PJJ GBKP Tgl. 17 - 23 September 2017

PJJ GBKP TGL. 17 - 23 SEPTEMBER 2017

Pdt. L. br. Sinuhadji (Nd. Rey Tarigan)

Tema : PENGERAKUT KINIERSADAAN (Pilemon 1:8-20)

Penjelasen Bahan Ogen & Renungen

Keleng ate Kristus si mpersadaken kita sada ras si debanna, subuk beda sukuta, bahasa, bangsa, jenis kelamin, tingkat sosial, tingkat pendidiken, rsd., (Epesus 2:13). Kekelengen Kristus si enggo sialoken e erbahanca la lit nari belat-belat (tembok pemisah) i bas kita berelasi ras kalak si deban, ngasup kita ngaloken keberadaan temanta bahkan adi lit pe terjadi konflik, la sicocoken, banci kita saling simaaf-maafen sada ras si debanna.

Enda me si terjadi antara Pilemon ras Onesimus entah Erguna. Pilemon e me sekalak ngawan perpulungen Kolose si ipake Tuhan ka melayani bali ras Paulus, bahkan rumahna rusur ipake guna perpulungen (bindu 1:2). Onesimus e me budak si Pilemon, tapi lawes ia nadingken tuanna alu dalen si la mehuli (banci jadi lit utangna si la tergalarina). Kedungenna jumpa ia ras Paulus i bas penjara. Rancangen Tuhan tetap rancangen si mehuli. I penjara Onesimus bertobat; Paulus sendiri ngatakenca maka Erguna enggo jadi anakna erkiteken kiniteken. Nai memang labo ia erguna man Pilemon erkiteken kesalahenna, tapi genduari labo saja ia banci erguna man Pilemon tapi pe man Paulus.

Ipindoken Paulus gelah Onesimus mulihken man Pilemon. Situhuna, banci nge tetap ia ras Paulus i penjara guna nampati dahin Paulus i bas meritaken Berita si Meriah, tapi ulin iakap Paulus, Onesimus mulihken man Pilemon. Lit kata-kata si menarik ikataken Paulus, maka Erguna (Onesimus) sirang kentisik ras Pilemon (lit kesempaten introspeksi diri) gelah banci rasa lalap ras Pilemon. Genduari Onesimus la nari jadi budak Pilemon, tapi senina si meherga i bas Kristus. Keleng ate Paulus man Onesimus, bage ka pe ndauh beliden kekelengen Pilemon man Onesimus (sada keyakinen ras pengarapen). Pemindon Paulus gelah banci Pilemon mulihi ngaloken Onesimus ras memaafkan adi salahna ndube. Bahkan nggit Paulus njaminisa, adi kin memang lit utang Onesimus gelah Paulus si nggalarisa. Alu meseksek hal enda ipindoken Paulus, sabab ia enggo tuhu-tuhu nggejapken maka Pilemon seninana i bas Tuhan, emaka la ia mbiar-mbiaren ngerana bage man Pilemon.

Selain Kristus enggo mpersadaken kita, selaku kita kalak Karo ope bengket Berita si Meriah ku kalak Karo lit si mpersadaken kita e me : merga si lima, rakut si telu, tutur si waluh, perkade-kaden 12+1 (penjelasen e enggo panjang lebar lit bas bahan PJJ-ta). Orat nggeluh Karo, si mabai kalak Karo nggeluh sisampat-sampaten, sikeleng-kelengen aminna pe la sada kuta, la sada dareh tapi banci ndeher erkiteken orat nggeluh, kerina enggo banci erkade-kade. Bahkan si la pe kalak Karo, adi enggo bengket ia ku bas kalak Karo erkiteken perjabun, minter ban Mergana, ras enggo lit sangkep geluhna. Teman meriah pe, banci lebih dekat asangken kade-kade sendiri, erkiteken relasi si mehuli.

Berita si Meriah si bengket ku kalak Karo menaken 1890, labo meneken budayanta, malah arah kerina unsur budaya, bahasa, merga si lima, rakut si telu, tutur si waluh, perkade-kaden 12+1, erbahanca persadanta reh teguhna. Arah kekelengen Kristus si enggo sialoken, erbahanca reh teguhna kiniersadan selaku kalak Karo. Sistem runggu si arus terus ipake i bas kita arih-arih muat si mehuli. Bahkan ‘di kenca lit konflik (persoalen) pe situhuna la banci lit nari istilah “tek-tek ketang ntah sada matawari pe ateku lang”, sebab lit wadah pupur sage si banci sipakeken guna saling memaafkan sada ras si debanna. Ertina, kekelengen i bas Kristus nge si erbahanca reh teguhna persadanta selaku kita kalak Karo.