PJJ GBKP Tgl. 31 Maret - 6 April 2019

PJJ GBKP TGL. 31 MARET - 06 APRIL 2019

Pdt. Larena br. Sinuhadji (Nd. Rey Rapha Tarigan)

Tema : TUTUSLAH I BAS SI KITIK” (Lukas 16:10-15)

PEMILU

Pemilu guna memilihi presiden ras wakil presiden, rikut anggota legislatif bage pe DPD tading piga-piga wari nari. Janah secara khusus i bas bahan PJJ-ta sekali enda ngerana ka kita kerna persiapenta guna PEMILU. Ertina, anggota GBKP terus-menerus (mulai tahun 2018 : tahun GBKP menjadi Berkat dalam POLITIK) enggo iboboti dalam rangka PEMILU.

Bahanta sekali enda ngerana kerna ketutusen (kesetian), ras arus ibenaken i bas hal si kitik nari maka banci ipercayaken si terbeliden man banta. Nina Alkitab TB-LAI, “Barangsiapa setia dalam perkara-perkara kecil, ia setia juga dalam perkara-perkara besar. Dan barangsiapa tidak benar dalam perkara-perkara kecil, ia tidak benar juga dalam perkara-perkara besar”. Si nimaksud Yesus i jenda e me kap kerna masalah duit, entah pe merangap nandangi duit. Labo salah kita mpepulung erta, kinibayaken tapi si ikritik Yesus nandangi kalak Farisi e me merangap nandangi duit bahkan ndarami duit alu cara si la mehuli.

Bahasa si ipake Yesus i jenda e me kap “mamon” (bhs. Aram, si ertina merendahkan, mencari keutungan dengan tidak benar, serakah. Bas Pustaka hanya tercatat i bas Mat. 6:24 ras Luk. 16:9,11,12. Mamon  banci menyita seluruh pusuh ras ukurta la nari erkemalangen man Dibata tapi lebih kita ngikutken kedaginenta). Emaka jelas nina Yesus i jenda, labo mungkin juak-juak dua tuanna. Sabab adi bage ugapa pe nembet atena nandangi si sekalak janah si sekalak nari ikelengina. E maka asum Yesus khotbah i datas uruk jelas katakenNa, “labo ngasup kam erdahin guna Dibata, erdahin ka kam guna duit” (Mat. 6:24). Enggo pasti adi sen jadi tujunta erdahin, termasuk pe i bas lembaga keagamaan (religius) la banci lang hal si la mehuli pe sitempuh, sabab enggo sen dibatanta (ngalo sogok, korupsi, mark up harga, jual beli jabatan, rsd). Tapi adi dibatanta kin Dibata si tuhu-tuhu isembah kita, maka kinimalangenta man Dibata nampati kita i bas ngalaken erbage-bage godaan termasuk si berkaiten ras duit.

Mulihi arah bahan PJJ-ta sekali enda ipersingeti Firman Tuhan kita gelah tutus kita i bas hal si kitik maka banci ipercayaken si terbeliden man banta. Secara khusus tutus i bas erta doni gelah ibereken erta si tuhu-tuhu (surga) man banta. Ertina, man banta perpulungen duit labo tujun tapi alat guna banci sipakeken ncukupi kebutuhen geluhta. Duit labo dibatanta, labo tuanta, sabab adi enggo ia tuanta, enggo kita iperbudakna, dingen la nari erdalan akal sehat ras geluh pertendinta. E si erbahanca melala kalak kedungenna enggo beralih i bas sura-surana si mehuli nari. Secara khusus presiden, wakil presiden, anggota legislatif, anggota DPD. Sura-sura awal mejile, e me kap ndalanken amanah i bas Dibata nari arah masyarakat guna mensejahterakan rakyat. Ngerunggui alu bujur, adil dingen la erayo-ayo, mpelebeken kepentingen negara, rayat si nterem asa kepentingen pribadi (golongenna). Tapi kepeken e bahasa kampanye ngenca. Kenca enggo terpilih erkiteken mbue peluang ras kesempaten guna nambahi pundi-pundina enggo lupa ia kerna idealisme awalna. Cukup enterem seh tgl. 27 Maret 2019 anggota legislatif ras kepala Daerah si itangkap KPK erkiteken masalah korupsi.

Man banta pemilih, mulihi ipersingeti gelah jadilah pemilih si jujur. Ula nggit kita isogok. Metenget kita dengan “serangan fajar”, alu istilah “wani piro”. Ise si buena mere sen man banta ia sipilih. Enggo pasti kai silakoken kita erdosa i lebe-lebe Dibata. Sabab Firman Tuhan sendiri ngatakenca banta ula kita ngalo sisip (sogok). Si peduaken, adi terpilih ia, enggo pasti selama sada periode dahinna mpepulung duit lebe sabab enggo mbue duitna keri asum kampanye.

Mari radu ras kita ertoto, PEMILU 17 April erdalin alu aman ras nyaman, banci kita memilih alu LUBER ras terpilih pemimpin-pemimpin si berintegritas.