PJJ GBKP Tgl. 10 - 16 September 2017

PJJ GBKP TGL. 10 - 16 SEPTEMBER 2017

Pdt. L. br. Sinuhadji (Nd. Rey Tarigan)

Tema : KERINA TINEPA DIBATA, PUJILAH TUHAN (Mazmur 104:1-9)

Penjelasen Bahan Ogen & Renungen

Masmur 104 ibere judul i bas Alkitab TB-LAI “Kebesaran Tuhan dalam segala ciptaanNya”, i bas Pustaka si Badia “Pujin man Si Mada tinepa”, e me puji-pujin si ipenangkih Pemasmur erkiteken TUHAN Dibata si isembahna e me Dibata si dem alu kiniulin dingen kemulian si tangkas teridah arah bekas tinepaNa (ay. 1). Amin pe melala fenomena alam si la iangkai kita penyebabna, maun-maun erbahanca kita mbiar, tapi la lit sada pe si terganjangen asangken Dibata Si Mada tinepa, kerina fenomena alam ndai lit i bas pengaturen Dibata si dem alu kuasa (ay. 2-9). Dibata labo terjeng njadiken doni enda ras kerina isina tapi ipeliharaNa (ay. 10-18) janah ipelimbaruiNa (ay. 30) doni enda ras kerina isina alu kuasa KesahNa.

Hal si deban si banci sinen i bas ende-enden pujin Pemasmur enda, maka kegeluhen tinepa Dibata erkawiten sada ras si debanna (saling membutuhkan). Rubia-rubia minem i bas lau anak nari (ay. 11), perik-perik erbahan asarna i datas dahan-dahan (ay. 12), dukut-dukut guna rubia-rubia (ay. 14), erbage-bage sinuan man manusia gelah banci ka manusia datken gegeh guna ndalanken aktivitas geluhna (ay. 14b-15), deleng-deleng si meganjang jadi ingan nggagat kambing kerangen (ay. 18). Arah kai si enggo ibahan Tuhan guna kelangsungen kegeluhen tinepaNa khusus manusia, teridah sada ekosistem si sempurna, sabab tanpa sinuan-sinuan ras rubia-rubia manusia la banci nggeluh.

Kai enda antusenna? Si pemena, enden pujin si ipenangkih Pemasmur enda labo terjeng ende-enden si iendeken bage-bage saja si la lit ertina, tapi merupaken sada pengakun kiniteken maka TUHAN e me Dibata si erkuasa njadiken doni enda ras kerina isina. Kerina si ijadiken Dibata tuhu-tuhu mehuli janah si niarapken Dibata tentuna kiniraturen i bas kerina tinepaNa rikutken fungsina masing-masing si saling melengkapi sada ras si debanna. Si peduaken, enden pujin Pemasmur enda ngajuk kita gelah muji Dibata arah tindakan-tindakan si konkrit i bas memelihara ras melestariken lingkungen alam i sekelewetta.

Kerna kerusakan lingkungan alam si semakin parah terjadi akap kami la perlu nari sijelasken panjang lebar i bas kesempaten enda. Janah setiap tahun lalap lit persinget man banta baik i bas bahan PJJ bage pe arah bahan-bahan PA Kategorial kerna kepedulian nandangi alam ciptaan Tuhan. Si pentingna e me penungkunen apakah enggo lit bentuk-bentuk konkrit i bas kita muji Tuhan alu tindakan-tindakan si konkrit i bas memelihara ras melestariken lingkungen alam i sekelewetta? I bas bahan PJJ tahun 2015 adi la kami silap enggo pernah ibahan kami penjelasen kerna Gereja Sahabat Alam (GSA). Mungkin penting denga iulihi kami i bas bahan PJJ-nta sendah.

Gereja Sahabat Alam (GSA) e me kap salah sada Program Gereja si enggo idalanken secara ekumenis si tujunna memperlengkapi Gereja-gereja i bas menghubungken isu kerusakan lingkungan alam ras iman Kristen, alu bage labo hanya melalui doa ras puji-pujin kita ngataken cinta lingkungen tapi pe melalui tindakan si nyata ras konkrit. Program GSA ipalasi i bas prinsip 4R : 1) Reuse : menggunakan berulang-ulang bahan yang ada di sekitar kita. 2) Reduce : mengurangi pemakaian dan memaksimalkan sumber daya yang ada. 3) Replace : menggantikan barang atau bahan yang merusak dengan bahan yang ramah lingkungan. 4) Recyle : mendaur ulang bahan atau barang-barang bekas pakai. Ras 4R prinsip-prinsip Kristiani dalam rangka kepedulian lingkungen arus terus-menerus ilumbaken : 1) Repent : bertobat dan mengaku atas perlakuan buruk terhadap alam. 2) Restraint : mengendaliken diri/tidak rakus. 3) Respect : menghargai ciptaan Tuhan yang lain. 4) Responsible : bertanggung jawab dalam memelihara kelestarian lingkungan.

I bas kesempaten enda sekali nari kita isingetken, mari radu ras sidukung gerakan Gereja Sahabat Alam. Ibenaken alu lit kesadaren i bas dirinta secara pribadi guna njagai ras ngkelengi kerina tinepa Dibata. Gerakan penghijauan lingkungan ibenaken i bas rumahta nari terus ku lingkungan Gereja arus terus-menerus silakoken. Ula kita jadi pelaku penebangan kayu ilegal. Ambekken sampah i bas inganna (masuk bersih keluar bersih). Mengurangi pemakaian kertas ras plastik, rsd. Alu bage sue ras tema PJJ-nta sendah, kita enggo tuhu-tuhu muji Dibata arah kepedulian si konkrit nandangi lingkungan alam i sekelewetta. Janah kerina tinepa si lit i sekelewetta pe muji gelar Dibata erkiteken kehadirenta tuhu-tuhu jadi pasu-pasu nandangi tinepa si deban.