PA Kategorial GBKP Tgl. 10 - 16 Maret 2019

PA MORIA GBKP TGL. 10 - 16 MARET 2019

Pdt. Larena br. Sinuhadji (Nd. Rey Rapha Tarigan)

PEMILIHEN PERTUA DIAKEN

Ogen : Roma 16:1-2; 12-15

Tema  : NIKAPKEN DIRI GUNA NGELAI TUHAN

Tujun : Gelah Moria :

1) Meteh maka enterem diberu si enggo ikut ngelai i bas Gereja mula-mula

2) Nggit ras nikapken diri guna jadi Serayan

Metode PA : Diskusi

Rikutken perikopta bindu 16 merupaken kitab terakhir si itulisken Paulus man perpulungen Roma. Janah isina lebih mbue kerna salam si ipeseh Paulus man enterem kalak subuk dilaki bage pe diberu si sedekah enda enggo banci bekerja sama ras ia.

Ay. 1-2 i jenda Paulus mpetandaken sekalak Diaken diberu si sedekah enda melayani i Kenkerea. Banci jadi ia me si maba surat Paulus enda man perpulungen Roma. Pemindon Paulus gelah perpulungen banci ngaloken Pebe enda alu dem meriah ukur. Pebe (ertina “bersinar”, gelar arah Dewa Aretemis) ipujiken Paulus turangna si Pebe i bas gelar Jesus Kristus labo erkiteken kecantiken Pebe (faktor jasmani) tapi erkiteken kiniulin ras kekelengen si enggo ibereken Pebe selaku sekalak Diaken. I ja  sedekah enda pe enggo enterem kalak si isampatina bage pe secara khusus Paulus sendiri enggo isampatina.

Ay. 12-15 Paulus nehken salam mejuah-juah ras mereken apresiasi (mujiken) Tripena (lembut) ras Triposa (cantik), banci jadi kalak enda ersenina i ja enggo erdahin guna melayani Tuhan. Bage pe Persis si enggo mbue erdahin i bas dahin Tuhan. Man  Rupus kalak pilihen i bas dahin Tuhan ras nandena si perbahanenna tuhu-tuhu mehuli i ja kai si ibahanna nande Rupus bali ras man anakna jine. La lit bedana. Bage pe enterem denga gelar si isingetken Paulus guna ia nehken salam mejuah-juah Asinkritus, Pelegon, Hermes, Petrobas, Hermas, Pilologus, Julia, Nerus ras turangna. Si dua kalak enda, Julia ras turang Nerus e me dua kalak diberu ka si nisebutken Paulus.

Arah bahan pengogenta enda banci siidah enterem kepeken diberu si enggo ikut ngelai i bas jaman Gereja mula-mula. Walau pe lit anggapen diberu madin i rumah saja, tapi kekelengenna man Jesus Kristus sebage Juruselamat la banci ngambati semangat ras kesedian guna melayani i bas dahin-dahin Tuhan. Bahkan si luar biasa rikutken pujian Paulus, maka kerina kalak enda erdahin alu tutus, enterem perpulungen isampati ras ikelengi.

Ngidah pengalamen diberu-diberu i bas perikop enda mereken motivasi, semangat man Moria guna bersedia dingen nikapken diri guna jadi Serayan. Sabab i bas bulan April tahun enda enggo ibenaken penjaringan Calon Serayan i Sektor. Adi siidah persentasi pelayan dilaki ras diberu, nteremen denga memang dilaki walaupe situhuna dari periode ku periode enggo reh meningkatna kehadiren diberu jadi Serayan Tuhan. Sabab umumna, lit denga Moria si la nggit ipilih erkiteken mbue denga dilaki si banci melayani i Gereja rikutken waktuna ras keberadaanna selaku dilaki. Adi diberu lit keterbatasen selaku nande, ndehara i ja la banci “leluasa” i bas melayani. Alasen si deban, la mampu. Situhuna, si e kerina berkaiten i bas kita banci memenej, ngaturken, dahin i bas jabu ras Gereja si kerinana banci idalanken alu mehuli, tanpa arus lit si ikorbanken. Asal banci ka kita bekerja sama i bas jabu. Si penting soal nggit saja lebe guna ipake Tuhan. Adi ipilih Dibata kita arah perpulungen ula kita erpenulak. Ula ka kita memaksakan kehendak, ‘di kenca kita la terpilih alu erbage-bage cara si la mehuli gelah banci kita jadi Serayan. Si e pe la pas! Adi enggo nggit ras terpilih, teklah kita pasti Dibata si empuna dahin e iperlengkapiNa kita.

Hal berikutna si banci siidah, asum Dibata enggo memilih ras make kita jadi SerayanNa, arus tutus, maksimal kita erdahin, silayani perpulungen alu la erdobahen. Gelah perpulungen e pe banci igejapina kehadiren Dibata arah pelayanenta. Janah perpulungen pe banci bekerja sama guna mendukung dahin pelayanen i tengah-tengah Gereja Tuhan. Bagi nina Paulus man perpulungen Roma gelah isampatina kai si niperluken Serayan Tuhan e.

