia ras iembuskenNa kesah kegeluhen ku bas igungna, emaka mulai nggeluh jelma ndai. Labo arah kata saja tapi pe alu tan Dibata itepaNa manusia.

4) I bas Dibata nepa doni enda ras kerina isina tuhu-tuhu mehuli, la gelah enggo entah pe meros (asal-asalan). TB-LAI ay. 4, “Allah melihat bahwa terang itu baik”. Ay. 10, “Allah melihat bahwa semuanya itu baik”. Ay. 12,18,21,25. “Dan yang terakhir Allah melihat semua yang telah diciptakanNya sungguh amat baik”. Sekali nari labo asal-asalan tapi mehuli, perfect.

Tema i bas PA-ta sendah e me “Erdahin” (pondasi jiwa enterpreneurship). Ertina i bas kita erdahin arus lit pondasi entah pe jiwa si mendasarina. Adi rikutken ogenta sendah jelas maka Dibata si enggo nepa doni enda ras kerina isina, IA njadiken si la lit jadi lit dingen mehuli kerinana, labo menggo, entah pe asal-asalan. Dibatanta ulu enterpreneurship. I bas IA dem kreativitas, inovatif, ras konsisten (wari 1-6 mehuli kerina ijadikenNa). Beda manusia ras Dibata, maka manusia njadiken si enggo lit jadi reh ulina, dem kreativitas. Adi nai bentuk kursi biasa saja si penting fungsional, genduari enggo mbue kel erbagena model kursi. Labo hanya soal fungsina, tapi lit nilai estetikana bahkan lit kenyamanan ras prestise.

Tahun 2019 i bas GBKP e me tahun “Meningkatkan jiwa kewirausahaan (enterpreneurship) warga GBKP dalam bidang ekonomi serta kepedulian terhadap kesehatan dan lingkungan”. Erlajar arah bahan enda maka tema enda labo hanya mabai anggota jemaat mbuka usaha si mbaru, tapi jiwa enterpreneur arus lit bas kita : mampu melihat peluang ras ikelola alu mehuli ras ermanfaat. Kreatif, inovatif, la murah putus asa tetap erpengarapen, i bas perbeben si lit pasti lit solusina, si penting ula murah putus asa. Adi nina Pdt. Yahya Widjaya, “Enterpreneurship adalah soal perubahan, melihat celah-celah kesempatan, mendobrak kebuntuan”. Janah Gereja arus tetap menanamkan karakter enterpreuner man anggota jemaat si kedungenna erpengaruh positif i bas kegeluhen ekonomi termasuk Gereja.

Biak kreatif dingen inovatif (la bage-bage saja) enda me si tetap arus lit i bas kita Moria gelah i bas kegeluhenta pe ras pendahinta la gel-gel tapi lit rusur perubahen si terulin. Sabab manusia memang berubah, tentuna ku arah si mehuli. Si la nggit berubah enggo pasti ketinggalan jaman dingen la nari ibutuhken kehadirenna. Janah siusih Dibata, maka i bas motivasi kita ndahiken dahinta labo hanya siukurken keuntungenta tapi pe kiniulin sesama manusia ras tinepa Dibata sideban. Ula erkiteken jiwa enterpreneur silit bas kita erbahanca ceda alam sekitar terlebih la nari lit pengerganta nandangi teman manusia sabab bas perukurenta hanya materi, materi ras materi.

PA MAMRE GBKP TGL. 24 - 30 MARET 2019

Nrs. Pdt. L. Sinuhadji (Bp. Rey Rapha Tarigan)

Tanggung Jawab Mamre I Bas Milih Ras Ipilih Selaku Pertua & Diaken

Ogen : Perb. Rasul 14:23

Tema : PERTUA DIAKEN LABO JABATEN TAPI DAHIN NGELAI

Tujun : Gelah Mamre :

1) Ngidah maka milih/ipilih jadi Pertua/Diaken e labo masalah jabaten tapi tanggung jawab nehi pendilo Tuhan

2) Milih ras ipilih e me tanggung jawab erkiniteken sebab Dibata si mada dahin

Metode : Lakon/Drama

Latar belakang bahan ogenta sendah amin pe hanya sada ayat ngenca, e me perdalanen rasul Paulus i bas ia er-Berita si Meriah. I bas Perb. Rasul 13:2 ituriken maka Paulus ras Barnabas iutus guna ndahiken dahin si enggo itetapken Dibata e me erberita kerna keselamaten i bas Yesus Kristus man kalak si lenga nandaisa. Melala kota ras kuta si isiari Paulus ras Barnabas janah melala tantangen si arus iadapi kalak enda duana. Tapi pengorbanen Paulus ras Barnabas labo sia-sia, i bas kota ras kuta si enggo isiarina nterem kalak si tek man Yesus (ay. 21) janah enggo pajek piga-piga perpulungen. I bas si e ipegegehi Paulus ras Barnabas perpulungen-perpulungen e gelah tetap megegeh i bas erkiniteken man Dibata i bas Yesus Kristus amin pe melala tantangen si arus iadapi (ay. 22).

