PA Kategorial GBKP Tgl. 10 - 16 September 2017

PA MORIA GBKP TGL. 10 - 16 SEPTEMBER 2017

Pdt. Larena br. Sinuhadji (Nd. Rey Tarigan)

HUT PERMATA GBKP

Ogen : Kuan-kuanen 22:6-8

Tema : NGAJARKEN ANAK KERNA KEARUSEN NGGELUH

Tujun : Gelah Moria : 1) Niksiki biak-biak (karakter anak); 2) Ngajarken kearusen nggeluh man anak-anak sue ras biakna

Penjelasen Bahan Ogen & Aplikasi

Kitab Kuan-kuanen e me kitab pengajaren si dem kepentaren, alu tujun gelah si ngogesa pentar, gedang rukur dingen beluh muat keputusen alu mehuli. Pengajaren enda itujuken man kerina kalak subuk anak-anak, kalak si nguda denga bage pe orangtua.

Secara khusus i bas bahanta sekali enda, dalam rangka HUT PERMATA si pe-69-ken iajuk guna tetap mereken si terbaik man anakta, sabab anak merupaken erta si meherga kel pemere Dibata man keluarga. Ay. 6 si lebih fokus ngerana soal mendidik anak, “Ajarkenlah man anak uga kearusen nggeluh maka ikutkenna asa umurna nggeluh” (terjemahen TB-LAI “Didiklah orang muda menurut jalan yang patut baginya, maka pada masa tuanya pun ia tidak akan menyimpang dari pada jalan itu”. Terj. Today English Version “Teach a child how he should live, and he will remember it all his life”). Adi siperdiateken, terjemahen bahasa Karo ras Today English Version, maka ngajarken man anak kerna uga kearusen nggeluh arus ibenaken kitik nari, anak-anak denga. Adi TB-LAI “didiklah orang muda”. Akap kami lebih tepat terjemahen bahasa Karo ras Today English Version, sabab usia anak-anak merupaken masa si seh kel efektifna guna nuanken karakter si mehuli. Alasenna, masa si e merupaken golden years, masa keemasan, i ja otak anak mengalami perkembangen si sangat pesat. Usia dini sangat mudah menyerap berbagai disiplin, bimbingen ras contoh si ibereken, sabab banci langsung ikutina (anak peniru ulung). Janah i bas usia kitik denga lenga bo mbue kel idatna informasi entah pe pengaruh si deban i sekelewetna, e maka masa si tepat guna nuanken karakter si mehuli man bana. Gelah alu bage, lit pe kari informasi entah pengaruh si la mehuli, la murah ia tergoda  sabab enggo tertanam karakter-karakter si mehuli benaken kitik-kitik nari.

Kearusen nggeluh, berarti nilai-nilai, karakter si mehuli si banci jadi gelemenna i bas kegeluhenna. Janah adi e enggo mendarah daging, enggo nggeluh i bas dirina, maka enggo pe ia dewasa bahkan seh lanjut usia tetap e ipakekenna (terj. TB-LAI “Pada masa tuanya pun ia tidak akan menyimpang dari pada jalan itu”). Sabab enggo idatkenna ulihna. Adi nilai-nilai si mehuli e la ibereken, entah pe kenca enggo galang maka bereken tentu enggo lebih latih nuankenca, banci la nari terterimana, sabab enggo mbuen nilai ras informasi si la mehuli igelemna. Asilna jelas, rikutken ay. 7 ras 8 kemusilen, nggeluh i bas kelabujuren ras mengalami kiniseran labo erkiteken sebage pengikut Kristus tapi erkiteken kebodohenna. Biak entah karakter kai saja si enggo banci siajarken man anakta benaken kitik nari?

- Karakter jujur : mengerjaken ujian dengan kemampuan sendiri ula nyontek, mengatakan (nuriken) sesuatu alu jujur la itambahi entah ikurangi.

- Karakter disiplin : jam belajar, bermain, istirahat siang, bangun pagi, ku Gereja.

- Karakter bertanggung jawab : membersihkan kamarna, mbersihken mainna, bekas piring makanna, mandiri mengerjaken tugasna,

- Karakter pembelajar yang tekun : bereken buku cerita entah kita pe bercerita ope tunduh, maka daya imajinasi, kosa kata mbue idatna.

- Karakter menghormati orang tua : Alkitab ngajarken maka anak-anak arus ngehamati orangtuana ras e banci icidahken subuk alu kata ras perbahanen. Termasuk man kalak si lebih tua asangken anakta arus banci menjaga sikapna alu sopan santun.

- Karakter peduli man kalak si deban (mau berbagi) : benaken kitik-kitik nari enggo iajarken ras iidahna kerna berbagi, peduli man kalak si deban. Bas Natal entah Lebaren sibereken bantuan man Panti Asuhan entah perpulungenta si kurang mampu. Anak-anak iajak guna banci mereken si lit bas ia, entah mainenna, pakaian, buku cerita. Dingen la erdobahen ras ise pe.

- Karakter peduli man lingkungen sekitar (termasuk alam) : menjaga kebersihan, membuang sampah pada tempatnya, dung kenca bermain rsd.

Karakter-karakter si mehuli e lebe nggeluh bas kita, maka iidah anak-anakta kai siajarken kita man bana. Satu perbuatan lebih berarti dari 1.000 kata-kata. Orangtua arus jadi usihen (teladan) si mehuli man anak-anakna. Ras siajarken secara berulang-ulang.

