PJJ GBKP Tgl. 24 - 30 September 2017

PJJ GBKP TGL. 24 - 30 SEPTEMBER 2017

Pdt. Larena br. Sinuhadji (Nd. Rey Tarigan)

Tema : 
DIBATA NGUKUMSA KALAK SI ERLUA-LUA (Epesus 5:1-5)

Penjelasen Bahan Ogen & Renungen

Bahanta sekali enda situhuna enggo pernah sibahas i bas bahan PA Mamre tgl. 23-29 Juli 2017. Ertina, sekali nari rikutken bahan PJJ ipertegas subuk man Mamre, Moria bage pe anak-anak khususna PERMATA si ikut muat bagin i bas PJJ gelah tetap nggeluhken bagi si ngena ate Dibata.

Ogenta e me kelanjuten i bas bindu 4:17-32 nari si isina pedah-pedah rasul Paulus man perpulungen gelah nggeluh i bas kegeluhen si mbaru i bas Kristus. Judul perikop bindu 5:1-20 “Nggeluh i bas terang” si intina kegeluhen si mbaru i bas Kristus harus lit bedana bagi anding-andingen terang si beda ras gelap e me kegeluhen si ndekah (ay. 8). Pedah-pedah rasul Paulus man perpulungen Epesus enda secara khusus itujuken man perpulungen alu latar belakang kegeluhen si ndekah sebage kalak Yunani entah pe bangsa-bangsa si deban si labo Yahudi. Bangsa Yunani pada umumna menganut budaya bebas (libertarian) ras la patuh nandangi aturen (antinomian). Budaya si bagenda rupana idukung alu ajaren filsafat si populer paksa si e si igelari gnostik (pengetahuan), arah gegeh pemeteh ras kepentaren si lit i bas manusia, manusia banci datken keselamaten, janah pemeteh ras kepentaren e la lit kaitenna ras perbahanen. Bagem kurang lebih konteks kegeluhen kalak Yunani ras bangsa-bangsa si deban paksa si e. E maka banci sibayangken uga bebasna kegeluhen si lit i sekelewet perpulungen kalak si tek paksa si e.

Kegeluhen si bebas i jenda termasuk kebiasaan si menyimpang i bas seksualitas. I bas ay. 3, kata “erlua-lua” (bhs. Ind. “percabulan”) iterjemahken i bas bhs. Yunani nari porneia si ertina kerina aktivitas seksual si menyimpang bagi perzinahan (bdk. Mat. 5:32; 19:9), amoralitas seksual (bdk. Mrk. 7:21; Perb. Rsl. 15:20,29), perzinahan antar saudara (bdk. 1 Kor. 5:1), kemesuman (Roma 1:29), hubungan seks pra-nikah, homoseksual, rsd. Kata-kata “erlagu la mehuli” (bhs. Ind. “rupa-rupa kecemaran”) e me perbahanen si biasa ilakoken guru-guru palsu erkaiten ras seksualitas si menyimpang ndai (bdk. 2 Tim. 3:6). Kata “merangap” (bhs. Ind. “keserakahan) e me eksploitasi seksualitas besar-besaran alu erbage-bage cara termasuk i je aktivitas seksual si biasa ilakoken i bas rumah-rumah pertoton budaya Yunani. Si debanna, ay. 4, cakap caram, cakap si lang-lang entah pe cakap si kemali, lit denga kitenna ras penjelasen ay. 3 i datas. Kerina hal si la mehuli si biasa ilakoken masyarakat si lit i sekelewet perpulungen kalak si tek enda itegasken rasul Paulus, nina “ibelasken pe ola ... la patut ibelaskenndu”. Sebab memang selain la lit gunana man perpulungen, kalak si tetap denga ilakokenna perbahanen si bage la dat bagin i bas Kinirajan Kristus ras Dibata (ay. 5).

Kai si ikataken Paulus, situhuna enggo bengket ku bas 10 pedah Dibata asum bangsa Israel ndarat bas Mesir nari, Hukum pe-7-ken, “Ula Erlua-lua”. Bahkan mulihi ipertegas Tuhan Yesus, asum khotbahNa i datas Uruk, “Ise ngehenen sekalak diberu, jenari leket ukurna ras diberu e, situhuna ia enggo erlua-lua i bas ukurna” (Matius 5:28). Ertina, erlua-lua e labo hanya perjumpaan secara fisik, tapi ibenaken i bas mata ras nusur ku pusuh entah pe ukur i je pe enggo ia erlua-lua. Enda tentuna man kalak si enggo lit pasangenna. Jadi pusuh ukurta memang arus bersih. Ajaren Yesus menuntut kesetian nandangi pasangen. Bage pe i bas surat Heber 13:4 “kerinalah kam ngergaken perjabun. Kegeluhen perbulangen ras ndehara i bas perjabun la banci melket. Dibata pagi ngukumsa kalak si erlagu la mehuli bage pe si erlua-lua”. Sekali nari pedah kerna ula erlua-lua penting sabab labo hanya bas PL, tapi pe i bas PB, khususna ajaren Yesus, surat-surat Paulus bage pe surat-surat umum.

Selaku anak-anak Dibata, mari siusih Tuhan Yesus, i ja IA enggo ngendesken KesahNa guna kita, gelah kita banci terkelin. Geluhta si enggo ibersihkenNa e ula nari sicemari, tapi bersih, bagi persembahen si nggeluh man baNa. Kalak si erlua-lua labo hanya la dat bagin i bas kinirajan Surga adi la lit pertobaten i bas ia, geluh i doni pe ialamina kiniseran, alu turah pinakit kelamin, HIV-AIDS, termasuk kehancuren i bas rumah tangga. Tetaplah kita setia, sijaga geluhta bersih iadep-adepen Dibata sebage persembahen si nggeluh man baNa. Soli Deo Gloria.