PA MAMRE GBKP TGL. 10 - 16 MARET 2019

Nrs. Pdt. L. Sinuhadji (Bp. Rey Rapha Tarigan)

ENTERPRENEURSHIP & KESEHATEN

Ogen : 1 Korinti 6:12-20

Tema : NJAGA KESEHATEN

Tujun : Gelah Mamre

1) Meteh maka kula e me Rumah Pertoton Kesah si arus ijaga, ipelihara

2) Jadi penggerak kesehaten i bas jabu, Gereja ras masyarakat

Ogenta i bas Pustaka Si Badia ibere judul “Pakelah kulandu guna muji Dibata”. Judul i bas Alkitab TB-LAI “Nasihat terhadap percabulan” akap kami lebih jelas nggambarken konteks pedah-pedah rasul Paulus man perpulungen i Korinti. Rikutken konteks budaya i bas kota Korinti erlua-lua entah pe percabulan banci ikataken hal si biasa paksa si e. Bahkan i bas kiniteken si ndekah kalak Korinti, erlua-lua e me termasuk salah sada ritual si ilakoken i bas rumah pertotonna, alu istilah “pelacuran bakti” entah pe “pelacuran suci”. I bas kiniteken si ndekah iajarken maka kula bakal mate ras keri ipan cacing sanga sesekalak enggo mate, tapi kesahna nggeluh si rasa lalap. Ertina kai pe si ilakoken kula la lit hubungenna ras kesahna. Selain si e, paksa si e lit falsafah nggeluh kalak Yunani e me hedonisme si mengekspolitasi kenikmatan kula.

I bas konteks kegeluhen masyarakat Korinti si bagenda rupana rasul Paulus nehken suratna man perpulungen, khususna si jadi bahan ogenta sendah, gelah perpulungen kalak si tek ula terbaba arus sekelewet si la mehuli. Kerna erlua-lua tegas i bas ay. 13 ikataken Paulus, “Labo tuhu maka kula manusia guna erlagu la mehuli, tapi guna Tuhan; janah Tuhan guna kula”. I bas bhs. Ind., nina, “Tetapi tubuh bukanlah untuk percabulan, melainkan untuk Tuhan, dan Tuhan untuk tubuh”. Lit dua kali rasul Paulus ngerana kerna kiniersadaan kalak si tek ras Kristus entah pe ras Dibata, e me ay. 15 ras 17. Kiniersadaan i jenda labo saja secara roh, tapi kula kalak si tek pe enggo ipersada ras Dibata entah pe Kristus. Kiniersadaan ras Dibata entah pe ras Kristus arus tetap sijaga khususna i bas godaan-godaan erlua-lua. Enggo jelas maka kula kalak si tek la banci ipergunaken guna hal-hal si la mehuli termasuk erlua-lua. Seksualitas labo hal si banci ilakoken secara bebas ras ise pe ateta ngelakoken hubungen seks. Seksualitas e me pemere Dibata man manusia si arus ipergunaken alu mehuli ras pasangenna i bas perjabun (ndehara entah pe perbulangen).

 Adi rikutken tema sendah “Njaga kesehaten” alu tujun gelah Mamre meteh maka kula e me Rumah Pertoton Kesah si arus ijaga, ipelihara, janah Mamre jadi penggerak kesehaten i bas jabu, Gereja ras masyarakat, jelas maka konteksna iperluas, labo saja kerna soal erlua-lua tapi kerna njaga kesehaten kulanta. Amin pe Rumah Pertoton Kesah i bas ay. 19 jelas kaitenna ras erlua-lua, tapi banci ka ikaitken ras kesehaten kula pada umumna. Banci ikataken melala hal si la mehuli si banci ncedai kula labo saja erlua-lua. Adi erlua-lua jelas akibatna banci terjangkit erbage-bage pinakit kelamin seh ku virus HIV. Tapi labo terjeng je saja, erlua-lua banci merusak mental sesekalak. Hal-hal si deban si banci ncedai kula umpamana kurang istirahat, man la teratur, man pangan si la seimbang si erbahanca kolestrol meningkat, kecanduan ngisap, mengkonsumsi obat-obatan terlarang (sabu-sabu, ekstasi, rsd.). I bas si e kerina tentuna kita arus selalu waspada gelah ula terjangkit erbage-bage pinakit si kedungenna menghambat produktifitas ras ncedai kualitas geluhta. Kula si enggo ibereken Dibata man banta arus selalu sijaga ras sipelihara alu ngelakoken kerina si mehuli guna kesehatenta.

Kaitenna ras enterpreneurship jelas maka kewirausahaan labo banci erdalan alu mehuli adi kesehaten pelaku wirausaha la sijaga alu mehuli. Enda kaitenna ras produktifitas ras kualitas nggeluh. Produktifitas i jenda labo terjeng produktif menghasilken sen, tapi produktif menghasilken kerina si mehuli i japa pe. Adi enggo produktif kita i bas menghasilken kerina hal si mehuli i japa pe, tentu saja kualitas geluhta semakin meningkat. E maka i bas kesempaten enda iajuk kita Mamre gelah menjadi pionir kesehaten i japa pe kita, gelah semakin produktif kita janah kerina si lit i sekelewetta pe mendukung kerina usaha si nilakoken kita. Ertoto kita gelah kerina si iusahaken kita banci maba kemulian gelar Dibata.