PJJ GBKP Tgl. 17 - 23 Maret 2019

PJJ GBKP TGL. 17 - 23 MARET 2019

Nrs. Pdt. L. br. Sinuhadji (Bp. Rey Rapha Tarigan)

Tema : PULUNG NGARIHKEN SI MEHULI (1 Samuel  8:1-9)

(Musyawarah Warga Sidi)

I bas 1 Sam. 7:15-17 ituriken maka Samuel erkuasa i Israel sebage sekalak hakim. Hakim e me wakil Dibata paksa si e si tugasna ndungi perkara-perkara si terjadi i tengah-tengah bangsa Israel. Wakil Dibata ertina Dibata si situhuna erkuasa i tengah-tengah bangsa Israel. Jadi amin pe Samuel erkuasa tapi situhuna ia hanya perantara antara Dibata ras bangsa Israel.

Bahan ogenta sendah nuriken kerna bangsa Israel si mindo gelah iangkat sekalak raja. Engkai maka merincuh kel bangsa e mindo sekalak raja man Samuel? Adi sioge ay. 20 alasenna nina gelah enggo seri ras bangsa-bangsa si deban. Alasen e ikataken bangsa Israel kenca enggo ituriken Samuel panjang lebar kerna syarat-syarat entah pe konsekuensi-konsekuensi adi bangsa Israel ipimpin sekalak raja sue ras petunjuk Dibata man Samuel (ay. 9). Enda sada alasen si rusur sibegi kita engkai maka merincuh kel bangsa e mindo sekalak raja. Tapi adi siperdiateken ay. 3-5 lit je alasen si tangtangna mendasari pemindon bangsa e.

Bangsa Israel mindo sekalak raja erkiteken anak-anak Samuel la ngusih bapana jadi sekalak hakim si benar, jujur, ras adil. Duit saja ngenca atena, ialokenna sen sogok, janah iputuskenna perkara kalak alu la bujur. Kai si terjadi adi anak-anak Samuel ngusih bapana jadi sekalak hakim si adil, jujur ras benar? Akap kami kemungkinan besar bangsa e la mindo sekalak raja. Si menarik i bas ogenta sendah, kejahaten anak-anak Samuel la ibahas terdauhen, hanya ituriken maka la mehuli iakap Samuel pemindon bangsa e. Emaka ertoto Samuel mindo petunjuk man Dibata kerna pemindon perwakilen bangsa e si reh ndahi ia i Rama. Enda akap kami salah sada teladan mehuli i bas Samuel nari. Amin pe la pas akapna pemindon bangsa e, janah situhuna banci saja Samuel mis ngatakenca “la banci!” Tapi Samuel la bertindak secara emosional, ipindona petunjuk i bas Dibata nari i bas ia erbahan keputusen.

Si lebih menarik akap kami e me jawaben Tuhan man Samuel (ay. 7-8). I bas jawaben Tuhan man Samuel teridah maka situhuna lit niat si la mehuli i bas pemindon bangsa Israel. Kai niat si la mehuli e? Itulak bangsa Israel keberadaan Dibata selaku rajana janah lit niat nadingken Dibata jenari isembahna dibata-dibata si deban bagi si enggo biasa ilakoken bangsa e. Secara tersirat akap kami situhuna persoalenna labo soal mengganti sistem teokrasi jadi monarki. Sistem kai pe labo masalah man Dibata sepanjang bangsa e tuhu-tuhu nembah ras ersukuten man baNa. Si jadi masalah bangsa e ersura-sura lanai nembah ras ersukuten man Dibata arah litna raja i tengah-tengah bangsa e.

Tapi amin bage gia, ikabulken Dibata pemindon bangsa e erkelangken Samuel, sebab Dibata tetap ndalanken rencanaNa gelah bangsa e tetap nembah ras ersukuten man baNa. I bas pemerentahen raja Daud kai si jadi rencana Dibata banci terlaksana, e me sekalak raja si tuhu-tuhu jadi wakil Dibata i tengah-tengah bangsa Israel. Daud jadi raja si tuhu-tuhu nembah ras ersukuten man Dibata.