I bas HUT PERMATA GBKP si pe-69-ken, merupaken sada moment evaluasi kerna keberadaan PERMATA i tengah-tengah Gerejanta. Siarapken PERMATA banci jadi usihen aminna pe nguda denga subuk i bas perkataan, perbahanen, kineteken, kesetianna (bdk. 1 Tim. 4:12), benaken i bas keluarga, i bas pendidiken, pendahinna, i bas Gereja ras i japa pe. Sebab PERMATA merupakan generasi penerus Gereja. Ras e ibenaken i bas rumah nari, asum kitik denga anakta, maka setia ia ernalem man Tuhan, nggeluh bagi si ngena ate Tuhan.

PA MAMRE GBKP TGL. 10 - 16 SEPTEMBER 2017

Nrs. Pdt. L. Sinuhadji (Bp. Rey Tarigan)

HUT PERMATA GBKP PE-69-KEN

Ogen : Ulangen 11:18-22

Tema : NGAJARKEN ANAK KERNA KEARUSEN NGGELUH

Tujun Gelah Mamre : 1) Ngidah kerna tanggung jawabna nandangi anak; 2) Makeken kerina kesempaten lako ndidik anak-anakna

Metode : Diskusi

Penjelasan Bahan Ogen & Aplikasi

Bahan ogenta sendah lit kaitenna ras pengakun kiniteken kalak Israel kerna TUHAN Dibata si sada (bdk. Ul. 6:7-9). Pengakun kiniteken enda labo terjeng iteh, sibegiken ras siinget, tapi tuhu-tuhu sitamaken ku bas pusuh perukuren janah arus lit buktina alu perbahanen (kerja entah pe karya) si nyata i bas kegeluhen si tep-tep wari. Pengakun kiniteken kerna TUHAN Dibata si sada enda arus siwarisken orangtua man anak-anakna alu ngajarkenca ras ngingetkenca rusur (berulang-ulang) setiap wari. Secara praktis pengakun kiniteken enda arus isuratken i bas kertas kitik si itamaken ku bas kotak kitik (Ibr. tefilim) si iiketken bas tan si kawes ras perdempaken (phylactery : tali sembahyang), janah arus ka isuratken i bas binangun pintun rumah ras i babo pintu gerbang gelah tuhu-tuhu jadi persinget. I bas Padan si Mbaru Yesus Kristus mpelimbarui pengakun kiniteken enda alu penekanen si utamana e me i bas ngkelengi Dibata ras ngkelengi manusia (bdk. Mat. 22:34-40; Mrk. 12:29-30; Luk. 10:25-37).

 Penekanen i bas PA-nta sendah rikutken ogenta e me tanggung jawab orangtua i bas mewarisken pengakun kiniteken man Dibata alu ngajarkenca ras ngingetkenca rusur (berulang-ulang) setiap wari man anak-anakta entah pe generasi penerus. Ertina la lit kata “bosan” i bas mereken kata ajar si mehuli, la ermedu-medu sibereken man anak-anakta. Subuk kerna nggeluh erkiniteken, sopan santun, etika berbicara, i bas pergaulan, nggeluh bermasyarakat, karakter si mehuli, rsd. Janah adi lit pelanggaran si ilakokenna, i ja enggo piga-piga kali pe ipersingeti maka didiken secara tegas pe labo salah sipakeken (bdk. Kuan-kuanen 29:15). Enda tentuna labo maksudna mendidik secara kasar, sebab mendidik secara tegas labo seri ras mendidik dengan cara kekerasan. Tapi si pentingna tentuna mendidik melalui teladan, entah pe bukti nyata pengajaran melalui perkataan dan perbuatan sue ras peraten Dibata.

PA-nta sendah i bas rangka HUT PERMATA GBKP si pe-69-ken alu tema “Ngajarken anak kerna kearusen geluh” ras tujun gelah Mamre ngidah kerna tanggung jawabna nandangi anak, bage pe makeken kerina kesempaten lako ndidik anak-anakna. Kerna tanggung jawabta nandangi anak akap kami enggo nge ratana kita Mamre nehken tanggung jawabta alu mehuli, baik i bas memenuhi kebutuhen anak-anakta bage pe i bas ngajarken kerina si mehuli kerna kearusen geluh. Apai ka kita Mamre si rajin reh ku bas PA Mamre bage pe PJJ, sebab enggo piga-piga kali topik kerna tanggung jawab i bas mendidik anak enda sibahas baik i bas PA bage pe PJJ. Ertina enggo rusur isingetken kerna tanggung jawabta nandangi anak-anakta. I bas rangka HUT PERMATA tahun enda mungkin gelah reh tutusna kita Mamre baik secara kuantitas bage pe kualitas i bas nehken tanggung jawabta ngajarken kerna kearusen geluh man anak-anakta maka isingetken mulihi kita kerna pendidiken man anak-anakta entah pe man generasi muda.

Mungkin akap kami tading radu ras sievaluasi kerna kuantitas ras kualitas i bas kita nehken pengajaren-pengajaren si mehuli sue ras Kata Dibata nandangi anak-anakta. Apakah semakin meningkat, biasa-biasa saja, entah semakin menurun? Perlu ka nge sisungkun anak-anakta gelah iteh kita uga tanggapen anak-anakta nandangi pengajaren-pengajaren si mehuli si isehken kita baik pengajaren kerna erkiniteken, sopan santun, etika berbicara, i bas pergaulan, nggeluh bermasyarakat, karakter si mehuli, rsd. Adi kurang denga siakap, perlu sitingkatken. Adi enggo mehuli nina anak-anakta perlu sipertahanken ras perlu ka nge lebih sitingkatken kualitas ras kuantitasna. Adi lenga silakoken nina anak-anakta, enda tentuna menjadi bahan evaluasi man banta selaku Mamre si bertanggung jawab i bas mendidik anak-anakta alu teladan si nyata baik i bas pengerananta bage pe i bas perbahanenta. Selamat HUT ninta man PERMATA GBKP. Dibata si mpegegehi kita.