PA Kategorial GBKP Tgl. 17 - 23 September 2017

PA MAMRE GBKP TGL. 17 - 23 SEPTEMBER 2017

Nrs. Pdt. L. Sinuhadji (Bp. Rey Tarigan)

Kepemimpinan Karo

Ogen : Roma 12:8

Tema : MAMRE RAS BUDAYA

Tujun Gelah Mamre : 1) Meteh maka arah budaya kita er-Berita si Meriah (ersaksi); 2) Ertanggung jawab guna menggali ras melestariken budaya Karo selaku kearifan lokal

Metode : Diskusi

Penjelasan Bahan Ogen & Aplikasi

Bahan ogenta lit i bas perikop alu judul i bas Alkitab TB-LAI “Persembahan yang benar”, i bas Alkitab BIMK-BIS alu judul “Hidup untuk Allah” i bas Pustaka si Badia alu judul “Lagu langkah kalak Kristen”. Adi rikutken isi i bas bindu 12 enda akap kami judul arah Alkitab BIMK ras Pustaka si Badia si lebih pas erkiteken rasul Paulus labo ngerana kerna persembahen saja tapi hal-hal si deban si berkaiten ras pelayanen i bas Gereja bagepe si berkaiten ras etika Kristen i bas kegeluhen si tep-tep wari. Ay. 8 si jadi ogenta sendah nina, “Adi man banta ibereken Dibata kengasupen petetap ukur kalak, silakokenlah e. Kalak si ngasup mere man kalak si deban arus iberekenna e alu ukur menahang; kalak si lit kengasupenna jadi peminpin, arus ia tutus erdahin; kalak si ngasup encidahken perkuah ate man kalak si deban, arus ibahanna e alu ukur meriah”. Ayat enda erkaiten ras ayat-ayat si deban khususna ay. 4-7 si ngerana kerna pemere-pemere Kesah (karunia Roh Kudus) i bas rangka nggeluh sebage ring-ring si saling melengkapi i bas sada kula ni Kristus e me GerejaNa.

Pemere-pemere Kesah si isebutken rasul Paulus benaken ay. 6 nari nina : ernubuat, nampati kalak, ngajar, petetap ukur kalak, mere man kalak, minpin, ras ncidahken perkuah ate man kalak si deban. I bas bahasa Indonesia (BIMK-BIS nari) nina : karunia untuk mengabarkan berita dari Allah, karunia untuk menolong orang lain, karunia untuk mengajar, karunia untuk memberi semangat kepada orang lain, karunia untuk memberikan kepada orang lain apa yang dipunyainya, karunia untuk memimpin, dan karunia untuk menunjukkan belas kasihan kepada orang lain. Erkiteken PA-nta lit i teruh judul “Kepemimpinan Karo” maka akap kami fokus kita ku bas pemere Kesah guna minpin. Rasul Paulus ngatakenca “kalak si lit kengasupenna jadi peminpin, arus ia tutus erdahin”. I bas bahasa Indonesia nina, “siapa yang memberi pimpinan, hendaklah ia melakukannya dengan rajin” (BIMK-BIS : “Orang yang mempunyai karunia untuk memimpin, harus sungguh-sungguh memimpin”). Antusenna akap kami maka sebage sekalak peminpin arus ia minpin bagi Kristus e me peminpin si menghamba (servant leader) : nggit ia erkorban, erpihak man si musil entah pe si menderita, rendah hati, ngasup mereken teladan si mehuli nandangi kalak nterem si ipinpinna, rsd. E me budaya kepeminpinen Kristen si ilumbaken rasul Paulus.

Rikutken tema PA-nta sendah, adi sinen secara keseluruhan bindu 12 enda, situhuna kerina si iajarken rasul Paulus i bas perikop enda e me budaya si mbaru, budaya kalak si tek entah pe Kristen. Umpamana, budaya ngendesken kula man Dibata selaku persembahen si nggeluh, e me budaya si mbaru si arus ilakoken i bas latar belakang budaya ndekah kalak si tek si mpersembahken diri man dibata-dibata si deban i bas budaya kalak Yunani. Saling melengkapi sada ras si debanna i bas Gereja e me budaya si mbaru. Masu-pasu kalak si pesega-sega ras balas kejahaten alu perbahanen si mehuli e pe termasuk budaya si mbaru. Ras melala denga budaya Kristen si deban si ilumbaken rasul Paulus man perpulungen kalak si tek paksa si e. I bas 2 Kor. 5:17 ikataken Paulus nina, “Adi kalak ersada ras Kristus, ia me tinepa si mbaru, si male enggo lepas janah nehenlah, si mbaru enggo reh”. Sada konsekuensi si arus ilakoken kalak si tek e me jadi tinepa si mbaru, baik i bas perukuren, pengerana, perbahanen, termasuk je gaya hidup si erkaiten ras budaya.

Melala definisi kerna budaya, i bas kesempaten enda ibahan kami definisi sederhana arah wikipedia nari nina, budaya adalah suatu cara hidup yang berkembang, dimiliki bersama oleh sebuah kelompok orang, dan diwariskan dari generasi ke generasi. I bas rangka Minggu Budaya i bas Gerejanta, si pemena lebe sikataken bujur man Dibata erkiteken GBKP termasuk salah sada Gereja si ikut melestarikan kearifan lokal budaya Karo. Secara teologis palas si ipake nandangi budaya i bas Gerejanta e me sikap transformatif, Kristus memperbaharui kebudayaan (Christ and Culture, H. Richard Niebuhr). Secara praktis melala bentuk-bentuk budaya Karo si enggo melalui “saringan teologis” Kristus memperbaharui budaya, ertina labo kerina bentuk-bentuk budaya Karo ialoken i bas Gerejanta. I bas si e tentuna patut kita ngataken bujur man Dibata erkiteken sedekah enda GBKP enggo berupaya menerangi budaya Karo alu terang Kristus. Janah sada prinsip si pasti i bas hubungen antara adat budaya ras kiniteken man Yesus Kristus, e me kiniteken man Yesus Kristus si jadi patoken entah pe standar i bas menerangi entah pe men-transformasi budaya. Konfesi GBKP kerna budaya (Bab VI) ngatakenca : “Kami percaya, bahwa : Budaya adalah keseluruhan cipta, karya dan karsa manusia yang berakal budi. Oleh karena itu, dalam terang firman Allah, manusia harus menggali, mengembangkan dan melestarikan budaya secara positif, kreatif, kritis dan realistis untuk kesejahteraan manusia (1 Kor. 9:20-21; Yoh. 13:1-20)”.

Tapi penungkunenna uga selanjutna, apakah kita sudah merasa cukup puas dengan yang kita lakukan selama ini berkaitan dengan budaya Karo? Tentuna lang. Tujun i bas PA-nta nina budaya banci jadi media i bas kita er-Berita si Meriah, janah iajuk kita gelah menggali ras melestarikan budaya Karo. I bas si e tentuna si arus ilakoken e me : 1) Mempelajari alu tutus budayanta khususna budaya Karo si enggo ialoken i bas kiniteken man Yesus Kristus. 2) Merumusken nilai-nilai budaya Karo si enggo iterangi alu terang firman Allah. 3) Ngelakoken ras menyebarken nilai-nilai budaya ndai i bas kegeluhenta si tep-tep wari. Kalak Karo Kristen khususna Mamre enggo sepatuna jadi agen-agen perobahen si banci mabai (minpin) kalak si deban erbahan perobahen, er-budaya si mehuli, sue ras peraten Dibata.