PJJ GBKP Tgl. 3 - 9 September 2017

PJJ GBKP TGL. 3 - 9 SEPTEMBER 2017

Pdt. L. br. Sinuhadji (Nd. Rey Tarigan)

Tema : NJAGA RAS MPEKENA-KENA BUDAYA (Johanes 2:1-12)

Penjelasen Bahan Ogen & Renungen

Lit pitu tanda sengget si ilakoken Yesus rikutken Injil Yohanes si ncidahkenca maka Yesus Anak Dibata si tuhu-tuhu erkuasa, Mesias si tuhu-tuhu, janah gelah ajar-ajarNa bage pe kalak si nterem tek man baNa. Pitu tanda sengget si ilakoken Yesus e me : 1) Isalihken Yesus lau jadi anggur (2:1-11). 2) Ipepalem Yesus anak menteri raja (4:46-54). 3) Ipepalem Yesus kalak si pinakiten i kolam Betesda (5:1-18). 4) Ibere man Yesus lima ribu kalak (6:1-15). 5) Yesus erdalan i babo lau (6:16-21). 6) Ipepalem Yesus sekalak si pentang tubuhna nari (9:1-41). 7) Ipegeluh Yesus mulihken Lazarus (11:1-57). Ogenta sendah e me tanda sengget si pemena si ibahan Yesus i bas kerja erdemu bayu i kuta Kana. Akap kami turi-turin enda enggo semal sibegiken entah pe siogeken. Rikutken tema PJJ-nta sendah, lit piga-piga hal si banci radu ras sirenungken, e me :

Si pemena (ay. 1-2), Yesus ras NandeNa mewaliki keluarga besar Yusuf, bapa Yesus, tuhu-tuhu ngehamati adat budaya si lit i bas kalak Yahudi khususna budaya perjabun. Ituriken maka Nande Yesus lit i bas pesta e, mungkin posisina sebage anak beru. Yesus ras ajar-ajarNa iundang ras reh ku pesta e.

Si peduaken (ay. 3-9), labo terjeng reh saja Yesus ku pesta e, tapi ikut pe IA ertanggung jawab i bas kelancaren pesta e seh dung. I bas si e ibahan Yesus tanda sengget i ja isalihkenNa lau jadi anggur. Kai si ilakoken Yesus e erbahanca tuan rumah si mada kerja la dat kemelan erkiteken kebutuhen anggur guna pesta e banci tercukupi janah kerja erdemu bayu e banci erdalan alu mehuli.

Si peteluken (ay. 10), enggo ibahan Yesus budaya si mbaru si labo semal paksa si e i bas kerja erdemu bayu e me kualitas anggur si mejile si ielaken benaken pesta seh dung. I bas ay. 10 ikataken sukut man si mada pesta nina, “Biasana anggur si mehulina nge lebe ielaken kalak, janah kenca puas temue e minem, ielaken anggur si biasa. Tapi kam seh asa genduari lit i bas kam anggur si mehulina!”

Gerejanta GBKP termasuk Gereja si menghargai adat budaya setempat, khususna budaya Karo. Tapi i bas GBKP menghargai budaya Karo lit i je terang Kristus sebage pedoman erpalasken Kata Dibata. I bas Konfesi (Pengakun Kiniteken) GBKP ikataken, “Budaya adalah keseluruhan cipta, karya dan karsa manusia yang berakal budi. Oleh karena itu, dalam terang Firman Allah, manusia harus menggali, mengembangkan dan melestarikan budaya secara positif, kritis dan realistis untuk kesejahteraan manusia”.

I bas si e sikapta nandangi budaya enggo jelas maka terang Kristus si men-transformasi-ken budaya si lit. Ertina GBKP tetap bersikap kritis nandangi budaya subuk budaya Karo si iwarisken nini-nininta ndube bage pe termasuk budaya modern si berkembang i bas paksa genduari. Ertina, adi enggo bertentangen ras Kata Dibata tegas kita menolaksa. Sebage contoh, adat si berkaiten ras kiniteken si ndekah : niktik wari, ndilo wari udan, cabur bulung, rsd. Termasuk budaya modern, berpakaian seksi, seks bebas, konsumerisme, rsd. Siarapken, arah budaya si nipaken ras silestariken kita, membangun dirinta, kalak si deban dingen tetap gelar Tuhan imuliaken.

Rikutken tema PJJ-nta sendah mari radu ras sijaga ras sipekena-kena budaya Karo bage pe budaya modern si lit i sekelewetta sue ras peraten Dibata alu ngelakoken bagi si ilakoken Yesus i bas ogenta sendah : 1) ngehamati ras ngergai budaya si sue ras Kata Dibata; 2) ertanggung jawab guna melestarikenca; 3) mpelimbarui budaya si lit i sekelewetta alu terang Kristus.