PJJ-ta sendah i bas rangka Musyawarah Warga Sidi Runggun alu tema “Pulung ngarihken si mehuli”. I jenda itulisken kami kerna aturen si lit i bas Tata Gereja GBKP kerna Musyawarah Warga Sidi Runggun Bab XXXIX Pasal 164 Ayat 1-6 nina,

1. Musyawarah Warga Sidi Runggun adalah sarana bagi warga dan Majelis Runggun untuk saling memberi masukan mengenai perkembangan kehidupan bergereja di Runggun dalam bersekutu, bersaksi, dan melayani.

2. Musyawarah Warga Sidi Runggun bukan merupakan sarana pengambilan keputusan.

3. Musyawarah Warga Sidi Runggun dilaksanakan satu (1) kali dalam setiap tahun selambat-lam-batnya pada bulan Maret dan dipimpin oleh Majelis Runggun.

4. Musyawarah Warga Sidi Runggun dilaksanakan untuk mendengar laporan perkembangan jemaat dari BPMR beserta seksi-seksinya, pengurus unit-unit pelayanan, dan pengurus PJJ serta pengajuan usul-usul tentang kehidupan bersekutu, bersaksi, dan melayani serta pembinaan guna pertumbuhan jemaat.

5. Usul/masukan tentang kehidupan bersekutu, bersaksi, melayani, dan pembinaan harus ditam-pung dan ditanggapi oleh Majelis Runggun dalam bentuk keputusan pada SMR yang terdekat.

6. Peserta musyawarah adalah warga sidi Runggun dengan ketentuan : a) Untuk Runggun dengan jumlah sampai seratus (100) keluarga menggunakan sistem langsung (seluruh warga sidi diundang). b) Untuk Runggun dengan jumlah di atas seratus (100) keluarga dapat menggunakan sistem perwakilan (baik warga maupun pengurus PJJ dan pengurus unit-unit pelayanan) yang jumlahnya ditetapkan oleh Majelis Runggun.

Ertina tujun ilitken ras ilaksanakenna Musyawarah Warga Sidi Runggun (selanjutna isingkat jadi MWSR) enda e me guna ngarihken kerina si mehuli guna perkembangen ras kemajun Gerejanta si tujun akhirna e me gelah gelar Dibata termulia arah Gerejanta GBKP. I bas si e tentuna pelaksanaan MWSR enda arus ipersiapken alu mehuli. Kerina data si berkaiten ras perdalinen pelayanen kidekah sada tahun arus tuhu-tuhu isikapken alu lengkap gelah teridah peningkaten entah pe penurunen i bas bidang-bidang tertentu gelah banci sicakapken jalan keluar entah pe kai-kai saja si perlu silakoken guna semakin meningkatken kualitas ras kuantitas pelayanen i bas Runggunta masing-masing. I bas si e, anggota sidi si ikut entah pe jadi wakil i bas MWSR enda pe perlu ersikap alu mehuli gelah pelaksanaan MWSR labo terjeng rutinintas entah pe formalitas gelah lit saja, tapi tuhu-tuhu banci mereken saran-saran, solusi, entah pe kiat-kiat si mehuli guna peningkaten pelayanen i tengah-tengah Runggunta.

Mari radu ras erlajar kita arah ogenta sendah i bas pelaksanaan MWSR. I bas ogenta lit sura-sura si la mehuli i bas perwakilen bangsa Israel nari sanga arih ras Samuel kerna pemindon ilitkenna sekalak raja. I bas si e tentuna kerina kita perlu mawas diri. Ikutkenlah teladan Samuel si labo bertindak secara emosional rikutken gegeh pemetehna, tapi ersukuten ia man Dibata. Pindolah gegeh i bas Dibata nari gelah pelaksanaan MWSR tahun enda banci erdalan alu mehuli. BPMR banci nikapken laporen si lengkap, janah perpulungen si ikut muat bagin pe banci mereken saran-saran, solusi, entah pe kiat-kiat si mehuli guna peningkaten pelayanen i tengah-tengah Runggunta. Gelar Dibata semakin termulia arah pelaksanaan MWSR.