Secara khusus i bas ogenta sendah ay. 23 ikataken nina, “I bas tep-tep perpulungen itentuken rasul-rasul e pertua-pertuana. Kenca ertoto man Dibata dingen erpuasa, iendeskenna pertua-pertua e man Tuhan si itekina”. I bas Alkitab TB-LAI nina, Di tiap-tiap jemaat rasul-rasul itu menetapkan penatua-penatua bagi jemaat itu dan setelah berdoa dan berpuasa, mereka menyerahkan penatua-penatua itu kepada Tuhan, yang adalah sumber kepercayaan mereka”. I bas ayat enda hanya ituriken secara ringkas kerna tata cara ilitkenna pertua-pertua i bas tep-tep perpulungen e me itetapken rasul-rasul, itotoken alu erpuasa, kenca si e iendesken man Tuhan. Mungkin banci saja sope itetapken rasul-rasul leben enggo iusulken perpulungen ise-ise saja si iakap perpulungen “cocok” guna ndahiken dahin-dahin pelayanen.

Adi merujuk ku surat-surat rasul Paulus, akap kami kerna penetapen pertua-pertua e labo terjeng itetapken, itotoken ras iendesken saja. Lit kriteria-kriteria si arus lit i bas calon-calon pertua entah pe diaken bagi si tersurat i bas 1 Tim. 3:1-10 bage pe Tit. 1:5-9. Ertina rasul-rasul pe labo sembarangan i bas netapken pertua-pertua entah pe diaken-diaken i tengah-tengah perpulungen, lit proses “pemeriksaan” calon-calon sope itetapken ras iendesken man Tuhan.

Tema i bas PA-ta sendah e me “Pertua Diaken labo jabaten tapi dahin ngelai” alu tujun gelah Mamre ngidah maka milih/ipilih jadi Pertua/Diaken e labo masalah jabaten tapi tanggung jawab nehi pendilo Tuhan, janah milih ras ipilih e me tanggung jawab erkiniteken sebab Dibata si mada dahin. Kerna tema ras tujun PA sendah akap kami enggo rusur sibahas, baik i bas tep-tep periodisasi bage pe i bas bahan PJJ-ta. Emaka turah penungkunen, si pemena, apakah lit denga kita si memahami pertua entah pe diaken e hanya sebage “jabatan” si arus iperebutken entah pe sipertahanken (mungkin alu erbage-bage cara gelah dat emeritus)? Si peduaken, apakah lit denga kita si sedekah enda lalap erpenulak adi terpilih jadi calon pertua entah diaken? Si peteluken, apakah lit denga kita si sedekah enda lit kepedulianta nandangi pemilihen pertua diaken i bas runggunta masing-masing? Umpamana : golput, erpengakap pemilihen pertua diaken e labo penting, erpengakap maka pertua diaken si enggo lit sedekah enda enggo mehuli, padahal adi gelarna manusia pasti lit kelemahen entah pe kekurangen si perlu ievaluasi, rsd.

Adi rikutken ogenta sendah pertua diaken i bas perpulungen-perpulungen paksa rasul Paulus nggeluh denga jelas guna pembangunan kula ni Kristus baik secara kuantitas bage pe kualitas, si tujun akhirna guna kemulian gelar Dibata i bas Yesus Kristus i doni enda. I bas si e tentuna arus sipilih kalak si memang tuhu-tuhu tutus ras memenuhi kriteria si enggo lit i bas 1 Tim. 3:1-10, Tit. 1:5-9, rsd., sebab si nidahiken e labo dahin sembarangan tapi dahin Tuhan. Persoalenna mungkin i bas Gerejanta lenga berakar budaya pelayanen si tuhu-tuhu tutus memang murni guna kemulian gelar Dibata labo guna kepentingen diri sendiri. Adi memang bage tentu arus terus sikembangken budaya pelayanen si tuhu-tuhu tutus guna kemulian gelar Dibata. Adi memang lit denga kita bagi telu penungkunen i datas mari radu ras siperobahi janah kita perlu terus erlajar erkiniteken alu mehuli. Sebab kiniteken si mehuli erbahanca kita jadi kalak si dewasa : nggit kita ipilih jadi calon, ikut muat bagin i bas kerina proses pemilihen, ngasup ngataken bujur ras tetap rendah hati adi terpilih jadi pertua diaken, adi la nari terpilih amin pe enggo telu periode umpamana tetap aktif melayani sebab palas pelayanenta labo ngayaki jabaten pertua diaken, rsd.

Emaka mari radu ras kita terus-menerus erlajar Kata Dibata, tutus kita ertoto, tutus kita erlajar melayani tanpa pamrih, tutus kita erlajar erinisiatif proaktif melayani tanpa mengharapkan pujian rsd. Secara khusus i bas pelaksanaan pemilihan Pertua Diaken periode enda, mari radu ras kita ertoto gelah la lit konflik, reh dewasana kita i bas proses pemilihen periode sekali enda, terpilih pelayan-pelayan Dibata si tutus erdahin i bas peken anggur Tuhan janah gelar Tuhan semakin imuliaken. Dibata si mpegegehi kita.