PJJ GBKP Tgl. 1 - 7 Oktober 2017

PJJ GBKP TGL. 1 - 7 OKTOBER 2017

Pdt. Larena br. Sinuhadji (Nd. Rey Tarigan)

Tema : KEMALEMEN ATE ORANGTUA (Masmur 37:23-26)

Penjelasen Bahan Ogen & Renungen

Masmur 37 ibere judul “Kedungen kalak jahat dingen kalak bujur”, i bas TB-LAI nina “Kebahagian orang fasik semu”, nuriken kerna konsekuensi si bakal ialami kalak jahat i bas perbahanenna (Ay. 9 : ilesapken. Ay. 15 : ia jine ibunuh pedangna. Ay. 17 : ibuat Tuhan kuasa kalak jahat. Ay. 20 : mate me kalak jahat, rsd). Emaka ola sitik pe simorahi kalak jahat (bdk. ay. 1 : “ola atendu nembeh kempak kalak jahat, ola mecimberu”, ay. 7b : “ola morahi kalak si rulih alu ngelakoken pertakin si jahat), amin i bas paksa genduari berlimpah materi, sukses rikutken pengakap jelma si nterem sada paksa waktu ialokenna ulih kejahatenna e.

Secara khusus i bas pengogen enda ituriken kerna pengalamen kegeluhen Pemasmur maka kalak si tetap ernalem man Tuhan dingen tetap nggeluhken geluhna bagi si ngena ate Tuhan, maka tetap ikawali dingen itegu-tegu Tuhan kegeluhenna. Amin sekali guling entah pe iderpa erbage-bage perbeben geluh tapi la ipediat Dibata ia ngalakenca sekalak. Perbeben e labo erbahanca ia bene, sabab Tuhan kap si negu tanna. Tuhan tetap memimpin kegeluhenna. Bahkan iimanina, mulai kin ia kitik-kitik nari seh genduari enggo metua, la enggo pernah idahna kalak bujur itadingken Tuhan entah pe kempuna jadi pemindo-mindo. Sabab Tuhan tetap setia nehken padanNa, maka kalak si tetap erkemalangen man baNa ras setia, geluhna tetap ipasu-pasu Tuhan. Pengamalen Pemasmur enda sieteh agak lit perserina ras pengalamen Yesaya si ngatakenca, “Aku kap Dibatandu, emaka Kuembah-embah kam seh kam metua janah ubanen. Aku si njadiken kam, emaka Kutatang-tatang kam, Kuangkip-angkip, janah Kukelini kam” (Yesaya 46:4). Ertina, Dibata peduli, keleng ateNa orangtuanta.

Adi Dibata-nta pe keleng ateNa orangtuanta maka kita selaku anak-anak Dibata ras kesusuren orangtuanta keleng ateta orangtuanta. Tambah min kemalemen ate orangtuanta erkiteken perhatian ras perbahanentan. Erbage-bage contoh enggo ras banci denga ilakoken :

1. Menfasilitasi alu PA Lansia (Saitun) gelah tetap lit wadah guna saling memuji, ras saling berbagi,

2. I rumah pe babai guna rende, saat teduh, ertoto gelah tetap paguh kinitekenna.

3. Jabu ras kegeluhen anak-anak terus ku kempu mereken kemalemen ate, i ja tetap ersada arihna.

4. Kemunduren secara fisik ras psikologis si erbahanca maka perlu manjar-anjar i bas ngerana sebab murah kel orangtuanta megelut.

5. Bere kesempaten man bana guna nuri-nuri kerna pengalamen geluhna. Emaka i bas si e iperluken kesabaren man banta guna megiken ceritana.

6. Libatken secara aktif i bas kegiaten-kegiaten Gereja. Lansia si kurang aktif umumna pedas mengalami penurunen stamina entah pe kerusaken piga-piga organ tubuh bage pe kolihen. Sebalikna, adi aktif umumna lebih lambat i bas penurunen stamina entah pe kolihen. Tapi i bas si e, sidarami kegiaten-kegiaten si la nari erbahanca latih secara fisik, tapi kegiaten si bentukna sosial si mereken penghiburen man Lansia. Arah buena kegiaten si ikutina, erbahanca berkembang sikap geluh bijaksana.

Kemalemen ate man orangtuanta labo arah erbage-bage materi barang si ibereken man bana, tapi arah kerembakenna ras Tuhan nai-nai nari seh gundari enggo metua. Maka geluh rembak ras Tuhan, dingen ngidah kegeluhen anak-anak terus ku kempu pe tetap i bas Tuhan e me si erbahanca malem atena.